Kulusas 3:16 - Manobo Western Bukidnon

¹⁶ Menge suled, layun niw zewata is impesavut ni Kristu. Pepempenuruey kew wey mebpesemsembag̵è kew sumalà is ketau te kada sevaha. Kanta kew te menge idalig te Megbevayà, wey menge Salmo, wey elin daan is menge kentahan he ibpinted keniyu te Wag̵as he Mulin-ulin. Kentahi niw is Megbevayà he utew zekelà is kebpeselemati niw kandin.

Kulusas 3:16 Кръстосани препратки

Mateo 26:30

Ne zutun migkanta zan te kedalig te Megbevayà ne hein nepasad haazà migawas dan ne midhendiyè dan te vuvungan he egngezanan te Ulivuwan.

Lucas 2:51

Miduma kandan si Jesus te ed-ulì diyà te Neserit su mepezumdumahan sikandin te g̵inikanan din. Ne wazà melipati te iney zin haazà is langun he neulaula, kekenà, netipig̵an diyà te isip din.

Juan 15:7

Ne sikiyu, emun kenè kew edsuwey kedì ne edhemenan niw is menge penurù ku, is minsan hengkey he ebuyuen niw kediey, ibeg̵ey ku keniyu.

Ruma 10:17

Ne wey zà ebpeketuu is etew emun egkezineg din is kebpesevuta te tutuu he tuluuwen, ne is tutuu he tuluuwen, ne iyan is kebpesavut mehitenged ki Kristu.

Ruma 15:14

Menge suled, netuenan ku en he layun meupiya is menge ulaula niw, ne netuenan ku zaan he nepurung niw en mesavut is Lalag te Megbevayà, ne egkehimu en he ebpekepenurù kew te zuma.

1 Kurintu 14:15

Tenged kayi egkesuatan ku he mekeampù a he ed-ulinan te Wag̵as he Mulin-ulin, iyan, egkesuatan ku zaan he mesavut te menge zuma ku ke hengkey is egkeg̵iyen ku. Ne emun egkanta a, egkesuatan ku he ed-ulinan a is egkanta te Wag̵as he Mulin-ulin, iyan, kinahanglan daan he egkesavut haazà is egkentahan ku.

1 Kurintu 14:26

Umba, menge suled, ke edtig̵um kew, iyan heini meupiya he ed-ul-ulahan. Meupiya ke zuen sevaha he andam te kegkanta te kedalig te Megbevayà, ne is sevaha, ebpenurù, ne is sevaha, idseysey zin is impesavut kandin te Megbevayà, ne zuen sevaha he egkag̵i te kineg̵iyan he kenè din egketuenan, ne zuen daan sevaha he edluwas kayi. Ne minsan hengkey he ed-ul-ulahan niw zutun ne kinahanglan he ebpekeheg̵et te kedtuu te menge tumutuu.

Ipisu 1:17

Is Megbevayà te Nengazen tew he si Jesu Kristu he iyan daan Amey tew he zait he ebentug̵en, edhengyuan ku layun sikandin he pinaag̵i te Wag̵as he Mulin-ulin, ne iveg̵ey zin keniyu is ketau wey ipeg̵awag̵awa zin keniyu is kegketueni niw te menge ulaula zin.

Ipisu 5:17

Kenè niw ul-ulaha is wazè din pulus he ulaula, kekenà, purungi niw sevuta ke hengkey is ebpeveelan keniyu te Megbevayà.

Ipisu 5:19

Emun ebpelelelag̵è kew, gemita niw is menge lalag diyà te menge Salmo wey menge kentahan he idalig te Megbevayà, wey menge kentahan he ibpinted keniyu te Wag̵as he Mulin-ulin. Kentahi niw is Megbevayà ne pinaag̵i kayi te menge kentahan wey te menge Salmo, medlipey kew is edalig te Megbevayà.

