Kulusas 3:22 - Manobo Western Bukidnon

²² Ne sikiyu is sulug̵uen, layun niw pemineg̵a is sug̵ù te egalen niw te minsan keenu he timpu, ne kenà dutun dà te timpu he ebentayan kew zin. Ne kenè niw iyan dà ibpemineg̵a kandin su wey meupiya is isip din keniyu, kekenà, kinahanglan he iyan ketezengan ke maan is ebpurungan niw is baal niw su g̵eina te zekelà is kedtahud niw te Nengazen tew.

Kulusas 3:22 Кръстосани препратки

Mateo 6:22

Is mata ta, ne iring te sulù kayi te lawa ta su emun merayag is ked-ehè ta, he ke và dà egkeg̵iya, metazeng is ulaula ta, ne henduen be te egketeyawan is tivuuk he lawa ta.

Mateo 8:9

Netuenan ku heini su iring te zuen ebayàbayà kedì, ne zuen daan menge sundaru he ebeyveyaan ku. Ne edsug̵uen ku is sevaha he medhipanew ne edhipanew en. Ne edtewag̵en ku is sevaha he medhendini ne edhendini en; ne edsug̵uen ku zaan is sulug̵uen ku ke zuen ebpeveelan ku ne ebeelan din en. Ne iring din ded daan diyan te kenikew su is egkeg̵iyen nu ne egkehimu en.”

Lucas 6:46

Ne mid-uman megkag̵i si Jesus te, “Maan is egkeg̵iyen niw he iyan a egalen niw, iyan, kenè niw edtumanen is menge sambag ku keniyu.

Lucas 7:8

Netuenan ku heini su iring te zuen ebayàbayà kedì ne zuen daan menge sundaru he ebeyveyaan ku. Ne edsug̵uen ku is sevaha he medhipanew ne edhipanew en. Ne edtewag̵en ku is sevaha pa he medhendini ne edhendini en. Ne edsug̵uen ku zaan is sulug̵uen ku ke zuen ebpeveelan ku ne ebeelan din. Ne iring din ded daan diyan te kenikew su is egkeg̵iyen nu ne egkehimu en.”

Nengeulaula 2:46

Ne kada andew edtig̵um is langun he menge tumutuu zuen te zekelà he simbahan he egngezanan te Valey te Megbevayà. Ne egkesevaha zan daan he utew melipayen te kegkaan dan dutun te menge valey zan wey kebpevegbeg̵ayè dan.

2 Kurintu 7:1

Ne g̵eina te iyan heini impenaad kenita te Megbevayà, ne edlumpiyuwen ta is menge ulaula ta su wey wazà minsan hengkey he meremerik he ulaula te lawa ta wey meremerik he isip ta. Ne ebpurungan ta is ulaula ta su wey meheg̵eti is kebmetazeng ta pinaag̵i te layun ta kedtehuza kandin.

Gelasya 1:10

Kunaan niw vuwa ke iyan netag̵ù te g̵ehinawa ku is: egkesuat a he zelig̵a a te menge etew. Iyan, kenà iyan heini netag̵ù te g̵ehinawa ku, kekenà, iyan is kebpenunuata ku te Megbevayà. Kunaan niw vuwa zaan ke egkesuatan ku he ibmeupiya te g̵ehinawa te menge etew is menge ulaula ku, iyan, kenà daan iyan egkesuatan ku su emun iyan egkesuatan ku, kenà egkehimu he sulug̵uen a ni Kristu.

Kulusas 3:20

Sikiyu is menge vatà he tumutuu te Nengazen, pemineg̵a niw layun is menge sug̵ù te g̵inikanan niw su utew heini egkesuati te Megbevayà.

1 Tiselunika 2:4

Nezawat key te Megbevayà ne insarig din kenami is kebpesavut te Meupiya he Tudtulanen, ne tenged kayi ebpenudtul key. Kenè dey iyan tuyù is kebpenunuata te menge etew su iyan tuyù dey is kebpenunuata te Megbevayà. Iyan sikandin metau he ebpenggezam kenitew wey metueni he hustu is tuyù dey.

Pilimun 1:16

Ne g̵untaan kenà sikandin uripen nu zà duen, kekenà, utew pa mahal kenà is uripen su suled nu en daan tenged te kedtuu zin ki Kristu. Utew sikandin mahal zini te g̵ehinawa ku ne mahal pa zaan diyan te kenikew, kenà tenged dà te uripen nu, kekenà, tenged daan te suled nu en tenged te Nengazen.