Mateo 18:31 - Manobo Western Bukidnon

³¹ Ne hein netuenan te menge zuma zin he sulug̵uen haazà is mid-ulaula zin dutun te utangan kandin ne nengepauk dan ne midhendiyè dan te egalen dan he hadì ne midtudtul zan haazà is langun he mid-ulaula zin.

Mateo 18:31 Кръстосани препратки

Mateo 14:9

Ne zutun utew neseeng haazà is hadì, iyan, tenged dutun te pesarig din he nezineg te langun he menge bisita zin, midtuman din haazà is mibuyù dutun te rag̵a.

Mateo 18:28

Ne zutun mid-awà haazà is sulug̵uen ne neuma zin is sulug̵uen daan dutun te hadì he utangan diyà te kandin haazà is iring din he sulug̵uen te pira zà he pisus. Ne migewezan din haazà ne mibpekel zin te egkag̵i te, ‘Beyazi nu kes utang nu kedì!’

Mateo 18:30

Iyan, wazà mesuat haazà is etew, ne impepirisu zin haazà is utangan kandin taman te kenè pa ebpekevayad.

Mateo 18:32

Ne impetawag dutun te hadì haazà he sulug̵uen, ne migkeg̵iyan din te, ‘Uripen ka he lalung! Mibpesaylu ku sikew ne in-awè kud diyà te kenikew is utang nu tenged dà te midhangyù ka kediey.

Marcos 3:5

Ne te ebpenlangulangu si Jesus dutun te mezakel he menge etew, utew zin egkepeuki sikandan ne utew zaan mibmesakit is gehinawa zin su haazà is menge etew, wazè dan kehizu. Ne zutun migkeg̵iyan din haazà is etew he nezeetan is belad din te, “Ketenga nu, Mama, is belad nu.” Ne migketeng dutun te etew haazà is belad din ne segugunà neulii.

Lucas 14:21

Ne zutun mid-ulì haazà is midsug̵ù te edtukud te keemuran ne midtudtul zin diyà te egalen din haazà is langun he menge pituwà te menge etew he impeveyaan kandin. Ne haazà is egalen din, ne utew mibmezaat is gehinawa zin. Ne migkeg̵iyan din haazà is sulug̵uen din te, ‘Hendiyè ka te inged ne ikula nu is menge kersada wey menge zalan dutun ne pendumaha nu zini is menge etew he egkengeayuayu, sikan is menge piang, menge pungkul, wey menge lakap.’ Ne zutun midhipanew haazà is sulug̵uen.

Lucas 19:41

Ne midlaus ensi Jesus pehendutun te inged he Hiruselim ne hein neehè din en haazà is inged ne midsineg̵awan din su utew sikandin nehizu te menge meg̵inged dutun.

Ruma 12:15

Ke zuen etew he zuen din igkelipey, melipey kew zaan tenged dutun te kelipey zin. Ne ke zuen etew he zuen igkeseeng din, keseeng kew zaan tenged dutun te igkeseeng din.

2 Kurintu 11:21

Utew zan mevurut, iyan, sikami, telawen key ne egkeeled a su haazà is menge ulaula zan keniyu he kunaan niw ke utew meupiya, wazè dey meulaula ziyan te keniyu. Ne g̵eina te wazè dan en kegkehandek te edantal ne kenà a zaan egkehandek he edantal minsan ke ebpekeiring a te tulebung.

Hibriyuhanen 13:17

Tumana niw is sug̵ù te menge egalen niw te menge tumutuu ne ipeehè niw is kedtehuza niw kandan su iyan sikandan ed-elima keniyu te edtuu, ne zuen timpu keuzemà he edsusiyen te Megbevayà ke metinumanen dan be is ed-elima keniyu. Emun ebpemineg̵en niw is sug̵ù dan, utew ibmeupiya te g̵ehinawa zan is baal zan. Ne emun kenè kew ebpemineg, utew mereg̵en is baal zan ne egkehimu zaan heini he idlised niw.

Hibriyuhanen 13:3

Kenè niw lipati is kedtavang niw te menge tumutuu he pirisu. Purungi niw sikandan he iring te iyan kew nepirisu. Tevangi niw zaan is menge tumutuu he ebpesipelahan he iring te iyan is keugelingen niw he lawa nepesipelahan.