Marcos 5:7 - Manobo Western Bukidnon

^7-8 Ne si Jesus, migkeg̵iyan din haazà is mezaat he mulin-ulin te, “Awè ka keniyan te etew!” Ne zutun nengulahì haazà is etew he ke sikandin diyà te ki Jesus te, “Ey! Sikew is anak te utew lavew he Megbevayà, ebmenuwen a kenikew? Edhengyuen ku kenikew he peserig̵a a kenikew he kenè e pa kenikew siluti su kayi ki te etuvangan te Megbevayà!”

Marcos 5:7 Кръстосани препратки

Mateo 16:16

Ne zutun midtavak si Simon Pedro te, “Iyan ka sikan is mibpilì te Megbevayà he ibpahadì din te menusiyà; iyan ka sikan is Anak te wazè din kemetayen he Megbevayà.”

Mateo 26:63

Ne wazà medtavak si Jesus. Ne mid-uman megkag̵i haazà is lavew he memumuhat te, “Tangdù ka su kayi ka te etuvangan te Megbevayà he wazè din kemetayen. Emun iyan ka sikan is Anak te Megbevayà, sikan is mibpilì din he ibpahadì, keg̵iya nu,” ke sikandin.

Mateo 4:3

Ne zutun mid-uvayan ni Setanas si Jesus ne mibpenuley zin he egkag̵i te, “Emun tutuu iyan he Anak ka te Megbevayà pengelinteuwi nu he mevaluy he egkeenen heini is menge vatu.”

Mateo 8:29

Ne mibensag̵an dan si Jesus, ke sikandan te, “Sikew is Anak te Megbevayà, edsilutan key ve kenikew te wazè pa meuma is midtelaan he timpu?”

Marcos 1:24

Ne hein neehè din si Jesus, mibensag sikandin is egkag̵i te, “Sikew, Jesus he tigNeserit, hengkey is lavet nu kenami te menge mulin-ulin? Kela ke iyan inhendini nu is edezeetan key kenikew. Egkekilala ku sikew; iyan ka kes hadì he mibpilì te Megbevayà!”

Marcos 14:61

Ne wazà si Jesus medtavak. Ne mid-uman megkag̵i haazà is lavew he memumuhat te, “Iyan ke ve kes mibpilì he ibpahadì he Anak te Megbevayà?”

Marcos 3:11

Ne is menge mezaat he mulin-ulin, hein neehè dan si Jesus, ne nemenluhud sikandan diyà te etuvangan din is ebpemengulahì he egkag̵i te, “Iyan ka iyan kes Anak te Megbevayà!”

Marcos 5:6

Ne hein nepentawan dutun he etew si Jesus diyà te meziyù, mibpelelag̵uy is edsinug̵ung ki Jesus ne mid-azap kandin.

Lucas 1:32

Utew zekelà is pid-etawan din ne egkengezanan sikandin he Anak te utew lavew he Megbevayà. Ne edhimuwen te Nengazen he Megbevayà he edhadì heini is id-anak nu iring te kedhadì dengan te kepuun din he si David.

Lucas 4:34

“Sikew, Jesus he tigNeserit, hengkey is lavet nu kenami te menge mezaat he mulin-ulin? Kela ke iyan inhendini nu is edezeetan key kenikew. Egkekilala ku sikew; iyan ka sikan is hadì he mibpilì te Megbevayà!”

Lucas 6:35

Iyan penurù ku keniyu is: kenà imezaat te g̵ehinawa niw is menge kuntada niw, kekenà, meupiya is ul-ulaha niw ziyà te kandan. Ke zuen etew he ed-utang keniyu, kenè niw itag̵ù diyà te g̵ehinawa niw he kinahanglan he beyazi kew zin. Emun edtumanen niw heini, igkepeehè niw he menge anak kew te utew lavew he Megbevayà. Ne utew zekelà is suhul zin keniyu su minsan is menge etew he memezaat is ulaula wey is menge kenà ebpeselamat kandin, egkehizuwan din sikandan gihapun.

Juan 20:31

Ne iyan insurata ku kayi te menge egkein-inuwan su wey kew meketuu he iyan si Jesus Anak te Megbevayà wey sikan is mibpilì te Megbevayà he ibpahadì, ne emun edtuu kew kandin ebeg̵ayan kew te untung he wazà pidtemanan.)