Ipisu 5:26

ne wey kiw mezawat te Megbevayà. Midhimu zin heini pinaag̵i te kedlumpiyuwi zin kenitew pinaag̵i te kebewtismu wey pinaag̵i te lalag din.

Kulusas 1:28

Sikami, idsangyew zey si Kristu; edleg̵uyan dey is minsan hentei, wey ebpenurù key kandan ebpurung sumalà is egkehimu zey he ketau su wey meketuu is langun ki Kristu, ne wey sikandan keuzemà ikepeetuvang diyà te Megbevayà he wazà kurang te kedtuu zan.

Kulusas 1:9

Ne tenged kayi ibpenigudu zey sikiyu id-ampù puun pa zutun te andew zengan he nezineg dey is tudtul mehitenged te kedtuu niw. Layun dey id-ampù diyà te Megbevayà he veg̵ayi kew zin te kegkesayud te langun he ulaula he ebpeveelan din keniyu, he ke và dà egkeg̵iya, mehimu kew zin he mebmetau ne pinaag̵i te Wag̵as he Mulin-ulin, iveg̵ey zin keniyu is kegketuusi te meupiya wey mezaat.

Kulusas 4:6

Kinahanglan he layun ibmeupiya te g̵ehinawa te menge etew is menge lalag niw kandan ne kinahanglan daan he iyan niw keg̵iya kandan is menge lalag he zuen din pulus ne emun ed-ul-ulahan niw heini, ne egketuenan niw ke hengkey is hustu he ketezengan he idtavak diyà te kada sevaha he etew.

1 Tiselunika 1:8

Ebpuun diyan nekeeneb is Lalag te Nengazen, kenà diyan dà te prubinsya he Mesidunya wey ziyà te prubinsya he Gerisya, kekenà, is menge etew ziyà te minsan hendei, nezineg dan is tudtul mehitenged te kedtuu niw te Megbevayà. Wazè en kinahanglan he ibpenudtul zey pa ziyà te menge etew is kedtuu niw.

1 Tiselunika 4:18

Umba ipedlilipayè niw heini is egkeg̵iyen ku.

2 Tiselunika 3:15

iyan, kenè niw isipa he kuntada niw, kekenà, penurua niw he iring te suled niw.

1 Timoteo 6:17

Is menge tumutuu he mezakel is menge azen dan, keg̵iyi nu he kenè dan mebpelavew wey kenè dan medsarig te menge azen dan su kenè ta egketuenan ke keenu ki egkeewai te menge azen ta. Keg̵iyi nu he iyan dan serig̵i is Megbevayà su iyan sikandin metulanged. Is minsan hengkey he naazen ta, imbeg̵ey zin kenita wey mebmeupiya is kebpekesavuk ta.

2 Timoteo 3:15

ne egketenuzan nu he zengan te vatè ke pa nesavut nu en is insurat he Lalag te Megbevayà. Dutun te lalag din ebpuun is kedsavut he iyan paag̵i te kedlibriya kenita te silut emun edtuu ki ki Jesu Kristu.

Tito 3:6

Midhimu te Megbevayà he mepurung ki meulini te Wag̵as he Mulin-ulin pinaag̵i te kebpehimatey ni Jesu Kristu he Menluluwas tew.

Santiago 1:5

Ne ke zuen minsan hentei keniyu he egkereg̵enan su kenè din egketuenan ke hengkey is meupiya he paag̵i, mebuyù te ketau ziyà te Megbevayà, ne ebeg̵ayan sikandin su metulanged sikandin ne kenè ki zin edewayen ke ebuyù ki.

Santiago 3:17

Is etew he ziyà ebpuun te Megbevayà is ketau zin, wazà igkesewayi kandin. Melinew is kedepitè din te zuma he etew, ebpurungan din is menge zuma zin; kenà sikandin mevurut, kekenà, mepezumdumahan. Hihizuwen wey metulanged sikandin; wazè din ibpelavi he minsan hentei ne kenà uvag dà is kedtuu zin.

