Mateo 22:21 - Manobo Western Bukidnon

²¹ Ne ke sikandan te, “Dagwey wey ngazan te hadì diyà te Ruma.” Ne migkag̵i si Jesus te, “Ne emun kandin, ne iyan egkesuatan din, iveg̵ey niw ziya te kandin, ne iveg̵ey niw zaan diyà te Megbevayà is kandin he azen,” ke sikandin.

Mateo 22:21 Кръстосани препратки

Mateo 22:20

Ne mid-insà si Jesus te, “Hentei ki zagwey wey ngazan heini is nekesurat kayi?”

Mateo 22:37

Ne midtavak si Jesus te, “Kinahanglan he iyan nu mahala ziyà te g̵ehinawa nu is Megbevayà he Nengazen tew. Iyan nu sikandin mahala ziyà te g̵ehinawa nu, isip nu, wey kedsavut nu.

Mateo 4:10

Ne mibensag̵an ni Jesus te, “Setanas, ewai a kenikew! Duen insurat he Lalag te Megbevayà he edhenduen te, ‘Iyan niw zà ezapa is Nengazen he Megbevayè niw. Ne is duma pa he ngazan he megbevayà, kenè niw tumana is sug̵ù din.’ ”

Marcos 12:17

Ne ke si Jesus te, “Ne emun kandin ne iyan egkesuatan din, iveg̵ey niw ziyà te kandin, ne iveg̵ey niw zaan diyà te Megbevayà is kandin he azen.” Ne utew zan ingkeinuinu haazà is migkag̵i ni Jesus.

Lucas 20:25

Ne ke si Jesus te, “Ne emun kandin, ne iyan egkesuatan din, iveg̵ey niw ziyà te kandin; ne iveg̵ey niw zaan diyà te Megbevayà is kandin he azen.”

Lucas 23:2

Ne hein nekeuma zan dutun ne impezineg dan ki Pilatu is menge sumbung dan. Ke sikandan te, “Midsusi zey heini is etew ne netuenan dey he edsinamuk kayi te inged tew su ibpeengked din is menge etew he ebayad te vuhis diyà te lavew he hadì tew ziyà te inged he Ruma. Ne kenà duen dà taman su egkeg̵iyen din he iyan sikandin si Kristu, he ke và dà egkeg̵iya, hadì.”

Nengeulaula 4:19

Ne midtavak si Pedro wey si Juan te, “Isipa niw ke hendei zapit is egkesuatan te Megbevayà kayi te zezuwa he paag̵i: ke edtumanen dey ve is sug̵ù niw he kenè dey ibpenurù is ngazan ni Jesus, wey ke edtumanen dey is ebpeveelan kenami te Megbevayà.

Nengeulaula 5:29

Ne zutun midtavak si Pedro wey is duma he menge epustul te, “Kinahanglan he edtumanen dey is sug̵ù te Megbevayà kenà is menge sug̵ù he mibeelan te etew.

Ruma 13:7

Ne tenged kayi kinahanglan he ebeyazan ta is buhis wey is duma pa he ebpeveyazan kenita te gubirnu. Ne edtehuzen ta zaan is menge etew te gubirnu, ne ibpeehè ta is dekelà he kedtehuza ta te pid-etawan dan.