Mateo 13:22 - Manobo Western Bukidnon

²² Ne sikan is benì he ziyà mengeulug te tanà he zug̵iyen is menge sagbet dutun, iyan is Lalag te Megbevayà he iyan nemekezineg duen is menge etew he ebpemineg, iyan, egkelipatan dan tenged te menge seeng dan kayi te kelibutan wey tenged te kegkesuat dan te selapì. Ne tenged kayi is Lalag te Megbevayà, kenà ebpulus diyà te kandan.

Mateo 13:22 Кръстосани препратки

Mateo 12:32

Sikan is edsumpalit kedì te Kakey te Menusiyà, egkepesaylu pa; iyan, sikan is edsumpalit te Wag̵as he Mulin-ulin, kenè en egkepesaylu te wazè din pidtemanan.

Mateo 13:39

Ne sikan is kuntada te etew, ne iyan en si Setanas. Ne is tirag̵un, iyan is ketepusan he timpu; ne sikan is ebpemenlegtey, iyan is menge velinsug̵uen te Megbevayà.

Mateo 13:40

Ne haazà is ebezuten dan he menge mezaat he pinemula he ebinsulan dan, iyan haazà egkehitavù keuzemà te ketepusan he timpu,

Mateo 13:7

Ne zuen daan benì he nengeulug diyà te tanà he menge zug̵iyen is menge sagbet dutun. Ne mibmemelayat heini is sagbet ne mibpengulembezan dan haazà is pinemula.

Lucas 12:15

Ne migkag̵i si Jesus diyà te menge etew te, “Purungi niw ventayi is ulaula niw su wey wazà keleleg̵ed diyan te keniyu. Su is ibmeupiya te untung te etew, kenà ebpuun te mezakel he menge azen.”

Lucas 12:21

Ne mid-uman megkag̵i si Jesus diyà te mezakel he menge etew, ke sikandin te, “Iring kayi te sepian he etew is minsan hentei he edtipig te zekelà he ketig̵eyunan, iyan, wazà diyà te kandin is minsan hengkey he igkesuat te Megbevayà.”

Lucas 21:34

Ne ke si Jesus te, “Uram kew wey kew kenà kayi zà egketaman te kegkebibu wey kebpemenginum wey te kedlag̵ud niw te menge kelibutanen he menge kinahanglan niw. Su emun kenè kew ed-uram ne egketik-awan kew egkesaut te andew te kedlimasa te Megbevayà te menusiyà. Ne egkeiring kew te egketelebpì he rumat.

Lucas 8:14

Ne haazà is benì he ziyà mengeulug te tanà he zug̵iyen is menge sagbet dutun, ne iyan is Lalag te Megbevayà he nezineg te menge etew, iyan, tenged te menge seeng dan wey is suat dan te selapì, wey is menge kelipey he kayi te kelibutan, egkelipatan dan is nezineg dan ne kenà ebpulus diyà te kandan is Lalag te Megbevayà.

Nengeulaula 8:18

Ne zutun naahà ni Simon he ed-ulinan is menge etew te Wag̵as he Mulin-ulin emun egkezepenetan te zezuwa he epustul. Ne ebeg̵eyan din pezem sikandan te selapì,

Ruma 12:2

Kenè niw iringi is menge ulaula te menge etew he kuntada te Megbevayà, kekenà, itug̵ut niw he helina kew te Megbevayà pinaag̵i te kebeg̵uwa zin te isip niw. Ne zutun egkesavut niw human is egkesuatan te Megbevayà, he ke và dà egkeg̵iya, egkesavut niw ke hengkey is menge ulaula he metazeng he egkesuatan he kenà egkesewayan te Megbevayà.

1 Kurintu 1:20

Ne egkesavut ta kayi he wazè en pulus te ketau te menge uluwanen, ne wazà daan pulus te kedsavut te nemeketunghà wey te menge metau he egkag̵i zini te kelibutan. Su impesavut en te Megbevayà he is ketau he zini zà ebpuun te kelibutan, wazè en pulus diyà te kandin.

1 Kurintu 2:6

Ne haazà is menge etew he mezesen is kedtuu zan te Megbevayà, duen ketau he ibpesavut ku kandan, asal, is ketau he ibpenurù ku kandan ne kenà daan ebpuun te etew zà duen wey ziyà te menge pengulu he iyan ebayàbayà dini te kelibutan su egkeewaan en heini te menge g̵ehem dan.

1 Kurintu 2:8

Ne haazà is menge kelibutanen he pengulu, wazè dan mesuati te edsavut ke hengkey is edhimuwen te Megbevayà su ke nesavut dan, wazè dan pezem iransang te krus kes mekeg̵eg̵ehem he Nengazen te langun.

1 Kurintu 3:18

Kinahanglan he kenè kew mebpetazin te menge ulaula niw su ke zuen sevaha keniyu he ed-isipen din he zuen ketau zin te ked-isip sumalà is ked-isipa kandin te zuma zin he menusiyà, deyzey ke ed-engkezan din is kandin he ketau wey sikandin mehimu he etew he kenà metau sumalà is ked-isipa kandin te menge etew. Ne human egkehimu sikandin he metau iyan he venar.

2 Kurintu 4:4

Kenè dan edtuu su mid-elangan is isip dan ni Setanas he iyan ed-ezapen te menge etew kayi te kelibutan. Tenged kayi kenà egketeyawan is isip dan te Meupiya he Tudtulanen mehitenged te utew kegkelavew ni Kristu. Pinaag̵i ki Kristu egkesayud ki ke hentei is Megbevayà su iyan sikandin dagwey te Megbevayà.

Gelasya 1:4

Si Kristu, imbelavag din is untung din su wey mepalis is menge salè tew su wey kiw melibri, ne kenè tew meiringi is menge etew he ed-ulaula te mezaat te g̵untaan he timpu kayi te kelibutan. Umba mibeelan heini ni Kristu su edtumanen din is egkesuatan te Amey tew he Megbevayà.

Ipisu 2:2

Dutun he timpu mid-ikul niw is mezaat he ibayà he iyan ed-ikulen te menge etew he kuntada te Megbevayà. Midtuman kew te menge sug̵ù ni Setanas. Iyan sikandin ebayàbayà te menge zuen din gehem diyà te hewhewanan. Iyan daan sikandin ebayàbayà te langun he kenà ebpemineg te menge sug̵ù te Megbevayà.

1 Timoteo 6:17

Is menge tumutuu he mezakel is menge azen dan, keg̵iyi nu he kenè dan mebpelavew wey kenè dan medsarig te menge azen dan su kenè ta egketuenan ke keenu ki egkeewai te menge azen ta. Keg̵iyi nu he iyan dan serig̵i is Megbevayà su iyan sikandin metulanged. Is minsan hengkey he naazen ta, imbeg̵ey zin kenita wey mebmeupiya is kebpekesavuk ta.

2 Timoteo 4:10

su mid-ewaan a ni Dimas tenged te iyan egkenug̵unan din is untung din dini te kelibutan. Midhendiyà sikandin te Tiselunika. Ne si Krisinti, midhendiyà te Gelasya, ne si Tito zaan, midhendiyà te Delmasya.