Marcos 3:8 - Manobo Western Bukidnon

⁸ wey ziyà te inged he Hiruselim, wey ziyà te prubinsya he Idumiya, wey ziyà te tanà he zehipag te wahig he Hurdan wey ziyà te menge inged he siringan dutun diyà te inged he Tiru wey Sidun. Utew mezakel he menge etew is midhendiyà te ki Jesus su nezineg dan is menge tudtul mehitenged te menge egkengein-inuwan he mibeelan din.

Marcos 3:8 Кръстосани препратки

Mateo 11:21

Ne ke sikandin te, “Mekehizuhizu kew is menge tigKurasin! Mekehizuhizu kew zaan is menge tigBitsayda. Su is menge egkein-inuwan he impeehè ku ziyan te inged niw te menge Hudiyu, angin ke midhimu ku heini ziyà te menge inged he Tiru wey Sidun he kenà menge Hudiyu is meg̵inged dutun, su nekekukumbalè dan en pezem te saku ne nepen-evuwan dan is ulu zan he tuus te ed-iniyug̵an dan en is memezaat he ulaula.

Mateo 4:25

Ne tenged dutun mezakel utew he menge etew is ebpemenduma kandin. Duen dutun menge tigGeliliya, duen menge etew he ebpuun te prubinsya he Dikepulis, duen tigHiruselim, tigHudiya, wey menge etew he ziyà ebpemuun te tanà he ziyà te zapit te edsilaan te wahig he Hurdan.

Marcos 7:24

Ne mid-awà si Jesus dutun te prubinsya he Geliliya ne midhendiyà te menge inged he uvey te inged he Tiru. Ne te kebpekeuma zin dutun ne mibpemenahik diyà te sevaha he valey. Ne kenè din pezem egkesuatan he metueni te menge etew ke hendei sikandin medateng, iyan, wazà haazà iyan mehitavù is egkesuatan din su segugunà nekeeneb haazà is tudtul te kebpekeuma zin.

Marcos 7:31

Ne zutun te ked-ulì ni Jesus, ne ziyà sikandin mebayà te inged he Tiru wey ziyà te prubinsya he Dikepulis, ne human diyà te ranew he Geliliya.

Lucas 6:17

Ne hein neipus ni Jesus is kebpilia zin kandan midtupang sikandin duma haazà is nengepilì din. Midteren dan dutun te patag ne nengevurun dutun is mezakel he menge sumusundan din wey is medmezakel he menge etew he ebpemuun diyà te menge inged he sakup te Hudiya wey ziyà te inged he Hiruselim. Ne zuen daan menge etew he ziyà ebpemuun te menge inged he Tiru wey Sidun he ziyà te veyvey te zag̵at. Iyan tuyù dutun te menge etew is ebpemineg dan te kebpenurù ni Jesus wey ebpemevawì daan sikandan kandin te menge zaru zan.