Mateo 12:46 - Manobo Western Bukidnon

⁴⁶ Ne te kemulu pa ebpekidlalag si Jesus dutun te menge etew, nekeuma is iney zin wey menge hazi zin he maama. Ne edtag̵ad dan ki Jesus diyà te g̵awas su zuen egkeg̵iyen dan kandin.

Mateo 12:46 Кръстосани препратки

Mateo 1:18

Iyan heini g̵ug̵ud te keag̵i te ked-enaka ki Jesu Kristu. Nekeg̵unan is iney zin si Maria te maama he egngezanan ki Jose. Iyan, te wazè dan pa meked-esawa, netuenan ni Maria he meg̵ingey sikandin pinaag̵i te g̵ehem te Wag̵as he Mulin-ulin.

Mateo 12:47

Ne migkeg̵iyan si Jesus te etew zutun te, “Ahaa nu is iney nu wey menge hazi nu zutun su zuen dan kun egkeg̵iyen kenikew.”

Mateo 13:55

Anak dà sikandin te pandey. Ne si Maria is iney zin; ne menge hazi zin, ensi Santiago, si Jose, si Simon, wey si Hudas.

Mateo 2:11

Ne hein midseled dan dutun te valey neehè dan haazà is batà wey is iney zin he si Maria. Ne midluhud dan su ed-ezapen dan haazà is batà. Ne zutun impelepew zan is menge kavan he zutun itagù is ketig̵eyunan dan ne mibeg̵ayan dan sikandin te vulawan wey menge mahal he mehemut he beyewà wey mira.

Mateo 2:20

“Enew kad, Jose, ne uwita nu heeyan is batà wey is iney zin ne ulì kew ziyà te tanà he Israyil su minatey en sikan is edhimatey pezem keniyan te vatà.”

Marcos 2:21

Ne zutun insempità ni Jesus is kenà kebpeked-amur te veg̵u he penurù din wey te zaan he tuluuwen. Ke sikandin te, “Is beg̵u he manggad he wazè pa megkenseng, kenà meupiya he idapi ziyà te kumbalà he merunut en he manggad su emun ebpìpian, egkenseng haazà is beg̵u ne egkevindas is merunut en he manggad ne tuwas pa he meluag is kegkevindas din.

Lucas 1:43

Maan buwa is utew a ingkeg̵ag̵ew te Megbevayà su maan is ebpenumbelayan a kenikew te iney te mibpilì he hadì?

Lucas 2:33

Ne haazà is ginikanan dutun te vatà, utew zan nengeinuinu kayi te migkag̵i ni Simeon mehitenged dutun te anak dan.

Lucas 2:34

Ne in-ampù daan sikandan ni Simeon he tuvazi sikandan te Megbevayà ne migkeg̵iyan din si Maria, sikan is iney zuen te vatà te, “Heini is anak nu, nepilì sikandin te Megbevayà su wey pinaag̵i kandin mevahinbahin kiw is menge kevuwazan ni Israyil. Ne is edsundan kandin ne egkelibri, ne sikan is kenà edsundan, ne edsilutan te Megbevayà. Egketuusan he sugù sikandin te Megbevayà, iyan, edsumpeliten sikandin te mezakel he menge etew,

Lucas 2:48

Ne si Maria wey si Jose, utew zan neinuinu hein neturedu zan sikandin diyà te simbahan ne migkag̵i is iney zin te, “Mama, maan is mid-ulaula nu kenami heini is utew zey igkeseeng? Su is amey nu wey siak, ne utew key neipeng is ebpen-ahà kenikew.”

Lucas 2:51

Miduma kandan si Jesus te ed-ulì diyà te Neserit su mepezumdumahan sikandin te g̵inikanan din. Ne wazà melipati te iney zin haazà is langun he neulaula, kekenà, netipig̵an diyà te isip din.

Lucas 8:10

Ne midtavak si Jesus te, “Sikan is in-eles dengan mehitenged te kedhadì te Megbevayà, ibpesavut ku en keniyu te menge sumusundan ku, iyan, is menge zuma he menge etew he kenè dan edsundan kedì, ibpenurù ku kandan pinaag̵i te menge sempità su wey minsan edtengteng dan, kenè dan ebpekeahà ne minsan ebpemineg dan ne kenè dan ebpekesavut.”

Juan 19:25

Ne zutun te uvey te krus ni Jesus, edhithitindeg is iney zin ne zutun daan sikan is suled he vahi te iney ni Jesus, wey si Maria kes esawa ni Kelupas, wey elin daan si Maria Megdelina.

Juan 2:1

Ne nekezuwa zutun duen eseweey ziyà te inged he Kana he ziyà te prubinsya he Geliliya, ne midtelavuk is iney ni Jesus.

Juan 2:12

Neiwas haazà, si Jesus wey is iney zin wey menge suled din wey is menge sumusundan din, midhendiyè dan te inged he Kepirnaum ne wazè dan med-awà dutun seled te nepipira he andew.

Juan 2:5

Ne is iney zin, migkeg̵iyan din is menge sulug̵uen te, “Tumana niw is minsan hengkey he sug̵ù din keniyu.”

Juan 7:10

Ne hein migenat en haazà is menge hazi zin he ebpemenelavuk dutun te pista, midtelukun si Jesus, asal wazà mebpekiduma te mezakel he menge etew su kenè din egkesuatan he metueni.

Juan 7:3

Ne migkeg̵iyan si Jesus te menge hazi zin, ke sikandan te, “Deyzey ke ed-awè ka kayi ne telavuk ka te pista ziyà te prubinsya he Hudiya su wey maahà te menge sumusundan nu ziyà is menge egkein-inuwan he ebeelan nu.

Juan 7:5

(Iyan heini menge lalag he idsumpalit dan kandin su minsan pa te menge hazi zin sikandan, wazè dan sikandin tuuwi.)

Nengeulaula 1:14

Is langun kandan, nesevaha is gehinawa zan te ked-ampù diyà te Megbevayà ne midtampu zaan is menge vahi. Elin dutun si Maria sikan is iney ni Jesus wey is menge hazi ni Jesus.

1 Kurintu 9:5

Ne mezaat be zaan ke ed-iringan ku is menge zuma he epustul wey is menge hazi ni Jesus wey si Pedro zaan su pudu zan duen esawa he tumutuu he edumahan dan ke edhipanew zan? Kenà daan mezaat.

Gelasya 1:19

Ne neehè ku zaan dutun si Santiago, sikan is hazi te Nengazen tew he si Jesus, ne wazà duma he epustul he neehè ku zutun, iyan dà sikandan is dezuwa.