Marcos 1:27 - Manobo Western Bukidnon

²⁷ Ne utew nengeinuinu is langun he menge etew zutun, ne tenged dutun mibpelelelag̵è dan te, “Hengkey vuwa heini? Kela ke veg̵u en heini he tuluuwen su maan is utew sikandin mekeg̵eg̵ehem te kebayàbayà te minsan menge mezaat he mulin-ulin, ne ebpemineg kandin.”

Marcos 1:27 Кръстосани препратки

Mateo 15:31

Ne utew nengeinuinu is menge etew zutun te nengeehè dan. Su ebpekekag̵i en sikan is emew; ne neulian en sikan is pungkul; sikan is piang, ne ebpekehipanew en; ne sikan is nengelakap, ne ebpekeehè en. Ne midalig dan dutun is Megbevayà he edsimbahan dan te menge kevuwazan ni Israyil.

Mateo 8:9

Netuenan ku heini su iring te zuen ebayàbayà kedì, ne zuen daan menge sundaru he ebeyveyaan ku. Ne edsug̵uen ku is sevaha he medhipanew ne edhipanew en. Ne edtewag̵en ku is sevaha he medhendini ne edhendini en; ne edsug̵uen ku zaan is sulug̵uen ku ke zuen ebpeveelan ku ne ebeelan din en. Ne iring din ded daan diyan te kenikew su is egkeg̵iyen nu ne egkehimu en.”

Mateo 9:33

Ne mibewian heini ni Jesus, ne segugunà dutun nekekag̵i haazà is etew. Ne nengeinuinu is langun he menge etew zutun, ne ke sikandan te, “Sikitew is menge kevuwazan ni Israyil, sikan tew pa maahà is iring kayi!”

Marcos 1:26

Ne zutundutun midhimu te mezaat he mulin-ulin he mevidbid haazà is etew ne impepengulahì din te mezag̵ing. Ne mid-awà haazà is mezaat he mulin-ulin puun dutun te etew.

Marcos 1:28

Ne pinaag̵i zutun segugunà nekeeneb is bentug̵an ni Jesus diyà te tivuuk he prubinsya he Geliliya.

Marcos 10:24

Ne is menge sumusundan din, hein nezineg dan haazà is migkag̵i ni Jesus, utew zan ingkeinuinu. Ne mid-uman megkag̵i si Jesus te, “Utew mereg̵en te etew is kebpesakup din te Megbevayà wey sikandin mehedii.

Marcos 10:32

Si Jesus wey is menge sumusundan din, hein diyè dan en te zalan pehendiyà te inged he Hiruselim, midhunahuna si Jesus. Is menge sumusundan din, ne nengeinuinu ne nesemukan is gehinawa zan su maan is edhendiyà si Jesus te Hiruselim. Ne zuen daan menge etew he edtinundug ne nengehandek sikandan. Ne zutun migkeg̵iyan ni Jesus is sepulù wey zezuwa he menge sumusundan din he medtapid dan ne impesavut din dutun ke hengkey is egkehitavù kandin.

Marcos 16:5

Ne mid-ahuk dan dutun te idselang te penlevengà ne neehè dan is ebpimpinuu he menguhed he etew ziyà te egkekewanan dan he kukumbalà te meputì he manggad. Ne zutun nekehuyab is gehinawa zan.

Marcos 16:6

Ne migkag̵i haazà is etew te, “Kenè kew mahandek. Ebpen-ahaan niw si Jesus he tigNeserit, sikan is inransang te krus, iyan, wazè en dini su nevanhew en. Ahaa niw man kayi te midsevukan kandin.”

Marcos 7:37

Utew zan haazà ingkeinuinu ne ke sikandan te, “Utew meupiya is kebeeli zin kayi te langun su edhimuwen din minsan is kenà ebpekezineg he mekezineg ne sikan is kenà ebpekekag̵i ne ebpekekag̵i!”

Lucas 4:36

Ne utew nengeinuinu is langun he menge etew zutun ne neked-iinseey zan is egkag̵i te, “Hendei ebpuun heini is gehem ni Jesus te kebayàbayà? Su utew mekeg̵eg̵ehem is kedsug̵ua zin te menge mezaat he mulin-ulin he med-awè dan ne ebpemineg dan kandin!”

Lucas 9:1

Ne midtig̵um ni Jesus sikan is sepulù wey zezuwa he menge sumusundan din. Ne kada sevaha kandan, mibeg̵ayan din te g̵ehem su wey zan mevewii is egkengezeruwan wey ikepemeg̵uwè is menge mezaat he mulin-ulin.

Nengeulaula 17:19

Ne mid-uwit dan si Pablo ziyà te etuvangan te upakat dutun he egngezanan te Eriyupagu ne ke sikandan te, “Egkesuat key he metueni zey heini is beg̵u he penurù he ibpesavut nu.