Mateo 16:28 - Manobo Western Bukidnon

²⁸ Kenè niw heini lipati he zuen menge zuma tew kayi he kenà ebpatey taman te egkeehè e zan is Kakey te Menusiyà he ebpekeuma su edhadì.”

Mateo 16:28 Кръстосани препратки

Mateo 10:23

Ne emun ebpesipelahan kew zan diyà te sengeinged, pelag̵uy kew pehendiyà te sevaha he inged. Ne venar is egkeg̵iyen ku keniyu he te kenè niw pa egkepasad is ebpeveelan ku keniyu ziyà te langun he menge inged te nasud he Israyil ne edlikù e en is Kakey te Menusiyà.

Mateo 16:13

Midhendiyà ensi Jesus te inged he uvey te inged he Sisarya Pilipus. Ne hein nekeuma zan en dutun, mid-insaan din is menge sumusundan din te, “Siak is Kakey te Menusiyà, hentei e kun sumalà te ked-isipa kediey te menge etew?”

Mateo 24:3

Ne netegteg̵aad dutun mibpinuu si Jesus diyà te vuvungan he egngezanan te Ulivuwan. Ne mid-uvayan en maan sikandin te menge sumusundan din te wazè dan duma su iyan dan dà. Ne ke sikandan te, “Keg̵iyi key ke keenu egkehitavù heini is langun, wey ke hengkey is egkeulaula he tuus wey zey metueni he iyan en kedlikù nu wey kegketapus kayi te timpu?”

Mateo 24:34

Tenuzi niw is egkeg̵iyen ku keniyu: emun egkeehè niw he egkengetuman en heini kenè kew pa egkeamin ebpatey taman te kenè pa egkengetuman heini is langun.

Mateo 24:42

Purungpurung kew su kenè niw egketuenan ke keenu he andew is kedlikù ku te Nengazen niw.

Mateo 26:64

Ne midtavak si Jesus te, “Iyan heeyan sumalà is migkag̵i nu ne ekeg̵iyan ku sikiyu is langun he siak is Kakey te Menusiyà, keuzemà egkeahà a keniyu is diyà ebpinuu te zapit te egkekewanan te Megbevayà. Ne egkeahà a zaan keniyu ziyà te menge g̵apun is ebulus he ebpuun diyà te langit,” ke sikandin.

Mateo 8:20

Ne migkag̵i si Jesus diyà te kandin te, “Is laku ne zuen surung he egkeubpaan din, ne is tagbis, duen din salag, iyan, siak is migeraran te Kakey te Menusiyà, minsan hendei e zà memekehizegà su wazà ed-ubpaan ku.”

Marcos 13:26

Ne zutun, siak is Kakey te Menusiyà, egkeahà a ziyà te menge g̵apun is ebpekeuma he utew zekelà is gehem ku wey utew merayag is ked-anlag ku.

Marcos 8:38

Is minsan hentei he igkeeled e zin wey igkeeled din is ibpenurù ku kayi te timpu he mezakel is menge etew he lalung wey edsumpalit te Megbevayà, siak is Kakey te Menusiyà, igkeeled ku zaan sikandin keuzemà ke edlikù a he edumahan a te menge velinsug̵uen ku wey edsun-uzan ad te mekeg̵eg̵ehem he anlag te Amey ku he Megbevayà.”

Marcos 9:1

Ne zutun migkag̵i si Jesus te, “Tentenuzi niw heini: duen menge zuma tew kayi he kenà ebpatey taman dutun te timpu he ibpaahà te Megbevayà is kedhadì din he utew zekelà is gehem din te kebayàbayà te menusiyà.”

Lucas 18:8

Egkeg̵iyen ku keniyu he utew meg̵aan is kedtevangi zin keniyu. Kenà ebungasen is Megbevayà he edtavang keniyu. Iyan, keuzemà emun edlikù a is Kakey te Menusiyà dini te kelibutan mezelag dà is etew zutun he neketuu kedì.”

