Lucas 13:15 - Manobo Western Bukidnon

¹⁵ Ne midtavak kandin si Jesus te, “Tarù is menge ulaula niw! Ke zuen baka ne emun kenà ne kudà te minsan hentei keniyu, kenà egkehimu he kenè din edhekazan haazà emun Andew te Kedhimeley, kekenà, edhekazan din ne edtuyuken din pehendiyà te wahig su ibpeinum din.

Lucas 13:15 Кръстосани препратки

Mateo 15:14

Bey-ani niw en is menge Perisiyu. Iring sikandan te menge lakap. Ne ke zuen lakap he ed-eg̵aken din is sengelelakap, haazà is ebpeeg̵akà, ne pudu egkeulug diyà te vitu.”

Mateo 15:7

Tarù is kedtuu niw te Megbevayà! Utew hustu is Lalag te Megbevayà he insurat te tipehuna he ebpeneuven he si Esaias. Netagnè kew zin, su ke sikandin te,

Mateo 23:13

Kehizu niw te menge menunudlù te kesug̵uan wey sikiyu is menge Perisiyu su tarù is kedtuu niw te Megbevayà! Su ke zuen etew he ibeg̵ey zin pezem is gehinawa zin diyà te hadì tew he Megbevayà, kenè niw edtug̵utan, ne kenè niw zaan ibpeveyveyaan is gehinawa niw te Megbevayà.

Mateo 23:28

Iring kew zutun su emun ed-ahaan kew te etew henduen be te meupiya is ulaula niw, iyan, diyà te g̵ehinawa niw, dutun is kedtarùtarù wey kedsupak te sug̵ù te Megbevayà.

Mateo 7:5

Utew tarù is ulaula nu! Ihuna nu iawà is batang he nekepesek kenikew ne human ka ebpekeahà. Ne zutun melemu nu zà igkeawà haazà is nekepesek te zuma nu.”

Lucas 12:1

Ne sevaha he andew, utew mezakel he menge etew is edhahasekhasek he ed-uvey ziyà te ki Jesus. Ne zutun migkag̵i si Jesus, asal iyan egkeg̵iyan din is menge sumusundan din, ke sikandin te, “Andam kew wey niw melikayi is tapey te menge Perisiyu, he ke và dà egkeg̵iya, is tarù he kedtuu zan te Megbevayà.

Lucas 14:5

Ne zutun migkag̵i si Jesus diyà te menge etew zutun te, “Hengkey ve is ed-ul-ulahan niw ke zuen niw anak, ne emun kenà, ne vaka niw he egkeulug diyà te mezalem he vudsi emun Andew te Kedhimeley. Siguradu, edtevangan niw minsan ke Andew te Kedhimeley.”

Lucas 6:42

Ne egkeg̵iyan nu pa sikandin he id-awè nu haazà is nekepesek kandin, iyan, nepesek mulà is kenikew he mata te vatang he ebpesegdanen nu! Utew tarù is ulaula nu! Ihuna nu iawà is batang he nekepesek kenikew ne human ka ebpekeahà. Ne zutun melemu nu zà igkeawà haazà is nekepesek te zuma nu.”

Lucas 7:13

Ne is Nengazen he si Jesus, hein neehè din haazà is bahi he edsineg̵ew ne midtavang is gehinawa zin ne migkeg̵iyan din haazà is bahi te, “Ayà, kenè ka sineg̵ew.”

Lucas 7:19

Ne zutun midtawag ni Juan is dezuwa te menge sumusundan din ne midsug̵ù din diyà te ki Jesus. Iyan insug̵ua zin dutun su ibpeinsè din ke iyan en be iyan si Jesus sikan is netagnà dengan is kebpekeuma zin dini te kelibutan he impesavut ni Juan wey ke zuen pe be ebpeebuten he liyu ki Jesus.