Lucas 16:16 - Manobo Western Bukidnon

¹⁶ Is kedtumana te kesug̵uan he imbilinbilin dengan ni Moises wey is kedtumana te menge lalag he insurat te menge ebpeneuven dengan te Megbevayà, ne impesavut heini taman dà te timpu ni Juan Megbebewtismu. Puun dutun iyan ibpesavut diyà te langun he menge etew is Meupiya he Tudtulanen te keag̵i te g̵inhedian te Megbevayà. Ne edteg̵el is minsan hentei wey meg̵aan pezem sikandan mekeseled dutun te g̵inhedian.

Lucas 16:16 Кръстосани препратки

Mateo 10:7

Ipesavut niw kandan he meg̵aan en edhadì te menusiyà is Megbevayà.

Mateo 15:11

Is igkeepesi te Megbevayà te etew, ne kenà iyan sikan is egkeenen he id-ahuk dutun te etew ziyà te vèbè din, kekenà, iyan sikan is menge mezaat he lalag he egawas he ebpuun te vèbè dutun te etew.”

Mateo 21:32

Su nekeuma si Juan, ne impeehè din keniyu is paag̵i wey kew mebmetazeng ne wazè niw sikandin tuuwi, iyan, midtuuwan mulà sikandin te menge limbungan he menunukut wey menge vahi he ebpemenapì te zengeg dan. Ne minsan te netuenan niw heini, wazè niw iniyug̵i is memezaat he ulaula ne wazè kew zaan medtuu kandin.”

Mateo 3:2

Ke sikandin te, “Iniyug̵i niw is memezaat he ulaula su meg̵aan en edhadì kenitew is Megbevayà he ziyà te langit.”

Mateo 4:17

Ne puun dutun midweliyan ni Jesus is menge etew. Ke sikandin te, “Iniyug̵i niw is memezaat he ulaula niw, su meg̵aan en edhadì keniyu is Megbevayà he ziyà te langit.”

Mateo 4:23

Ne neeneb ni Jesus is tivuuk he prubinsya he Geliliya te ebpenurù te menge etew ziyà te menge simbahan dan. Impesavut din te menge etew is Meupiya he Tudtulanen te keag̵i te kedhadì te Megbevayà ne nengeulian din is egkengesekitan te migkelingulingu he varang te zaru.

Marcos 1:14

Ne hein impezakep en ni Hadì Hirudis si Juan, midlikù si Jesus diyà te prubinsya he Geliliya ne impesavut din dutun te menge etew is Meupiya he Tudtulanen he ebpuun te Megbevayà.

Marcos 1:45

Iyan, hein mid-awà dutun haazà is etew, midtudtul zin haazà is nehimu ziyà te kandin diyà te minsan hentei. Ne tenged dutun kenè en maan si Jesus ebpekepeg̵awag̵awa ke edhendutun te menge inged su egkeamur-amur is mezakel he menge etew. Diyè dà si Jesus edrig̵urig̵u te menge unayan. Ne midangep kandin is menge etew he ebpemuun diyà te minsan hendei he inged.

Lucas 10:11

‘Minsan is menge eliyavuk kayi te inged niw he nemendeket te menge paa zey, edtektaken dey en wey niw metueni he edsilutan kew te Megbevayà.’ Ne ke sikiyu zaan te, ‘Kinahanglan he metueni niw he meg̵aan en is timpu te kedhadì te Megbevayà.’

Lucas 10:9

Pemewii niw is egkengezeruwan dutun te inged. Ne keg̵iyi niw is menge etew zutun he meg̵aan en is timpu te kedhedii kandan te Megbevayà.

Lucas 16:29

Ne midtavak si Abraham te, ‘Duen diyà te kandan menge surat he impesurat te Megbevayà ki Moises wey te ebpemeneuven te Megbevayà dengan. Egkehimu he ebpemineg̵en haazà dutun te menge hazi nu.’

Lucas 16:31

Ne migkag̵i zutun si Abraham te, ‘Emun kenè dan ebpemineg̵en is menge surat ni Moises wey te ebpemeneuven te Megbevayà dengan, kenè dan daan ebpemineg minsan ke zuen egkevanhew he minatey he edhendiyà te kandan.’ ”

Lucas 9:2

Ne zutun ne impehipanew zin sikandan su wey zan ikepesavut is Meupiya he Tudtulanen te keag̵i te kedhadì te Megbevayà ne wey zan daan mekepemawì te minsan hengkey he egezamen te etew.

Juan 1:45

Ne si Felipe, mibeyaan din si Natanael, ne ke sikandin te, “Neehè dey en kes etew he netagnà dengan te ebpemeneuven wey netagnà ni Moises dutun te insurat din diyà te libru he kesug̵uan. TigNeserit sikandin he si Jesus he anak ni Jose.”

Juan 11:48

Emun ebpesegdanen tew, edtuuwan te langun he menge etew he iyan sikandin sikan is mibpilì te Megbevayà he ibpahadì. Ne emun iyan en heini vag̵ad, ebeyaan kiw te menge sundaru te hadì tew ziyà te Ruma, ne edèdeetan dan is simbahan tew he Valey te Megbevayà wey is gubirnu tew.”

Juan 12:19

Ne zutun migkag̵i is menge Perisiyu te, “Utew mezakel he menge etew is edsundan kandin! Wazè tew en bes egkehimu.”

Juan 5:4

su zuen timpu he zuen kun belinsug̵uen te Megbevayà he ebpenaug dutun te linew ne egurig̵awen din haazà is wahig. Ne zutun, is egkehuna he etew he ebpekeagbur zutun te wahig, egkeulian sikandin te minsan hengkey he zaru zin.

Nengeulaula 3:18

Impesavut dengan te Megbevayà pinaag̵i te tagnà te ebpemeneuven din he edresayen te menge etew is mibpilì din he ibpahadì. Ne midhimu zin he metuman heini pinaag̵i te mid-ulaula niw.