Marcos 9:31 - Manobo Western Bukidnon

³¹ su wey kenà sikandin mesemuki is ebpenurù te menge sumusundan din. Ne ke sikandin diyà te kandan te, “Siak is Kakey te Menusiyà, duen timpu he ibpalad a ziyà te menge kuntada ku ne edhimetayan e zan, iyan, seled te tetelu he andew zutun egkevanhew a.”

Marcos 9:31 Кръстосани препратки

Mateo 16:21

Ne puun dutun impesavut din te menge sumusundan din is imbanglis kandin. Ke sikandin te, “Kinahanglan he edhendiyà a te Hiruselim ne utew merasey is ed-ul-ulahan kedì te menge ebmeg̵urangen te menge Hudiyu, menge punuan he memumuhat wey menge menunudlù te kesug̵uan. Edhimetayan e zan ne seled te tetelu he andew zutun, egkevanhew a.”

Mateo 20:28

Su iring te siak, is Kakey te Menusiyà, kenà iyan inhendini ku te kelibutan is wey a metevangi te menge etew, kekenà, wey a meketavang ne wey a zaan mekepehimatey wey ku mevelukasi is mezakel he menge etew.”

Mateo 26:2

“Netuenan niw he mekezuwa zà guntaan ne egketuman en sikan is pista he egngezanan te Pista te Kedlevayi. Ne zutun, siak is Kakey te Menusiyà, ibpalad a ziyà te menge etew wey e zan ikeransang te krus,” ke sikandin.

Mateo 27:63

Ne ke sikandan diyà te kandin te, “Datù, netenuzan dey he migkag̵i zuen te teruen he etew hein uuyag pa, he emun ebpatey, egkevanhew zed seled te tetelu he andew.

Marcos 10:34

Ne is menge etew he kenà menge Hudiyu, ed-iringen e zan te velvelayen; ebpengilevan e zan, ne ebug̵elen e zan ne edhimetayan e zan ne seled te iketelu he andew zutun ebenhawen a te Megbevayà.”

Marcos 8:31

Ne zutun impesavut ni Jesus te menge sumusundan din is imbanglis kandin. Ke sikandin te, “Siak is Kakey te Menusiyà, mezakel is menge kemeresayan he ibpaantus kediey. Edsumpeliten a te menge ebmeg̵urangen te menge Hudiyu wey te menge punuan he memumuhat wey te menge menunudlù te kesug̵uan. Edhimetayan e zan ne seled te tetelu he andew zutun egkevanhew a.”

Marcos 9:12

Ne midtavak si Jesus te, “Tutuu iyan he edhuna ebpekeuma si Elias su ed-endamen din is langun, iyan, maan is netagnà dengan dutun te ingkesurat he Lalag te Megbevayà he siak is Kakey te Menusiyà, mezakel is memerasey he egkeantus ku ne edsumpeliten a.

Lucas 24:26

Su kinahanglan he ebpekeag̵i pa te kemeresayan sikan is hadì he mibpilì te Megbevayà ne human ibeg̵ey kandin is kebayàbayà te minsan hengkey.”

Lucas 9:44

“Kenè niw lipati heini is egkeg̵iyen ku keniyu, duen timpu keuzemà he siak is Kakey te Menusiyà, ibpalad a ziyà te menge kuntada ku,” ke sikandin.

Juan 10:18

Wazà a teg̵ela te minsan hentei he etew su ebpehimatey a te kediey he g̵ustu. Kediey zà he ketenged is kebpehimatey ku, ne kediey zà daan he ketenged is kebenhawa kediey su insug̵ù heini kediey te Amey ku he Megbevayà.”

Juan 2:19

Ne midtavak si Jesus te, “Rundusa niw heini is baley te Megbevayà ne seled te tetelu he andew egkevangun ku en maan!”

Juan 3:14

Ne mid-uman megkag̵i si Jesus te, “Dengan te kemulu pa ensi Moises diyà te tanà he wazà duen ed-ubpà he etew mibeelan din is uled he g̵alang ne intaud din te kayu ne imbayew zin. Siak is Kakey te Menusiyà, iring din ded daan is egkehitavù kedì keuzemà su idtaud a zaan te kayu ne ibayew a.

2 Timoteo 2:12

Ke ed-antus ki te kemeresayan ebpekehadì ki keuzemà duma kandin. Iyan, ke egkag̵i ki he kenè ki g̵aked din egkag̵i zaan sikandin keuzemà he kenè ki iyan gaked din.