Lucas 10:41 - Manobo Western Bukidnon

⁴¹ Iyan, migkag̵i si Jesus te, “Marta, utew mezakel is igkesemuki nu he kenà utew ebpulus.

Lucas 10:41 Кръстосани препратки

Marcos 4:19

iyan, egkelipatan dan tenged te menge seeng dan kayi te kelibutan wey te kegkesuat dan te selapì wey te mezakel pa he menge azen, ne kenà ebpulus diyà te kandan is Lalag te Megbevayà.

Lucas 10:38

Ne hein midlaus ensi Jesus, ne nekeuma zan diyà te sevaha he inged he zuen dutun bahi he egngezanan ki Marta. Impepemenahik ni Marta si Jesus dutun te valey zin.

Lucas 10:40

Ne si Marta, ne iyan dà sikandin diyà te avu su ebaal te egkekaan dan ne mezakel is igkesamuk din he ebeelan din. Ne zutun mid-uvey sikandin diyà te ki Jesus he ke sikandin te, “Meupiya ve te g̵ehinawa nu he iyan e zà egkeviyuviyu he ebaal te egkekaan tew? Sug̵ua nu si Maria he ug̵upi e zin.”

Lucas 12:22

Ne migkag̵i si Jesus diyà te menge sumusundan din te, “Ne tenged kayi egkeg̵iyen ku keniyu te menge sumusundan ku he kenè kew meseeng te egkeenen he igkeuyag niw. Ne kenè kew zaan meseeng te ugelingen he idsun-ud te lawa niw.

Lucas 21:34

Ne ke si Jesus te, “Uram kew wey kew kenà kayi zà egketaman te kegkebibu wey kebpemenginum wey te kedlag̵ud niw te menge kelibutanen he menge kinahanglan niw. Su emun kenè kew ed-uram ne egketik-awan kew egkesaut te andew te kedlimasa te Megbevayà te menusiyà. Ne egkeiring kew te egketelebpì he rumat.

Lucas 8:14

Ne haazà is benì he ziyà mengeulug te tanà he zug̵iyen is menge sagbet dutun, ne iyan is Lalag te Megbevayà he nezineg te menge etew, iyan, tenged te menge seeng dan wey is suat dan te selapì, wey is menge kelipey he kayi te kelibutan, egkelipatan dan is nezineg dan ne kenà ebpulus diyà te kandan is Lalag te Megbevayà.

Juan 11:1

Duen maama he nezeruwan. Is ngazan din si Lazaro he tigBitanya. Duen dezuwa he etevey zin he zutun daan ed-ubpà te Bitanya, si Maria wey si Marta.

Juan 11:5

Minsan pa te mahal ziyà te g̵ehinawa ni Jesus ensi Marta, si Maria, wey si Lazaro,

Juan 12:2

Ne ziyà te Bitanya midtukud dan te keemuran su neg̵alew zan tenged te kebpekeuma eni Jesus. Iyan si Marta mengengenat kandan, ne elin si Lazaro zuma ni Jesus dutun te ebpemengaan.

Pilipus 4:6

Kenè niw ikeseeng is minsan hengkey he egkeulaula niw, kekenà, emun ed-ampù kew buyua niw ziyà te Megbevayà is egkinehenglanen niw ne emun ebuyù kew, ne kinahanglan he peselemati niw en he zaan.