Marcos 10:24 - Manobo Western Bukidnon

²⁴ Ne is menge sumusundan din, hein nezineg dan haazà is migkag̵i ni Jesus, utew zan ingkeinuinu. Ne mid-uman megkag̵i si Jesus te, “Utew mereg̵en te etew is kebpesakup din te Megbevayà wey sikandin mehedii.

Marcos 10:24 Кръстосани препратки

Mateo 19:25

Ne hein nezineg heini te menge sumusundan din utew zan neinuinu, ne ke sikandan te, “Emun kenà egkehimu te sepian, ne kenè bes egkehimu te minsan hentei is ked-angken te untung he wazà pidtemanan.”

Marcos 1:27

Ne utew nengeinuinu is langun he menge etew zutun, ne tenged dutun mibpelelelag̵è dan te, “Hengkey vuwa heini? Kela ke veg̵u en heini he tuluuwen su maan is utew sikandin mekeg̵eg̵ehem te kebayàbayà te minsan menge mezaat he mulin-ulin, ne ebpemineg kandin.”

Marcos 10:23

Ne zutun mibpenlangulangu si Jesus diyà te menge sumusundan din ne ke sikandin diyà te kandan te, “Utew mereg̵en te sepian he etew is kebpesakup din te Megbevayà wey mehedii sikandin te Megbevayà,” ke sikandin.

Lucas 16:14

Ne zuen dutun menge Perisiyu he iyan dekelà diyà te g̵ehinawa zan is selapì. Ne hein nezineg dan haazà is penurù ni Jesus ne midsumpalit dan sikandin.

Juan 13:33

Sikiyu is menge minahal ku he menge sumusundan, egketegteg̵aad dà guntaan ne egkeawaan ku en sikiyu. Ebpen-ahaan a keniyu ne iring te migkag̵i ku ziyà te menge Hudiyu, egkeg̵iyen ku zaan dini te keniyu he ke hendei a ebpevayà kenè kew ebpekezuma.

Juan 21:5

Ne migkag̵i ziyà te kandan si Jesus te, “He menge suled, duen be neutel niw?” Ne midtavak dan te, “Wazà.”

Juan 6:60

Ne hein nezineg te menge sumusundan din haazà is kebpenurù din, mezakel kandan is migkag̵i te, “Mereg̵en egkezawat heini is penurù din, ne hentei zà buwa is ebpekepemineg kayi?”

Gelasya 4:19

Henduen be te menge anak ku en sikiyu su minahal ku sikiyu. Iring te edlised is bahi ke ed-anak, egkereg̵enan a zaan te ked-isipa ku keniyu su egkesuatan ku he meg̵aan niw itug̵ut he iyan ebayàbayà keniyu si Kristu.

1 Timoteo 6:17

Is menge tumutuu he mezakel is menge azen dan, keg̵iyi nu he kenè dan mebpelavew wey kenè dan medsarig te menge azen dan su kenè ta egketuenan ke keenu ki egkeewai te menge azen ta. Keg̵iyi nu he iyan dan serig̵i is Megbevayà su iyan sikandin metulanged. Is minsan hengkey he naazen ta, imbeg̵ey zin kenita wey mebmeupiya is kebpekesavuk ta.

1 Juan 2:1

Sikiyu is iring te menge anak ku, iyan ibpesurati ku keniyu is: wey meheg̵eti is kedtuu niw wey kew kenà mekesalà. Iyan, ke zuen ebpekesalà he minsan hentei kenitew, duen datù tew he edtavang kenitew ziyà te etuvangan te Amey tew he Megbevayà. Iyan datù tew si Jesu Kristu he utew metazeng.

1 Juan 4:4

Sikiyu, menge anak ku, gaked kew en te Megbevayà ne nezaag niw en is menge teruen he mulin-ulin su lavew pa he mekeg̵eg̵ehem is Megbevayà he ziyà ed-ubpà te kenitew, kenà si Setanas he ziyà ed-ubpà te menge etew zini te kelibutan he kuntada te Megbevayà.

1 Juan 5:21

Menge anak ku, likayi niw is ked-ezapa te minsan hengkey he kenà iyan is tutuu he Megbevayà.

Impezayag 3:17

Egkag̵i kew te, “Sepian kiw ne meupiya is kebpekesavuk tew ne wazè tew en kurang te minsan hengkey.” Ne minsan pa zutun, wazè niw metueni he mekehizuhizu kew utew su egkengeayuayu kew te kedtuu; nengelakap is isip niw wey nengelevasan kew su wazè niw menge metazeng he ulaula.