Marcos 7:4 - Manobo Western Bukidnon

⁴ Ne emun ebpekeulì dan he ebpuun te mirkadu ne ebpirikan dan edhunai te wahig is lawa zan ne human dan egkaan. Ne mezakel pa is neleyaman dan he tuluuwen iring te kebpenlùlù te menge inumà wey menge kuzen wey menge edtengelan he g̵alang.

Marcos 7:4 Кръстосани препратки

Mateo 23:25

Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Ebpurungan niw ebentayi is menge vetasan niw, iyan, diyà te isip niw wey g̵ehinawa niw ne zuen keheheramham wey kelelalung. Iring kew te vasu wey pinggan he nelumpiyuwan diyà te g̵awas, iyan, meremerik is diyà te seled.

Mateo 23:26

Iring kew te lakap is menge Perisiyu! Lumpiyuwi niw hunai is idseled niw zutun ne human egkelumpiyu is tasa niw wey pinggan niw.

Mateo 27:24

Ne zutun nesavut ni Pilatu he wazè en pulus te menge lalag din su ebpuunè en edsinamuk is menge etew, ne tenged dutun, migkuwa sikandin te wahig ne mibpenlùlù te velad din dutun te etuvangan te menge etew, ne ke sikandin te, “Keniyu he salà heini. Is lengesa kayi te etew, ne ziyè dà te keniyu he velad; lumpiyu is kedì.”

Marcos 7:8

Is kesug̵uan te Megbevayà,” ke si Jesus, “midlipatan niw en, ne iyan niw edtumanen is imbilinbilin he vetasan he midhimuhimu zà te menge etew.”

Juan 2:6

Sumalà te tuluuwen te menge Hudiyu, kinahanglan he zuen wahig he ibpenlùlù te kenè dan pa egkaan. Ne tenged kayi zuen neteg̵ana zutun he heenem he umuy he vatu. Egketeg̵uan is kada sevaha zutun te menge nenggatus he litru he wahig.

Juan 3:25

Ne zutun duen menge sumusundan ni Juan he ebpekidlewanà te sevaha he etew he Hudiyu. Iyan edlewenaan dan is tuluuwen dan te menge Hudiyu te kebpemewtismu.

Hibriyuhanen 9:10

Su heini he paag̵i te ked-ezapa te Megbevayà, ne pinaag̵i zà te menge sug̵ù mehitenged te vetasan te kegkaan, ked-inum, kebpenlùlù, wey kedhemesa te lawa he paag̵i he insug̵ù te Megbevayà. Menge sug̵ù heini he edtumanen te menge etew pinaag̵i zà te lawa wey tenged dà te insug̵ù ne kenà tenged te iyan diyà te g̵ehinawa zan. Ne is pulus kayi te paag̵i, ne taman dà heini kayi te timpu g̵untaan te ked-ilisi te Megbevayà kayi te veg̵u he paag̵i.

Santiago 4:8

Aput kew ziyà te Megbevayà ne ed-uvayan kew zin. Sikiyu is mekesesalà, engkezi niw is menge ulaula niw he mezaat. Sikiyu is uvag dà is kedtuu zan, pelumpiyuwi niw te Megbevayà is isip niw wey g̵ehinawa niw.

1 Juan 1:7

Emun merayag mulà is ibayè tew iring te merayag is Megbevayà, he ke và dà egkeg̵iya, emun mibpesakup kiw te Megbevayà, egkeupakat kiw ne layun kiw edlumpiyuwi te minsan hengkey he salè tew pinaag̵i te kebpelisi kenitew te lengesa ni Jesus he Anak te Megbevayà.