Lucas 17:1 - Manobo Western Bukidnon

¹ Ne zuen migkag̵i ni Jesus diyà te menge sumusundan din, ke sikandin te, “Kenà egkehimu he wazà igkeawà te kedsarig te etew kedì, iyan kehizu utew te etew he pinaag̵i kandin egkeawà is kedsarig te minsan hentei he midtuu kedì, su utew meveg̵at is silut kandin te Megbevayà.

Lucas 17:1 Кръстосани препратки

Mateo 16:23

Ne midsinaru si Jesus diyà te ki Pedro is egkag̵i te, “Sikew is ed-iring ki Setanas, awè ka zini te kediey. Egkesanggen a kenikew su wazà diyà te isip nu is egkesuatan te Megbevayà, kekenà, iyan diyà te isip nu is egkesuatan te etew!”

Mateo 18:7

Kehizu te menusiyà, su zuen iyan menge ebpekeawà te kedsarig te menge etew. Layun egkehitavù is iring kayi, iyan, kehizu utew te etew he pinaag̵i kandin egkeawà is kedsarig kediey te minsan hentei he midtuu kedì su utew meveg̵at is silut kandin te Megbevayà.

Lucas 16:31

Ne migkag̵i zutun si Abraham te, ‘Emun kenè dan ebpemineg̵en is menge surat ni Moises wey te ebpemeneuven te Megbevayà dengan, kenè dan daan ebpemineg minsan ke zuen egkevanhew he minatey he edhendiyà te kandan.’ ”

Ruma 14:13

Ne tenged dutun, menge suled, ed-engkezan te en is kedsawey ta te menge ulaula te menge zuma ta he tumutuu. Su kinahanglan he ed-ahaan ta is kenita he menge ulaula su wey wazà minsan hengkey he ulaula ta he ibpekesalà te menge zuma ta.

Ruma 16:17

Menge suled, edhengyuen ku keniyu he mebantey kew, ne likayi niw is menge etew he edsamuk te kebpekidsevaha niw wey kedtuu niw te menge tumutuu su edsupaken dan is tutuu he tuluuwen he impenurù keniyu.

1 Kurintu 10:32

Tenged kayi, kinahanglan he wazà minsan hengkey he ulaula niw he ibmesakit te g̵ehinawa te minsan hentei he etew, Hudiyu se kenà Hudiyu wey menge zuma niw he tumutuu te Megbevayà.

1 Kurintu 11:19

Kinahanglan buwa he iyan heini egkehitavù keniyu ziyan su wey metueni ke hentei keniyu is egkeserig̵an te Megbevayà.

1 Kurintu 8:13

Ne emun egkehimu he egkepenulayan is duma ku he tumutuu pinaag̵i te kegkaan ku te usa, ne kenà ad maan te minsan keenu egkaan te usa.

1 Timoteo 4:1

Utew keladu is impesavut te Wag̵as he Mulin-ulin he keuzemà te ketepusan he timpu zuen menge etew he kenè en edtuu te tutuu he tuluuwen, kekenà, iyan ebpemineg̵en dan is impinted te menge teruen he menge mulin-ulin. Ebpemineg̵en dan is impenurù kandan te menge mezaat he mulin-ulin

Impezayag 2:14

Duen nepipira he menge ulaula niw he kenè ku egkesuatan, su zuen duma keniyu he edsunuzen dan is impenurù dengan ni Belaam. Su si Belaam, impenurù din dengan ki Balak is paag̵i wey mepenulayi is menge kevuwazan ni Israyil. Iyan is kegkaan te impemuhat diyà te kenà tutuu he megbevayà wey is kedhilavet te kenè dan esawa.

Impezayag 2:20

Ne minsan pa zutun, duen ulaula niw he kenè ku egkesuatan su sikan is bahi he si Hisibil he egkeg̵iyen din he ebpeneuven sikandin te Megbevayà, idtug̵ut niw he ibpenurù din is mezaat he ulaula ziyà te menge sulug̵uen ku. Egkag̵i sikandin he kenà supak te Megbevayà is kedhilavet te kenè niw esawa wey is kegkaan te impemuhat diyà te menge kenà tutuu he megbevayà.