Kulusas 3:5 - Manobo Western Bukidnon

⁵ Umba, menge suled, kenè niw en itug̵ut he tumana niw is mezaat he kebayè niw; kenè niw ul-ulaha is mahawag wey meremerik he ulaula ne kenè niw mehimuwa he zuen suat niw te kenè niw esawa; engkezi niw is mezaat he ulaula wey is keleleg̵ed su emun leg̵ezen ki te menge azen, henduen be te egkeilisan dini te g̵ehinawa ta is tutuu he Megbevayà te menge azen.

Kulusas 3:5 Кръстосани препратки

Mateo 15:19

Su ziyà te g̵ehinawa te etew ebpuun is menge meezaat he isip he utew igkeepes te Megbevayà iring te kebunù, kedhilavet te kenè din esawa, meremerik he ulaula, kebpenakew, kedtarùtarù diyà te hukmanan, wey is kebpenudtul zin te tarù wey mezeeti is dengeg te sengeeetew.

Ruma 1:26

Ne tenged te mibpesagdan te menge etew is Megbevayà, mibpesagdan din daan sikandan wey zan metuman is menge suat dan he utew mahawag. Minsan is menge vahi, ne kenè en maama is edhulizen dan, su iring dan he vahi is igkeerig̵i zan.

Ruma 1:29

Iyan dà egkeisip dan is kelelalung wey is mezaat he ulaula. Leg̵ezen dan ne meremerik is ulaula zan. Egkesina sikandan; ebpemumunù dan; ebpeeg-eg̵etè dan; edtarùtarù dan; ne ebpesipelahan dan is menge zuma zan. Ed-ituk dan,

Ruma 6:13

Kenè ta egemiten is minsan hengkey he vahin te lawa ta te ked-ulaula te mezaat, kekenà, idtug̵ut ta he iyan ebayàbayà kenita is Megbevayà su zait heini kenita te nelibri en te kemetayen ne mibeg̵ayan te veg̵u en he untung. Ne idtug̵ut ta he iyan egamit te lawa ta is Megbevayà wey ta meulaula is metazeng.

Ruma 6:6

Su netuenan tew he is daan he mesinupaken he kegkeetew tew, ne iring te inransang duma ki Kristu ziyà te krus su wey mebpatey. Ne tenged kayi, egkeawà is layun tew kebpekesalà ne human dutun kenè kiw en egkeuripen te ked-ulaula te mezaat.

Ruma 7:23

Iyan, dini te lawa ku, selakew is ebayàbayà kedì su edsug̵uen a te menge mezaat he kebayà te lawa ku he supaka ku is hustu he ulaula he egkesuatan te g̵ehinawa ku. Uripen a te mezaat he kebayè ku, ne ebpeketuman a te suat te lawa ku.

Ruma 7:5

Su zengan hein kemulu tew pa edtumana is kenitew he kebayà, duen menge ulaula he indawey te kesug̵uan, ne tenged te indawey heini, ne nasì nehimu he iyan daan heini utew tew egkesuatan te ed-ulaula. Ne tenged te mid-ulaula tew is iring dutun, iyan dà egkepaabut tew zengan is kemetayen he wazè din pidtemanan.

Ruma 8:13

Su emun kenè niw iyan ed-iniyug̵an is menge suat te lawa niw, edsilutan kew te kemetayen he wazè din pidtemanan, iyan, ke pinaag̵i te kedtavang te Wag̵as he Mulin-ulin egkeiniyug̵an niw is menge mezaat he ulaula niw, ebeg̵ayan kew te untung he wazè din pidtemanan.

1 Kurintu 5:1

Duen nezineg ku, menge suled, he zuen sevaha keniyu he utew meremerik is ulaula zin. Duen kun maama ziyan he migkumpadi zin is esawa te amey zin. Ne minsan is menge etew he wazà medtuu te Megbevayà, wazà ulaula zan he utew mezaat he iring keniyan!

1 Kurintu 6:11

Iring kayi is ulaula zengan te zuma keniyu, iyan, guntaan, nelumpiyuwan kew en te menge ulaula niw he mezaat ne nehimu kew en he menge g̵aked te Megbevaya. Ne pinaag̵i te g̵ehem te ngazan te Nengazen tew he si Jesu Kristu wey pinaag̵i te ked-ulini keniyu te Wag̵as he Mulin-ulin he ebpuun te Megbevayè tew, mid-isip kew en he metazang te Megbevayà.

1 Kurintu 6:13

Ne ke zuen daan egkag̵i he umba mibeelan te Megbevayà is getek ta su wey mahantey te egkeenen, ne utew zaan benar heeyan, iyan, duen timpu keuzemà he wazè en pulus te g̵etek ta ne wazà daan dutun pulus te egkeenen su id-awà keuzemà te Megbevayà is kegemita kayi. Ne iring din ded daan is lawa ta, su kenà egkehimu he egemiten ta is lawa ta wey mahantey is suat ta zuen te etew he kenè ta esawa. Su wazà limbag̵a te Nengazen is lawa tew su wey tew meulaula is meremerik, kekenà, iyan inlimbag̵a zin su wey pinaag̵i kayi mezalig sikandin. Ne iring din ded daan pinaag̵i te Nengazen tew he si Jesus edtulusen keuzemà is lawa tew.

