Marcos 4:8 - Manobo Western Bukidnon

⁸ Ne zuen daan benì dutun he ziyà mengeulug te meupiya he tanà ne haazà, midtuvù, ne midekelà ne nemeg̵as mulà. Duen dutun menge pinemula he mibeg̵as te tigketluan, ne zuen daan mibeg̵as te tigkeneman. Ne zuen daan mibeg̵as te tignenggatus.”

Marcos 4:8 Кръстосани препратки

Mateo 13:23

Ne sikan is benì he ziyà mengeulug te meupiya he tanà, ne iyan is Lalag te Megbevayà he is nemekezineg duen, nesavut dan, ne ebpulus diyà te kandan. Is duma, ne ebpulus te zeisek diyà te kandan; ne is duma, ne ebpulus te malù dekelà; ne is duma, ebpulus te utew zekelà diyà te kandan.”

Mateo 13:8

Ne zuen daan benì he ziyà mengeulug te meupiya he tanà ne nemeg̵as mulà heini. Duen dutun menge pinemula he mibeg̵as te tigketluan. Ne zuen daan dutun menge pinemula he mibeg̵as te tigkeneman. Ne zuen daan dutun pinemula he mibeg̵as te tignenggatus.”

Marcos 4:20

Ne sikan is benì he ziyà meketanà te meupiya he tanà, iyan is Lalag te Megbevayà he nezineg te menge etew ne midtuu zan; ne is Lalag te Megbevayà, ne ebpulus diyà te kandan. Is duma, ne ebpulus te zeisek diyà te kandan, ne is duma, ne ebpulus te malù dekelà, ne is duma, ne ebpulus te utew zekelà diyà te kandan.”

Marcos 4:7

Ne zuen daan dutun benì he nengeulug diyà te tanà he menge zug̵iyen is menge sagbet dutun. Ne mibmemelayat haazà is sagbet ne mibpengulembezan haazà is menge pinemula ne wazà mekepemeg̵as.

Marcos 4:9

Ne mid-uman megkag̵i si Jesus te, “Kinahanglan he sevuta niw heini is nezineg niw.”

Lucas 8:15

Ne haazà is benì he ziyà mengeulug te meupiya he tanà, ne iyan egkeg̵iyen dutun is Lalag te Megbevayà he nezineg te menge etew ne midawat dan, ne midtuman dan haazà, ne mibpeniguduwan dan te edtuman taman te mibpulus te zekelà is Lalag te Megbevayà diyà te kandan.”

Lucas 8:8

Ne zuen daan benì din he ziyà mengeulug te meupiya he tanà ne midtuvù ne mibpemeg̵as mebpurung te tignenggatus.” Ne ke si Jesus te, “Sevuta niw heini is nezineg niw.”

Juan 15:5

Su iyan a sikan is lawa ne iyan kew menge subpang ku. Is etew he kenà edsuwey kedì iring te kenà a zaan edsuwey kandin, iyan ebpekepenigudu ebpekepemeg̵as. Wazà egkehimu niw ke ebpekesuwey kew kediey.

Juan 7:17

Is etew he egkesuat he edtuman te ebpeveelan te Megbevayà, iyan egkesayud ke ziyè be ebpuun te Megbevayà is ibpenurù ku wey ke zini zè be ebpuun te isip ku.

Nengeulaula 17:11

Ne zeyzey is menge Hudiyu zutun te Biriya kenà te menge Hudiyu ziyà te Tiselunika su memetulanged dan mulà. Ne utew zan egkesuat he ebpemineg te impesavut kandan. Ne kada andew edsusiyen dan is insurat he Lalag te Megbevayà su ed-ahaan dan ke tutuu ve iyan haazà is ibpenurù eni Pablo.

Ipisu 2:21

Ne pinaag̵i ki Kristu nevig̵eran is kebeeli kayi te valey ne egkehimu heini he valey te Nengazen he zutun sikandin ed-ezapa.

Pilipus 1:11

Ne zutun egkeveelan niw is minsan hengkey he metazeng he ulaula tenged te g̵ehem he ibeg̵ey ni Jesu Kristu su wey mezalig wey mevantug is Megbevayà.

Kulusas 1:6

Heini is migkag̵i he Meupiya he Tudtulanen, pinaag̵i te kedtuu kayi, mezakel en he menge etew ziyà te minsan hendei he inged is mibmeupiya is menge ulaula zan. Ne kenà duen dà taman su ed-iseg ebmezakel is menge tumutuu pinaag̵i te Meupiya he Tudtulanen, iring te layun daan ed-iseg ebmezakel is menge tumutuu ziyan te keniyu puun pa zutun te andew zengan he nezineg niw is tudtul te g̵ag̵ew kenitew te Megbevayà wey netuenan niw he venar iyan.