Mateo 15:31 - Manobo Western Bukidnon

³¹ Ne utew nengeinuinu is menge etew zutun te nengeehè dan. Su ebpekekag̵i en sikan is emew; ne neulian en sikan is pungkul; sikan is piang, ne ebpekehipanew en; ne sikan is nengelakap, ne ebpekeehè en. Ne midalig dan dutun is Megbevayà he edsimbahan dan te menge kevuwazan ni Israyil.

Mateo 15:31 Кръстосани препратки

Mateo 15:30

Ne mibpenhendiyà te kandin is utew mezakel he menge etew. Mibpenduma zan is menge piang, menge pungkul, menge lakap, menge emew. Ne miduma zan is mezakel pa he egkengezeruwan. Ne insavuk dan haazà diyà te etuvangan ni Jesus ne nengeulian din is langun dutun te mibpevawì kandin.

Mateo 18:8

Emun iyan ebpekeawà te kedsarig nu kediey is belad nu, emun kenà, ne paa nu, tempeza nu wey itimbag! Su meupiya pa ke pungkul ka is ebeg̵ayan te untung he wazà pidtemanan, kenà te zezuwa is belad nu wey paa nu he idtimbag ka ziyà te hapuy he wazà pidtemanan.

Mateo 21:14

Ne nemenelavuk kandin dutun te Valey te Megbevayà is menge lakap wey menge piang ne nengeulian din sikandan is langun.

Mateo 8:10

Ne te nezineg ni Jesus heini, ne utew neinuinu ne ke sikandin diyà te menge etew he nemenduma kandin te, “Wazè ku pa meuma is etew he kevuwazan ni Israyil he iring kayi he utew mezesen is kedtuu zin.

Mateo 9:32

Ne zutun te wazè pa megenat haazà is menge lakap, nekeuma is menge etew he edumahan dan diyà te ki Jesus is maama he neemew su midsuukan te mezaat he mulin-ulin.

Mateo 9:33

Ne mibewian heini ni Jesus, ne segugunà dutun nekekag̵i haazà is etew. Ne nengeinuinu is langun he menge etew zutun, ne ke sikandan te, “Sikitew is menge kevuwazan ni Israyil, sikan tew pa maahà is iring kayi!”

Mateo 9:8

Hein naahà heini te menge etew zutun, nengehandek dan ne midalig dan is Megbevayà tenged te mibeg̵ayan din is menusiyà te keg̵ehem he iring kayi.

Marcos 2:12

Ne zutun, haazà is etew, mid-enew sikandin ne migkuwa zin haazà is duyanè din ne midlawang puun dutun te valey ne naahà haazà te langun he menge etew zutun. Ne is menge etew, hein neehè dan haazà ne utew zan nengeinuinu ne midalig dan is Megbevayà. Ne ke sikandan te, “Wazè tew pa keenu maahà is iring kayi!”

Marcos 7:37

Utew zan haazà ingkeinuinu ne ke sikandan te, “Utew meupiya is kebeeli zin kayi te langun su edhimuwen din minsan is kenà ebpekezineg he mekezineg ne sikan is kenà ebpekekag̵i ne ebpekekag̵i!”

Marcos 9:43

Emun iyan igkeawà te kedsarig nu kedì is belad nu, tempaza nu heini wey itimbag su meupiya pa ke pungkul ka is ebeg̵ayan te untung he wazà pidtemanan kenà te zezuwa is belad nu ne idtimbag ka ziyà te Impirnu he zutun kenà egkeevukan is hapuy.

Lucas 14:13

Iyan, emun edtukud ka te keemuran ne iyan nu umbitaha is egkengeayuayu wey is menge pigket, menge pungkul, wey is menge lakap.

Lucas 14:21

Ne zutun mid-ulì haazà is midsug̵ù te edtukud te keemuran ne midtudtul zin diyà te egalen din haazà is langun he menge pituwà te menge etew he impeveyaan kandin. Ne haazà is egalen din, ne utew mibmezaat is gehinawa zin. Ne migkeg̵iyan din haazà is sulug̵uen din te, ‘Hendiyè ka te inged ne ikula nu is menge kersada wey menge zalan dutun ne pendumaha nu zini is menge etew he egkengeayuayu, sikan is menge piang, menge pungkul, wey menge lakap.’ Ne zutun midhipanew haazà is sulug̵uen.

Lucas 18:43

Ne segugunà nekeahà haazà is lakap. Ne zutun midumazuma en sikandin ki Jesus is utew nekezalig te Megbevayà. Ne haazà is menge etew he nemekeahà dutun, ne nemekezalig dan daan te Megbevayà.

Lucas 7:16

Ne is langun he nemekeahà dutun, ne utew zan nengehandek ne nezalig dan is Megbevayà, ke sikandan te, “Heini en te kenitew is utew lavew he ebpeneuven te Megbevayà!” Ne ke sikandan daan te, “Mibulus en is Megbevayà su wey kiw melibri is menge nengepilì din he etew!”

Juan 9:24

Ne zutun mid-umanan dan umawa haazà is neulian he lakap ne migkeg̵iyan dan te, “Iyan nu keg̵iya is tutuu su kayi ka te etuvangan te Megbevayà. Netuenan dey he heini si Jesus, mesinupaken sikandin te sug̵ù te Megbevayà.”