Santiago 5:13

Ke zuen minsan hentei keniyu he egkeseeng, kinahanglan he med-ampù. Ke zuen egkelipey, megkanta sikandin te kedalig te Megbevayà.

1 Juan 2:14

Sikiyu is menge vatà, ebpesuratan ku sikiyu su menge emig̵u kew en te Amey tew he Megbevayà. Iyan ibpesurati ku keniyu te menge meg̵urang is: tenged te emig̵u kew en ni Kristu. Daan en sikandin te wazè pa limbag̵a is minsan hengkey. Iyan ibpesurati ku keniyu te menge menguhed su mevig̵er en is kedtuu niw ne kenà egkeawà diyan te isip niw is Lalag te Megbevayà, wey nezaag niw en si Setanas.

1 Juan 2:24

Is tuluuwen he impenurù keniyu hein aney kew medtuu, kinahanglan he edhemenan niw su emun edhemenan niw kenà egkehimu he kenè kew layun egkesevaha te Amey tew he Megbevayà wey te Anak din he si Jesu Kristu.

1 Juan 2:27

Iyan, sikiyu, wazà kinahanglan he zuen selakew pa he ebpenurù keniyu su mibpeulinan kew en ni Kristu te Wag̵as he Mulin-ulin. Pinaag̵i zutun egkesavut niw is langun he ibpesavut keniyu ni Kristu. Tutuu mulà ne kenà tarù haazà is ibpesavut din keniyu umba kinahanglan he hemeni niw is kebpekidsevaha niw kandin sumalà is impenurù en keniyu.

2 Juan 1:2

Umba minahal zey sikiyu su g̵eina te midhamen kiw en te tutuu he tuluuwen ne heini is tutuu he tuluuwen, kenà egkeawà dini te kenitew te wazà pidtemanan.

Impezayag 14:3

Ne haazà is menge etew, diyè dan te etuvangan te pinuuwà te Megbevayà wey te etuvangan duen te heepat he menge linimbag he kedesenan wey te menge ebmeg̵urangen. Ne migkanta zan dutun is beg̵u he kentahan. Iyan dà netau zutun he egkanta te kentahan, haazà is nenggatus wey kepatan wey heepat he libu he etew he mibelukasan dini te lumpad te kelibutan duen te nati he kerehidu.

Impezayag 15:3

Ne egkentahan dan is kentahan duen te sulug̵uen te Megbevayà he si Moises he iyan sikan is kentahan he idalig dutun te nati he kerehidu. Ke sikandan te, “Sikew is Megbevayà, mekeg̵eg̵ehem ka he Nengazen te langun. Utew zekelà wey utew egkein-inuwi is langun he menge vaal nu! Hadì ka te langun he menge g̵inhedian. Metazeng wey tutuu is menge ulaula nu!

Impezayag 19:10

Ne zutun midlangkeb a ziyà te etuvangan din su ed-ezapen ku pezem, iyan, mibensag̵an e zin te, “Kenà a kenikew ezapa su siak wey sikew wey is langun he menge zuma nu he edtuu te tuluuwen he impenurù ni Jesus, neked-iiring kiw zà he menge sulug̵uen te Megbevayà. Iyan nu zà ezapa is Megbevayà!” Umba migkag̵i zin haazà su sikan is ibpekag̵i te Megbevayà dutun te menge ebpeneuven te Megbevayà, ne iyan sikan is tuluuwen he impenurù ni Jesus.

Impezayag 5:9

Ne egkanta zan te veg̵u en he kentahan, ke sikandan te, “Dait ka he egkuwa te velesahan wey ed-awà te menge tiyap din su mibpehimatey ka ne imbelukas nu is lengesa nu te menge etew wey maangken sikandan te Megbevayà. Ebpemuun sikandan diyà te minsan hengkey he kepuun wey kineg̵iyan wey tribu wey g̵inhedian.