Lucas 12:32 - Manobo Western Bukidnon

³² Sikiyu is menge sumusundan ku, kenè kew mahandek. Minsan pa te zeisey kew zà, is Amey niw he Megbevayà, egkesuatan din he medhadì kew iring te edhadì daan sikandin.

Lucas 12:32 Кръстосани препратки

Mateo 14:27

Ne zutun migkag̵i si Jesus diyà te kandan, “Sarig kew,” ke sikandin, “kenè kew mahandek su iyan a.”

Mateo 20:16

Ne migkag̵i si Jesus te, “Is egkengehuziyan guntaan ne iyan egkengehuna keuzemà, ne sikan is egkengehuna g̵untaan ne iyan maan egkengehuziyan keuzemà.”

Mateo 25:34

Ne zutun, siak is hadì, ekeg̵iyan ku is menge etew ziyà te zapit te egkekewanan ku te, ‘Sikiyu is midtuvazan te Amey ku he Megbevayà, kayi kew su iyan kew edhedian ku. Su is kedhadì ku keniyu, integ̵ana en dengan puun pa te kedlimbag̵a te kelibutan.

Mateo 7:15

Likayi niw is menge ebpeneuven kun te Megbevayà he tarù is ibpenurù dan. Henduen be te hustu sikandan he tumutuu te Megbevayà, iyan, ebpekezezaat is ibpenurù dan.

Lucas 10:21

Ne zutun midlipey si Jesus te Wag̵as he Mulin-ulin ne mid-ampù diyà te Megbevayà, ke sikandin te, “Amey ku he Nengazen te langit wey tanà, dekelà is kebpeselemati ku kenikew su is in-eles nu su wey kenà mesavut te menge uluwanen wey uvag en memetau ne impesavut nu en diyà te menge etew he wazè dan menge hanew. Amey ku, umba ebpeselematan ku su midhimu nu heini te iring kayi su iyan egkesuatan nu tenged te g̵ag̵ew nu.”

Juan 18:36

Ne midtavak si Jesus te, “Is keg̵ehem ku te kedhadì, kenà dini ebpuun te kelibutan. Su ke zini ebpuun mibpekidtebek en geina is menge sakup ku wey a kenà mezakep te menge Hudiyu, iyan, kenà dini te kelibutan ebpuun is keg̵ehem ku te kedhadì.”

Nengeulaula 20:28

Bentayi niw is ulaula niw wey ventayi niw zaan is langun he tumutuu he insarig keniyu te Wag̵as he Mulin-ulin; kinahanglan he iyan kew edlig-en te kedtuu te menge tumutuu te Megbevayà. Nehimu kiw zin he sakup pinaag̵i te kebpehimatey te anak din.

Nengeulaula 20:29

Netuenan ku he emun ed-ewaan ku sikiyu, duen edlepew kayi te keniyu he menge menunudlù he is ibpenurù dan, ne ebpekezezaat te upakat ne edèdeetan dan iyan is upakat niw te menge tumutuu.

Ruma 6:23

Ke zuen etew he ebpevayàbayà te suat te mekesesalà he lawa zin ne zuen silut kandin he iyan is kemetayen he wazè din pidtemanan. Iyan, is etew mulà he edtuuwan din si Jesu Kristu he Nengazen tew, duen ibeg̵ey kandin te Megbevayà he iyan is untung he wazè din pidtemanan.

1 Kurintu 1:21

Utew metau is Megbevayà; midhimu zin he kenà egketuenan te menge etew ke hentei sikandin pinaag̵i te kandan dà he ketau su midhimu zin he egkelibri sikandan pinaag̵i zà te kedtuu zan te Meupiya he Tudtulanen he ibpenurù ta he kunaan dan ke tarù he wazè din pulus.

Pilipus 2:13

Su layun edtavang keniyu is Megbevayà wey niw mesuati ne wey niw mehimu is kedtumana te tuyù din diyan te keniyu.

2 Tiselunika 1:11

Tenged kayi layun dey sikiyu id-ampù. Ed-ampù key he himuwa te Megbevayà is menge ulaula niw he zait te kedtuu niw kandin. Ed-ampù key he pinaag̵i te g̵ehem din himuwa zin he tumana niw is minsan hengkey he meupiya he ulaula he iyan en tuyù niw tenged te midtuu kew kandin.

2 Tiselunika 1:5

Heini is kedsarig niw wey ked-antus niw, ne iyan tuus he metazeng is kukuman te Megbevayà su pinaag̵i te memerasey he egkeantus niw, ibpeehè din he zait kew he idragkes dutun te menge etew he edhedian din.

Hibriyuhanen 12:28

Umba, kinahanglan he zekelà is kebpeselemati tew kandin su iyan kiw menge sakup te g̵inhedian din he kenà egkehanew te wazè din pidtemanan. Kinahanglan he ed-azap kiw kandin te paag̵i he iyan egkesuatan din. Ne edtehuzan tew sikandin duma is kegkehandek;

Santiago 2:5

Pemineg̵a niw, menge minahal ku he suled, is ibpesavut ku keniyu. Duen mibpilì te Megbevayà he egkengeayuayu. Ne minsan deisek is ketig̵eyunan dan midhimu te Megbevayà he zekelà mulà is kedsarig dan kandin ne iyan sikandan edtuvazan din pinaag̵i te kedhadì din sumalà is penaad din diyà te langun he ebmahalen dan sikandin diyà te g̵ehinawa zan.

2 Pedro 1:11

ne zekelà is kelipey tew keuzemà su egkeg̵alew is Megbevayà kenitew zutun te kebpeseleza zin kenitew zutun te wazà pidtemanan he g̵inhedian te Nengazen tew he si Jesu Kristu he iyan Menluluwas tew.

Impezayag 1:6

Midhimu zin he iyan kiw edhedian din wey iyan kiw memumuhat he iyan kebpemuhat tew is ked-ezapa tew te Megbevayà he Amey zin. Tehuza sikandin wey medhadì sikandin te wazà pidtemanan!

Impezayag 22:5

Wazè en dutun mezukilem ne wazè en kinahanglan he zuen pa sulù wey silà te andew su iyan sulù dan is Megbevayà he Nengazen te langun, ne edhadì sikandan te wazà pidtemanan.