Mateo 21:19 - Manobo Western Bukidnon

¹⁹ Ne te uvey zutun te zalan neehè din is kayu he igira. Mibeyaan din haazà, iyan, wazà beg̵as he neehè din su menge zahun dà. Ne migkeg̵iyan din haazà is kayu te, “Kenè ke en mebeg̵as minsan keenu.” Ne wazà metegteg̵aad nelay-ub haazà is kayu.

Mateo 21:19 Кръстосани препратки

Mateo 21:20

Nengeinuinu utew is menge sumusundan ni Jesus dutun hein neehè dan is nehitavù dutun te kayu. Ne ke sikandan te, “Maan is segugunà nelay-ub heini is kayu he igira?”

Marcos 11:14

Ne zutun migkag̵i si Jesus te, “Puun guntaan, kenè ke en egkekeenan te veg̵as nu.” Nezineg haazà is lalag din dutun te menge sumusundan din.

Marcos 11:20

Ne hein nepawà, midlikù dan dutun te inged ne ziyà te ibayè dan neehè dan kes kayu he igira he nepurung en meg̵angu, minsan is dalid din.

Lucas 3:9

Is ebpiley te kayu, migkayew en su ebpemilayen din en is minsan hengkey he kayu he kenà meupiya is beg̵as din su wey mevinsuli, he ke và dà egkeg̵iya, is etew he kenà meupiya is ulaula zin, edsilutan sikandin te Megbevayà.”

Juan 15:2

Ke zuen subpang ku he kenà ebpemeg̵as, id-awè din. Ne is langun he menge subpang ku he ebpemeg̵as, edlumpiyuwan din su wey mekesigudu mekepemeg̵as.

Juan 15:6

Su ke zuen etew he edsuwey kediey, ed-engkezan sikandin iring te subpang he idtimbag wey meg̵angu. Ne is menge subpang he nengeg̵angu, edtig̵umen ne idtimbag diyà te hapuy wey metutung.

2 Timoteo 3:5

Uvag sikandan ed-azap te Megbevayà, iyan, kenè dan edtuu he zuen gehem din. Likayi nu is menge etew he iring dutun.

Tito 1:16

Duen menge etew he egkeg̵iyen dan he emig̵u sikandan te Megbevayà, iyan, pinaag̵i te menge ulaula zan egketuusan ta he kuntada sikandan te Megbevayà. Utew zin sikandan egkeepesi su kenè dan ebpememineg te tutuu he tuluuwen. Ne tenged dutun kenè dan dait he ibpeulaula zin te minsan hengkey he meupiya.

Hudas 1:12

Ebpekezezaat sikandan te zengeg niw ke edtampu zan te keemuran niw su kenè dan mulà egkeeled dutun te kedtumana zan te mezaat he kebayè dan ke ebpekidtug̵en dan keniyu. Iyan dà egkeisip dan is kandan dà he egkesuatan. Wazè dan menge pulus; iring sikandan te menge g̵apun he wazà duen uzan he mibpagwis te keramag. Iring sikandan te menge kayu he kenà ebpemeg̵as minsan pa te iyan en pezem timpu te kebpemeg̵as. Ne umba kenà ebpekepemeg̵as su nepiley en ne neg̵angu.

Impezayag 22:11

Ne zutun he timpu,” ke sikandin, “sikan is mezaat pa is ulaula zin, ipepenigudu en sikandin ibpevaal te mezaat. Ne sikan is meremerik pa is ulaula zin dutun, ipepenigudu en sikandin ibpevaal te meremerik. Ne sikan is metazeng is ulaula zin dutun, ipepenigudu en ibpevaal te metazeng, ne haazà is etew he midhimu te Megbevayà he sakup din, ipepenigudu zutun sikandin te kebpesakup din te Megbevayà.