Lucas 6:20 - Manobo Western Bukidnon

²⁰ Ne mibpenlangulangu si Jesus diyà te menge sumusundan din ne migkag̵i sikandin te, “Utew kew zeyzey is menge ayuayu su iyan kew en edhedian te Megbevayà!

Lucas 6:20 Кръстосани препратки

Mateo 25:34

Ne zutun, siak is hadì, ekeg̵iyan ku is menge etew ziyà te zapit te egkekewanan ku te, ‘Sikiyu is midtuvazan te Amey ku he Megbevayà, kayi kew su iyan kew edhedian ku. Su is kedhadì ku keniyu, integ̵ana en dengan puun pa te kedlimbag̵a te kelibutan.

Mateo 5:1

Ne naahà ni Jesus is mezakel he menge etew ne zutun midtekezeg sikandin te vuvungan ne zutun mebpinuu. Ne mid-uvey ziyà te kandin is menge sumusundan din,

Lucas 12:32

Sikiyu is menge sumusundan ku, kenè kew mahandek. Minsan pa te zeisey kew zà, is Amey niw he Megbevayà, egkesuatan din he medhadì kew iring te edhadì daan sikandin.

Lucas 13:28

Ne zutun,” ke si Jesus, “utew zekelà he erang niw ne ebpemekengingitel kew tenged te utew ibmesakit pezem te g̵ehinawa niw su kenè kew ebpekeragkes dutun te edhedian te Megbevayà, ne ziyà te seled, ne egkeehè niw is menge kepuun niw zengan, ensi Abraham wey sikan is anak din he si Isaak wey sikan is apù din he si Hakub wey elin daan dutun is langun he ebpemeneuven te Megbevayà.

Lucas 14:15

Ne is sevaha zutun te menge maama he ebpememinuu ziyà te uvey ni Jesus, hein nezineg din haazà is penurù ni Jesus ne migkag̵i te, “Utew zekelà is kelipey te menge etew he ebpeketelavuk dutun keuzemà te keemuran he zutun ibpekaan is langun he menge etew he edhedian te Megbevayà!”

Lucas 16:25

Iyan, midtavak ni Abraham haazà is mid-umew te, ‘Apù, tentenuzi nu he hein uuyag ke pa, ne mid-em-eminan nu en is kedlipeylipey nu. Iyan, si Lazaro mulà, ne neem-eminan din en is kemeresayan. Ne g̵untaan, si Lazaro, edlipayen; ne sikew, edresayen.

Lucas 4:18

“Mid-ulinan a te Wag̵as he Mulin-ulin he ebpuun te Megbevayà. Ne mibpilì a te Nengazen su wey ku ikepesavut te menge egkengeayuayu is Meupiya he Tudtulanen. Ne mibpeveyaan din kedì is menge etew wey ku sikandan metudtuli he egkengevelukasan is nengevihag ni Setanas, ne egkengeulian is nengelakap wey zan mekeahà ne egketevangan is egkengereg̵enan.

Nengeulaula 14:22

Ne impesavut dan te menge tumutuu zutun is ibmezesen te kedtuu zan. Migkag̵i zan kandan he kinahanglan he kenè dan engkezi is kedtuu zan ki Jesus. Ke sikandan te, “Sikita is tumutuu, wey ki zà egkehedii te Megbevayà ke egkeantus ta is mezakel he kemereg̵enan.”

2 Kurintu 6:10

Mezakel is menge seeng dey, iyan, layun key egkelipey. Henduen be te utew key egkeayuayu, iyan, pinaag̵i kenami, edsepian te wazà pidtemanan is mezakel he menge etew. Henduen be te wazè dey azen, iyan, naangken dey is langun he ibeg̵ey te Megbevayà.

2 Kurintu 8:2

Minsan dutun te nekeantus dan te utew mepait he kemeresayan, ingkelipey zan utew g̵ihapun ne tenged kayi minsan pa te utew zan egkengeayuayu, utew zekelà is ingkeveg̵ey zan he tavang te menge zuma zan he tumutuu.

2 Kurintu 8:9

Netuenan ta ke hengkey is kezekelà te g̵ag̵ew kenita te Nengazen tew he si Jesu Kristu. Su tenged te hizu zin kenita, minsan te utew sikandin sepian diyà te langit, midhimu zin he utew sikandin ayuayu pinaag̵i te kebpeetew zin wey kebpehimatey zin. Ne tenged kayi te kegkeayuayu zin egkehimu ki he utew sepian.

1 Tiselunika 1:6

Ne sikiyu zaan, mid-iringan niw is mid-ulaula zey wey is mid-ulaula zengan te Nengazen tew he si Jesus su midawat niw is Lalag te Megbevayà minsan nekeag̵i kew te kemeresayan tenged te kedawat niw. Ne minsan pa te nerasey kew, nelipey kew zed tenged te ked-ulini keniyu te Wag̵as he Mulin-ulin.

2 Tiselunika 1:5

Heini is kedsarig niw wey ked-antus niw, ne iyan tuus he metazeng is kukuman te Megbevayà su pinaag̵i te memerasey he egkeantus niw, ibpeehè din he zait kew he idragkes dutun te menge etew he edhedian din.

Santiago 1:12

Utew zeyzey is etew he ebpurung ed-antus te penggezam kandin su emun egkeahà he hustu is kedtuu zin, ebeg̵ayan sikandin te untung he wazà pidtemanan he iyan impenaad te Megbevayà diyà te langun he ebmahalen dan sikandin diyà te g̵ehinawa zan.

Santiago 2:5

Pemineg̵a niw, menge minahal ku he suled, is ibpesavut ku keniyu. Duen mibpilì te Megbevayà he egkengeayuayu. Ne minsan deisek is ketig̵eyunan dan midhimu te Megbevayà he zekelà mulà is kedsarig dan kandin ne iyan sikandan edtuvazan din pinaag̵i te kedhadì din sumalà is penaad din diyà te langun he ebmahalen dan sikandin diyà te g̵ehinawa zan.

Impezayag 2:9

Netuenan ku is kegkeantus niw te kemeresayan; netuenan ku he egkengeayuayu kew. Ne minsan pa zutun sepian kew utew pinaag̵i te kedtuu niw. Netuenan ku he kenà benar is id-ituk keniyu te menge etew he egkag̵i he menge Hudiyu zan, iyan, kenà sikandan tutuu he Hudiyu su mibpekid-upakat dan ki Setanas.