Lucas 7:21 - Manobo Western Bukidnon

²¹ Ne zutun he andew, mezakel is menge etew he nengeulian ni Jesus te menge zaru wey ebpenggezamen dan. Impemeg̵uwè din dutun te menge etew is menge mezaat he mulin-ulin he ebpenlalung kandan ne midhimu zin he mekeahà is mezakel he menge lakap.

Lucas 7:21 Кръстосани препратки

Mateo 4:23

Ne neeneb ni Jesus is tivuuk he prubinsya he Geliliya te ebpenurù te menge etew ziyà te menge simbahan dan. Impesavut din te menge etew is Meupiya he Tudtulanen te keag̵i te kedhadì te Megbevayà ne nengeulian din is egkengesekitan te migkelingulingu he varang te zaru.

Mateo 4:24

Ne nevantug si Jesus diyà te tivuuk he nasyun he Sirya. Ne tenged kayi mibpen-uwit dan diyà te kandin is langun he egkengezeruwan wey is egkengesekitan te ebarangbarang en he egezamen, iring te menge edlelungen te mezaat he mulin-ulin, menge ebevuyen, wey menge etew he minatey is divaluy he lawa, ne nengeulian ni Jesus heini is langun.

Marcos 3:10

Mezakel is nengeulian din en he egkengezeruwan ne tenged kayi, is egkengezeruwan dutun, ebpenlietliet dan en is edteg̵el ed-uvey diyà te ki Jesus wey zan mekezampà kandin su wey zan meulii.

Marcos 5:29

Ne te neg̵ewezan din dutun is kumbalà ni Jesus, ne mid-engked haazà is kegkevusbusi kandin ne netuenan din dutun he haazà is egezamen din, ne naawè en diyà te kandin.

Marcos 5:34

Ne zutun, migkag̵i si Jesus te, “Bayi, umba neulian ka te zaru nu su midsarig ka kedì. Ulì ke en ne mebmelinawen is kebpekesavuk nu ne kenè ke en maan mezeruwi.”

Lucas 7:20

Ne hein nekeuma zan diyà te ki Jesus migkag̵i zan te, “Iyan impekehendini zey te kenikew su midsug̵ù key ni Juan Megbebewtismu su ibpeinsè din ke iyan ke en be iyan kes impesavut din he ibpehendini te Megbevayà wey ke zuen pe be ebpeebuten liyu kenikew?”

Hibriyuhanen 12:6

Su is minsan hentei he mahal zini te g̵ehinawa ku, edsewayen ku, ne is minsan hentei he ed-engkenen ku he anak ku, ebpenuruen ku pinaag̵i te merasey wey sikandin memansu,” ke sikandin.