1 Kurintu 6:18

Likayi niw is kegkevuta te kenè niw esawa su utew heeyan mezaat he salà. Is duma he menge salà ne mezaat daan, iyan, kenà pinaag̵i te lawa. Haazà is meremerik he ulaula, ne utew ebpekezezaat kenitew su pinaag̵i te lawa ta.

2 Kurintu 12:21

Egkesemukan a su kela ke zutun te kebpekeuma ku ziyan ne igkeeled ku sikiyu ziyà te Megbevayà ne kela ke utew a egkeseeng tenged te mezakel he netuenan ku zengan he nekevaal te mezaat ne wazè dan pa engkezi is menge mahawag he ulaula zan iring te kedhilavet te kenè dan esawa wey is kedtumana zan te mezaat he kebayè dan.

Gelasya 5:24

Ne is minsan hentei he migaked en ni Jesu Kristu, ne iring te inransang din en te krus is mekesesalà he lawa zin, he ke và dà egkeg̵iya, mid-engkezan din en is menge mezaat he kebayè din wey egkesuatan din.

Ipisu 4:19

Kenè dan en igkeeled is minsan hengkey he ulaula zan he mezaat. Ne kenè dan daan ed-eg̵enen is mahawag he kebayà te lawa zan, kekenà, utew zan en egkesuati is meremerik he ulaula.

Kulusas 2:11

Ne tenged kayi, minsan kenè kew menge Hudiyu, is midhimu keniyu te Megbevayà, ne iring duen te kedsirkunsidara zengan te menge Hudiyu su nehimu kew en he menge g̵aked te Megbevayà pinaag̵i te kebpekidsevaha niw ki Kristu. Iyan, selakew heini, su kenà pinaag̵i te kebpelii te lawa zà duen, kekenà, in-awà ni Kristu is gehem te mezaat he kebayà te lawa niw.

1 Tiselunika 4:3

Iyan egkesuatan te Megbevayà is: kinahanglan he zait is menge ulaula niw te etew he g̵aked din. Kinahanglan he kenè niw hileveti is kenè niw esawa.

1 Tiselunika 4:5

ne kenà tenged te egkeveyveyaan sikandin te suat te lawa zin, su iyan heeyan egkeulaula te menge etew he wazà medtuu te Megbevayà.

1 Timoteo 6:10

Su ke zuen etew he susuaten te selapì ne egkehimu he egkeulaula kandin is minsan hengkey he mezaat. Pinaag̵i kayi neiniyug̵an te zuma is tuluuwen tew ne tenged kayi nehimu he utew mezakel is menge keseengan dan.

Hibriyuhanen 12:16

Bantey kew su wey wazà minsan sevaha keniyu he meremerik is ulaula zin wey ke ed-iniyug̵an din be is Megbevayà su iring kayi si Esau zengan. Is ketenged din te kegkekakey he anak, inliwè din te keenen he sengepegkaan dà.

Hibriyuhanen 13:4

Kinahanglan he tehuza niw te langun is ked-es-esawa niw. Kinahanglan he wazà minsan hentei he edselselaan din is esawa zin. Edsilutan te Megbevayà is etew he meremerik is ulaula zin wey is etew he edselselaan din is esawa zin.

Hibriyuhanen 13:5

Bantey kew su kela ke utew subra is suat niw te selapì. Kinahanglan he imeupiye en te g̵ehinawa niw is naazen niw, su migkag̵i is Megbevayà te, “Kenè ku sikiyu ed-ewaan ne kenè ku sikiyu ed-engkezan.”

Santiago 4:1

Hengkey is puunà te menge kesevaan wey tebek diyan te keniyu? Iyan is menge mezaat he kebayè niw he ebpekigkuntada te meupiya he ulaula.

1 Pedro 2:11

Menge minahal ku he suled, kenè en hustu he inged tew heini is kelibutan su menge humuhulevungà kiw zà dini. Ne tenged dutun edhengyuan ku sikiyu he kenè niw pezumdumahi is menge mezaat he kebayè niw su ebpekesanggen heini te kedsundan niw te Megbevayà.

Impezayag 21:8

Iyan, sikan is egkehandek he edsundan kedì wey is menge kenà metinumanen, is menge etew he memahawag is ulaula, is menge memumunù, wey is menge meremerik is betasan, is menge keteuwan he etew, wey menge ed-azap te kenà tutuu he Megbevayà wey is langun he teruen he menge etew, iyan egketemanan dan is id-agbur sikandan diyà te ranew he nepenù te egkeregreg he esupri he iyan ikezuwa he kemetayen,” ke sikandin.

Impezayag 22:15

Iyan, diyè dà te meziyù is mekeeled-eled is baal zin, wey is menge keteuwan, is memeremerik is ulaula, is menge memumunù, is ebpemenimba te menge ledawan wey is langun he menge etew he ebpenurù te tarù wey is etew he limbung is ulaula zin.