Marcos 6:15 - Manobo Western Bukidnon

¹⁵ Ne migkag̵i is duma te, “Iyan si Jesus sikan is ebpeneuven dengan he si Elias.” Ne migkag̵i is duma pa te, “Ebpeneuven iyan si Jesus he iring te menge tipehuna he ebpeneuven dengan te Megbevayà,” edhenduen dan.

Marcos 6:15 Кръстосани препратки

Mateo 16:14

Ne midtavak dan te, “Is duma, ne iyan ke kun si Juan Megbebewtismu he nevanhew. Ne is duma, ke sikandan te, iyan ka si Elias. Ne egkag̵i is duma pa te si Jeremias ka, ne emun kenà, ne sevaha ka zuen te ebpemeneuven dengan te Megbevayà.”

Mateo 21:11

Ne midtavak is mezakel he menge etew he nemenduma ki Jesus te, “Iyan sikandin sikan is ebpeneuven te Megbevayà he si Jesus he tigNeserit diyà te Geliliya.”

Marcos 6:16

Iyan, hein nezineg ni Hadì Hirudis haazà is egkeg̵iyen dan, kunaan din ke nevanhew si Juan, ne ke sikandin te, “Heini si Jesus, ne iyan ded si Juan Megbebewtismu he mibpepungelan ku te ulu ne nevanhew sikandin.”

Marcos 8:28

Ne midtavak dan te, “Duen egkag̵i he iyan ka si Juan Megbebewtismu he nevanhew ne zuen daan egkag̵i he iyan ka sikan is tipehuna he si Elias, ne egkag̵i is duma pa he sevaha ka zuen te menge tipehuna zengan he ebpeneuven te Megbevayà.”

Lucas 1:17

Heini is anak nu, edsug̵uen sikandin he ibpehuna te kebpekeuma te Nengazen ne ed-ulinan sikandin te Wag̵as he Mulin-ulin iring te ked-ulini zengan te Megbevayà te ebpeneuven he si Elias. Ne is gehem din, ne iyan ded sikan is gehem ni Elias dengan. Ne pinaag̵i te menge penurù kayi te anak nu egkehimu zutun he ebpeked-uuliey te meupiya he g̵ehinawa is menge amey wey te menge anak dan. Is menge etew he wazà mebpezumazuma te menge sug̵ù te Megbevayà, pinaag̵i te penurù kayi te anak nu ebpekedsendit dan ne zutun metazeng human is ed-isipen dan. Ne pinaag̵i kandin mezakel he menge etew is ed-endaman dan is kebpekeuma te Nengazen,” lalag te velinsug̵uen.

Lucas 7:16

Ne is langun he nemekeahà dutun, ne utew zan nengehandek ne nezalig dan is Megbevayà, ke sikandan te, “Heini en te kenitew is utew lavew he ebpeneuven te Megbevayà!” Ne ke sikandan daan te, “Mibulus en is Megbevayà su wey kiw melibri is menge nengepilì din he etew!”

Lucas 7:39

Ne naahà heini zutun te Perisiyu he mid-umbita ki Jesus, ne neisip din is, “Angin ke tutuu he ebpeneuven heini te Megbevayà ne kenà ebpekeeles kandin is meremerik he ulaula kayi te vahi ne wazè din pezem itug̵ut he meg̵ewezi is lawa zin kayi te vahi.”

Lucas 9:19

Ne midtavak dan te, “Iyan ke kun si Juan Megbebewtismu he nevanhew, ne zuen daan egkag̵i te iyan ka si Elias, ne zuen pa egkag̵i te sevaha ka zuen te menge tipehuna he ebpeneuven te Megbevayà.”

Lucas 9:8

Ne zuen daan egkag̵i he mibpeetew mebpeuman si Elias, kes ebpeneuven dengan te Megbevayà, ne iyan en si Jesus. Ne zuen daan egkag̵i he nevanhew is sevaha zuen te menge ebpeneuven dengan ne iyan si Jesus.

Juan 1:21

Ne ke sikandan te, “Iyan ke ve kes ebpeneuven dengan he si Elias?” Ne ke si Juan te, “Kenà a zaan.” Ne ke sikandan te, “Kela ke iyan ka sikan is netagnà he mibpenaub te Megbevayà?” Ne ke si Juan te, “Kenà a zaan.”

Juan 1:25

Mid-insè dan en maan te, “Emun kenè ka iyan sikan is mibpilì te Megbevayà wey mekehadì, ne kenè ka zaan si Elias, wey kenè ka sikan is netagnà he ebpeneuven, maan is ebpemewtismu ka te menge etew?”

Juan 6:14

Ne hein naahà te menge etew is egkein-inuwan he nehimu ni Jesus migkag̵i zan te, “Tutuu ves iyan he iyan en heini sikan is netagnà he ebpeneuven te Megbevayà he ibpehendini zin te kelibutan!”

Juan 7:40

Nezineg haazà is menge lalag ni Jesus te utew mezakel he menge etew zutun, ne migkag̵i is duma te, “Tutuu iyan he iyan heini he etew sikan is ebpeebuten tew he netagnà he ebpeneuven te Megbevayà!”

Juan 9:17

Ne tenged dutun mid-insaan dan en maan haazà is neulian he lakap, ke sikandan te, “Sikew, hengkey is kenikew he isip mehitenged kandin su kenikew he menge mata is mibewian din?” Ne midtavak haazà is etew te, “Ebpeneuven sikandin te Megbevayà.”