Mateo 12:45 - Manobo Western Bukidnon

⁴⁵ Ne zutun edlikù edhipanew su ebpengakat te pitu he zuma zin he menge mezaat he mulin-ulin he tuwas pa he memezaat kenà sikandin. Ne ed-ahuk dan ne ed-ubpè dan dutun te etew. Ne zutun ed-iseg pa ebmezaat is kebpekesavuk dutun te etew kenà te nehuna he kebpekesavuk din. Iring dutun is egkeulaula te menge etew g̵untaan su ed-iseg ebmezaat is kebpekesavuk dan.”

Mateo 12:45 Кръстосани препратки

Mateo 12:24

Ne zuen menge Perisiyu zutun ne hein nezineg dan haazà migkag̵i zan te, “Umba zuen gehem din he ebpekeulì te edlelungen te mezaat he mulin-ulin su iyan mibeg̵ey kandin te g̵ehem si Endedaman, sikan is egalen te menge mezaat he mulin-ulin.”

Mateo 12:44

egkag̵i si kandin te, ‘Edlikù a nasì diyà te neubpaan ku.’ Ne edlikù ne egkeehè din haazà is neubpaan din he wazà tag̵ù ne midtines en is menge vutang dutun ne nepurung melumpiyuwi.

Mateo 17:21

Iyan, sikan he kelasi te mezaat he mulin-ulin, igkepaawà pinaag̵i zà te ked-ampù wey pinaag̵i te kedsalang te kegkaan. Wazà duma he paag̵i.”

Mateo 23:15

Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Edlayun kew te zag̵at ne edhipenawen niw is meluag he tanà wey niw mekabig is etew; ne is egkekabig niw, edhimuen niw he tuwas pa he zait sikandin he edsilutan diyà te Impirnu, kenà sikiyu.

Mateo 23:24

Iring kew te lakap he ed-ag̵ak te sengelelakap. Kenè niw egkeaku te ebaal is utew zeisey he salà, iyan, egkeekuwan niw mulà te ebaal is utew zekelà he salà.

Marcos 16:9

Ne te meselem pa utew zutun te andew he Duminggu hein nevanhew en si Jesus, midhuna sikandin mebpaahà diyà te ki Maria Megdelina, sikan is bahi he mibpeg̵uwaan din dengan te pitu he mezaat he mulin-ulin.

Marcos 5:9

Ne mid-insaan ni Jesus haazà is etew te, “Hentei is ngazan nu?” Ne midtavak dutun haazà is mezaat he mulin-ulin te, “Iyan ngazan ku si Liblibuwen su utew key mezakel is nemenuuk kayi te etew.”

Lucas 11:26

Ne zutun edlikù edhipanew su ebpengakat te pitu he zuma zin he menge mezaat he mulin-ulin he tuwas pa he memezaat kenà sikandin. Ne ed-ahuk dan ne ed-ubpè dan dutun te etew. Ne zutun ed-iseg pa ebmezaat is kebpekesavuk dutun te etew, kenà te nehuna he kebpekesavuk din.”

Ipisu 6:12

Su kenà iyan edtebeken tew is menge etew zà duen, kekenà, iyan edtebeken tew is menge mezaat he kedesenan he ziyà ed-ubpà te langit wey is menge kenà egkeahà he hadì, wey menge egalen, wey menge ebayàbayà te langun he menge mezaat he etew he nesakup te kerusireman guntaan dini te kelibutan.

Hibriyuhanen 10:39

Iyan, sikitew, menge suled, kenè kiw iring te menge etew he edsuwey ne edsilutan sikandan te Megbevayà su mezesen mulà is kedtuu tew ne pinaag̵i kayi nelibri kiw en te silut.