Marcos 1:5 - Manobo Western Bukidnon

⁵ Ne zutun, mezakel he menge etew is midangep kandin he ebpemuun diyà te menge inged te tivuuk he prubinsya he Hudiya wey minsan is menge etew he ebpemuun diyà te inged he Hiruselim. Ne haazà he menge etew, intangdù dan is menge salè dan ne mibewtismuwan sikandan ni Juan diyà te wahig he Hurdan.

Marcos 1:5 Кръстосани препратки

Mateo 4:25

Ne tenged dutun mezakel utew he menge etew is ebpemenduma kandin. Duen dutun menge tigGeliliya, duen menge etew he ebpuun te prubinsya he Dikepulis, duen tigHiruselim, tigHudiya, wey menge etew he ziyà ebpemuun te tanà he ziyà te zapit te edsilaan te wahig he Hurdan.

Marcos 1:4

Ne netuman haazà diyà te ki Juan, sikan is migeraran ki Megbebewtismu, su ziyà sikandin te tanà he wazà duen ed-ubpà he etew ne midweliyan din daan is menge etew. Ke sikandin te, “Iniyug̵i niw is memezaat he ulaula ne mebpebewtismu kew su wey metueni he mid-iniyug̵an niw en is memezaat he ulaula niw, ne human egkepesaylu te Megbevayà is menge salè niw,” ke si Juan.

Marcos 1:6

Ne heini si Juan, kukumbalà te midhavel he vulvul te kemilyu ne vevakes te lundis he neg̵angu. Ne is keuyag̵an din ne terapan wey teneb.

Juan 1:28

Ne nehitavù heini is langun diyà te inged he Bitanya he ziyà layun te wahig he Hurdan he zutun ebpemewtismu si Juan.

Juan 3:23

Ne si Juan Megbebewtismu, ebpemewtismu zaan asal ziyà sikandin ebpemewtismu te inged he Inun he uvey te inged he Salim su mezakel is menge wahig dutun. Ne nemenhendutun is menge etew ne mibpebewtismu sikandan.

Juan 5:35

Su si Juan, iring sikandin te sulù he merayag is sig̵a zin, ne meg̵aan dà utew is kelipey niw te kedteyawi zin keniyu, he ke và dà egkeg̵iya, seled te meg̵aan dà utew kew nesuat te penurù din he tutuu.

Nengeulaula 19:18

Ne mezakel is sikan pa memeketuu zutun he mibpenudtul zan diyà te etuvangan te langun is memezaat he menge ulaula zan he ed-iniyug̵an dan.

Nengeulaula 2:38

Ne midtavak si Pedro te, “Kada sevaha keniyu, iniyug̵i zin is mezaat he ulaula zin ne mebpebewtismu wey metueni he ebpekidsevaha sikandin ki Jesu Kristu. Ne human egkepesaylu is menge salè din ne is Wag̵as he Mulin-ulin, ibeg̵ey kandin te Megbevayà.

Santiago 5:16

Ne tenged dutun kinahanglan he petudtudtulè kew te menge salè niw su wey iampù te kada sevaha is duma zin ne wey meulii is egkengezeruwan. Utew mekeg̵eg̵ehem is ked-ampù te metazeng he etew.