Nengeulaula 16:17

Ne miduma kenami ki Pablo haazà is bahi he ebpengulahì te, “Heini is menge etew, menge sulug̵uen sikandan te lavew he Megbevayà. Ibpesavut dan keniyu is paag̵i wey kew melibri te idsilut din.”

Nengeulaula 19:13

Ne zuen menge Hudiyu he ebpenhipanew su ebewian dan is menge etew he edlelungen te mezaat he mulin-ulin. Ne neisip dan is egezaman dan ebewii is edlelungen te mezaat he mulin-ulin he egemiten dan is ngazan ni Jesus. Ne migkeg̵iyan dan is mezaat he mulin-ulin te, “Pinaag̵i te g̵ehem te ngazan ni Jesus he idsangyew ni Pablo, ewai nu en heeyan he etew.”

Nengeulaula 8:36

Ne netegteg̵aad dutun nekeuma zan te wahig, ne migkag̵i haazà is upisyal te, “Wahig en heini; egkehimu ve ke ebewtismuwan a kenikew?”

Ruma 16:20

Ne emun iyan heini egkehitavù, is Megbevayà he iyan puunà te kelinew, meg̵aan din en edhimuwa he mepurung niw mezaag si Setanas. Berakat he ikeg̵ag̵ew kew te Nengazen tew he si Jesu Kristu.

Hibriyuhanen 2:14

Ne sikitew is menge anak te Megbevayà, menge etew kiw zà duen he zuen din kemetayen. Ne tenged kayi mibpeetew zaan si Jesus wey mehimu sikandin he iring tew. Umba mid-ulaula zin heini su wey mehimu he ebpehimatey sikandin ne wey pinaag̵i te kebpatey zin mezaag din si Setanas he iyan mibayàbayà te kemetayen,

Hibriyuhanen 7:1

Su heini si Milkisidik, ne hadì sikandin dengan te inged he Selim, wey memumuhat sikandin he ed-azap te lavew he Megbevayà. Ne zuen timpu zutun he si Abraham, mibpekidtebek te menge hadì he kuntada zin ne mibpenhimetayan din. Ne zutun te ked-ulì ni Abraham, midsinug̵ung sikandin ni Milkisidik, ne migkag̵i ni Milkisidik pinaag̵i te kebpenuvadtuvad he edtuvazan si Abraham te Megbevayà te meupiya he tuvad.

Santiago 2:19

Emun midtuu ki he sebsevaha zà is Megbevayà utew meupiya heeyan, iyan, kenè pa hustu su minsan is menge mezaat he mulin-ulin, midtuu zan daan te iring keniyan, iyan, egkerkeren dan te kegkehandek su netuenan dan he edsilutan sikandan keuzemà.

2 Pedro 2:4

Su wazà pesegdana te Megbevayà minsan is menge velinsug̵uen din dengan he nekesalà, kekenà, intimbag din diyà te Iveyaan. Ne ziyè dan pa te utew merusirem he mibakus te kedina su idtag̵ad sikandan taman te andew te kedsilut.

1 Juan 3:8

Ke zuen etew he layun ed-ulaula te mezaat ne sakup sikandin ni Setanas su layun daan si Setanas ed-ulaula te mezaat puun pa te kedlimbag̵a te kelibutan. Umba midhendini te kelibutan is Anak te Megbevayà su wey zin ikeawà is gehem te menge ulaula ni Setanas.

Hudas 1:6

Isipa niw zaan is menge velinsug̵uen din dengan diyà te langit. Mid-engkezan dan is ketengdanan he imbeg̵ey zin kandan ne mid-ewaan dan is hustu he ed-ubpaan dan. Tenged dutun mibpirisu zin sikandan diyà te utew merusirem. Mibakus din te kedina he kenà egkezeetan te wazà pidtemanan su idtag̵ad sikandan taman te kenè pa egkeuma is andew keuzemà te kedsiluti zin kandan.

Impezayag 12:12

Sikiyu is menge meg̵inged diyà te langit, medlipey kew. Iyan, sikiyu is diyan te tanà wey ziyan te zag̵at, kehizu niw! Su kes mezaat he mulin-ulin he si Setanas, mibpenaug en diyan te keniyu. Ne utew sikandin nererengiti su netuenan din he mevavè dà utew is nesamè din he timpu te kedlalunglalung.”