Lucas 11:1 - Manobo Western Bukidnon

¹ Sengeandew, ne ed-ampù si Jesus diyà te Megbevayà. Ne te nekeipus sikandin te ed-ampù migkag̵i is sevaha zuen te menge sumusundan din, ke sikandin te, “Datù, penurua key te ked-ampù su si Juan Megbebewtismu, mibpenurù din is menge sumusundan din te ked-ampù.”

Lucas 11:1 Кръстосани препратки

Lucas 10:42

Sevaha zà is dekelà is pulus din he iyan mibpilì ni Maria ne kenà heini igkeawà diyà te kandin.”

Lucas 11:2

Ne migkag̵i si Jesus te, “Iyan heini iringi niw ke ed-ampù kew; ke sikiyu te, ‘Amey zey ziyà te langit, berakat he tehuza te menusiyà is ngazan nu. Berakat he medhadì ka te menusiyà.

Lucas 6:12

Ne sevaha he andew zutun midhendiyà si Jesus te vuvungan su ed-ampù diyà te Megbevayà. Ne mid-ampù sikandin dutun te tivuuk he kezukileman.

Lucas 7:13

Ne is Nengazen he si Jesus, hein neehè din haazà is bahi he edsineg̵ew ne midtavang is gehinawa zin ne migkeg̵iyan din haazà is bahi te, “Ayà, kenè ka sineg̵ew.”

Lucas 7:19

Ne zutun midtawag ni Juan is dezuwa te menge sumusundan din ne midsug̵ù din diyà te ki Jesus. Iyan insug̵ua zin dutun su ibpeinsè din ke iyan en be iyan si Jesus sikan is netagnà dengan is kebpekeuma zin dini te kelibutan he impesavut ni Juan wey ke zuen pe be ebpeebuten he liyu ki Jesus.

Lucas 9:18

Sengeandew zutun ne ed-ampù si Jesus he sebsevaha zin diyà te Megbevayà ne is menge sumusundan din, diyè dan te uvey zin. Ne ke sikandin diyà te kandan te, “Hentei e kun sumalà te ked-isipa kediey te menge etew?”

Lucas 9:28

Ne menge sengesimana puun dutun te kegkag̵i kayi ni Jesus, miduma zin ensi Pedro, si Santiago, wey si Juan ne midtekezeg dan te vuvungan su wey mekeampù diyà te Megbevayà.

Hibriyuhanen 5:7

Ne hein kemulu pa si Jesus dini te kelibutan, ne mibpenig̵is is luhè din ne nekelelendag sikandin tenged te utew meheg̵et is kebuyù din wey ked-ampù din diyà te Megbevayà he iyan ebpekelibri kandin te kemetayen. Ne tenged te zekelà is kedtahud din wey kedtumana zin te menge sug̵ù te Megbevayà, midineg is ked-ampù din te Megbevayà.

Hudas 1:20

Ne sikiyu mulà, menge minahal ku he suled, peniguduwi niw is kebpetebtevangè niw su wey meheg̵et is kedtuu niw te tuluuwen he impetuuwan kenitew te Megbevayà. Pekezesen kew ampù pinaag̵i te g̵ehem he ibeg̵ey te Wag̵as he Mulin-ulin.