Lucas 2:26

Ne impesavut kandin he zaan te Wag̵as he Mulin-ulin he kenà tekew en ebpatey taman te kenè din pa egkeahà is impenaad he etew he nepilì te Nengazen he ibpahadì din te menusiyà.

Lucas 9:27

Tentenuzi niw heini,” ke si Jesus, “duen menge zuma tew kayi he kenà ebpatey taman te timpu he ibpaahà kandan te Megbevayà is keg̵ehem din te kedhadì.”

Juan 21:22

Ne midtavak si Jesus te, “Emun iyan ku egkesuatan he kemulu pa sikandin uuyag keuzemà dutun te kedlikù ku zini te kelibutan, wazè nu kelavet. Sunud ke zà kediey.”

Juan 8:51

Utew venar is egkeg̵iyen ku keniyu he is minsan hentei he edtuman te ibpenurù ku kandin, kenè en ebpekeag̵i te kemetayen!”

Juan 8:52

Ne migkag̵i kandin is menge Hudiyu te, “Netuenan dey he tutuu iyan he edlelungen ka te mezaat he mulin-ulin! Minsan si Abraham wey is langun he menge ebpeneuven dengan te Megbevayà, minatey zan en pudu, ne maan is egkag̵i ka he is minsan hentei he edtuman te ibpenurù nu kandin, kenè en ebpekeag̵i te kemetayen!

Nengeulaula 1:11

Ne migkag̵i heini is dezuwa te, “Sikiyu is menge tigGeliliya, maan is kemulu kew pa edlingahà diyà te langit? Heini si Jesus he neehè niw he nevatun pehendiyà te langit, keuzemè en edlikù dini te tanà, ne is kedlikù din, ne iring ded daan te kegkevatun din.”

1 Kurintu 15:23

Iyan nehuna he nevanhew, si Kristu. Ne sikitew is menge sakup din, iyan kiw huziyan kandin he egkevanhew zutun te kebpekelikù din keuzemà.

1 Tiselunika 1:10

Su edteg̵azan niw kun is kedlikù te Anak din he ebpuun te langit. Iyan si Jesus he Anak te Megbevayà he mibanhew zin. Iyan si Jesus he midlibri kenitew te silut wey kiw mekeliyu te ebpekeuma he kedlimasa te Megbevayà te menusiyà.

Hibriyuhanen 2:9

Ne minsan pa zutun, mibpeetew si Jesus ne pinaag̵i kayi midhimu he lavew kandin is menge velinsug̵uen taman te mevavè dà he timpu su wey tenged te zekelà he g̵ag̵ew te Megbevayà, mebpehimatey sikandin he elili te tivuuk he menusiyà. Ne tenged kayi te kebpehimatey zin, ne nehimu en sikandin guntaan he utew telehuzen wey utew belentug̵en ne imbeg̵ey kandin te Megbevayà is kebayàbayà te minsan hengkey.

Santiago 5:7

Ne sikiyu is menge zuma ku he tumutuu, kinahanglan he meinentusen kew taman te kedlikù te Nengazen. Su is ebasuk, ebpekeantus te kedtag̵ad din taman te edsebpet en is impemula zin diyà te tanè din. Edteg̵azan din is uzan he ebpetuvù te pinemula zin wey is ebpeketesan te pinemula zin.

2 Pedro 1:16

Sikan is impenurù dey keniyu mehitenged te egkeulaula keuzemà ke edlikù is Nengazen tew he si Jesu Kristu he utew zekelà is gehem din, ne kenà heini tetezemen dà he midhimu te etew zà duen. Netuenan dey su nemesahan dey en is mekeg̵eg̵ehem he anlag din.

1 Juan 2:28

Ne tenged kayi te langun, menge anak ku, hemeni niw is kebpekidsevaha niw ki Kristu su wey kenè kew mahandek ne kenè kew egkeeled keuzemà dutun te kedlikù din.