Lucas 13:24 - Manobo Western Bukidnon

²⁴ “Himuwa niw is taman te egkehimu niw wey kew mekeseled te melig̵et he g̵emawan he idselang dutun te valey he iyan is untung he wazà pidtemanan su egkeg̵iyen ku keniyu he mezakel is egkesuat pezem he edseled dutun, iyan, kenè dan ebpekeseled.

Lucas 13:24 Кръстосани препратки

Mateo 11:12

Puun pa zutun te kebpesavut ni Juan taman en guntaan, is Megbevayà he ziyà te langit, edteg̵el he mekehadì, ne edteg̵el zaan is menge etew wey zan mekepehadì kandin.

Lucas 13:23

Ne zuen mid-insà kandin te, “Datù, deisey zè be is menge etew he ebeg̵ayan te untung he wazà pidtemanan?” Ne midtavak si Jesus te,

Lucas 21:36

Umba, mebpekevantey kew, ne layun kew ampù, su pinaag̵i zà te ked-ampù ne edlig-enan kew te Megbevayà ne kenè kew egkekeizan kayi te langun he egkengeseg̵azan niw, ne human kenè kew zutun egkeeled ke ebpekeetuvang kew kedì,” ke si Jesus.

Juan 13:33

Sikiyu is menge minahal ku he menge sumusundan, egketegteg̵aad dà guntaan ne egkeawaan ku en sikiyu. Ebpen-ahaan a keniyu ne iring te migkag̵i ku ziyà te menge Hudiyu, egkeg̵iyen ku zaan dini te keniyu he ke hendei a ebpevayà kenè kew ebpekezuma.

Juan 5:4

su zuen timpu he zuen kun belinsug̵uen te Megbevayà he ebpenaug dutun te linew ne egurig̵awen din haazà is wahig. Ne zutun, is egkehuna he etew he ebpekeagbur zutun te wahig, egkeulian sikandin te minsan hengkey he zaru zin.

Juan 6:27

Kenè niw pen-ahaa is egkeenen he meg̵aan dà egkehanew, kekenà, hag̵ù kew wey niw mekuwa is egkeenen he ebpekeveg̵ey te untung he wazà pidtemanan. Siak is Kakey te Menusiyà, iyan heini egkeenen he igkeveg̵ey ku keniyu su impeehè en te Amey ku he Megbevayà he ingkesuat din is menge vaal ku.”

Juan 7:34

Ebpen-ahaan a keniyu, iyan, kenà a keniyu egketuredu su kenè kew ebpekehendiyà te egkeubpaan ku.”

Juan 8:21

Ne mid-uman megkag̵i si Jesus diyà te menge egalen te menge Hudiyu, ke sikandin te, “Ed-ewaan ku sikiyu ne ebpen-ahaan a keniyu, iyan, ebpematey kew zà duen he kenà egkepeseylu is menge salè niw. Ne ke hendei a ebpekepevayà kenè kew ebpeketelukun.”

Ruma 10:3

Su wazè dan dewata is paag̵i te Megbevayà te kebpeketerenga zin kandan. Ne iyan dan migamit is keugelingen dan he paag̵i he iyan is kedtumana te kesug̵uan ne wazè dan medsunud te paag̵i te Megbevayà te kebpeketerenga zin kandan.

Kulusas 1:29

Siak, ebpenigudu a ebaal he edlig-enan te zekelà he zesen ni Kristu su wey metuman heini.

Hibriyuhanen 4:11

Umba, sikitew zaan, ebeelan tew is taman te egkehimu tew wey kiw zaan mekeseled dutun te edhimelayan he midteg̵ana te Megbevayà. Kenè tew ed-iringan haazà is menge etew zengan he wazà mebpemineg te Lalag te Megbevayà su wey wazà minsan sevaha kenitew he kenà ebmehimuwen he mekeseled dutun te edhimelayan.

2 Pedro 1:10

Menge suled, geina te mibpilì kiw ne midhimu kiw te Megbevayà he menge tumutuu kandin, edhimuwen tew is taman te egkehimu tew wey maahà he tutuu iyan is kebpilia zin kenitew wey is kedhimuwa zin kenitew he menge tumutuu zin. Su emun iyan heini ed-ul-ulahan tew kenè kiw ebpekesuwey te hustu he ibayà,