Kulusas 2:8 - Manobo Western Bukidnon

⁸ Andam kew su kela ke zuen egkabig keniyu pinaag̵i te kebpenurù te tuluuwen he tarù ne wazè din pulus su imbilinbilin dà te menge etew. Kenà haazà hustu he tuluuwen su kenà ebpuun diyà te ki Kristu.

Kulusas 2:8 Кръстосани препратки

Mateo 10:17

Andam kew su edekepen kew zan, ne ed-uwiten kew zan diyà te hukmanan, ne ebug̵elen kew zan diyà te menge simbahan dan.

Mateo 16:6

Hein nekerapas dan en, duen sempità he impezineg kandan ni Jesus. Ke sikandin te, “Andam kew wey niw melikayi is tapey te menge Perisiyu wey Sedusiyu.”

Mateo 7:15

Likayi niw is menge ebpeneuven kun te Megbevayà he tarù is ibpenurù dan. Henduen be te hustu sikandan he tumutuu te Megbevayà, iyan, ebpekezezaat is ibpenurù dan.

Nengeulaula 17:18

Ne zuen dutun menge menunudlù te menge penurù dengan ni Ipikuranu wey ni Sinu. Mibpekidibati zan daan ki Pablo. Ne is duma zutun egkag̵i te, “Paglung heini he mepedelig̵en. Hengkey vuwa pezem is egkeg̵iyen din?” Ne is duma egkag̵i te, “Iyan buwa ibpesavut din is menge selakew pa he menge ziwata he edsimbahan diyà te meziyù he inged.” Umba egkekag̵i zan haazà su impesavut kandan ni Pablo is keag̵i ni Jesus wey is kegkevanhew zin.

Nengeulaula 17:32

Ne hein nezineg dan haazà is kegkevanhew he nekag̵i ni Pablo, is duma zutun midsumpalit dan sikandin. Iyan, duen duma he egkag̵i te, “Likù ka kayi su egkesuat key pa he ebpemineg te kedseysaya nu kayi.”

Ruma 16:17

Menge suled, edhengyuen ku keniyu he mebantey kew, ne likayi niw is menge etew he edsamuk te kebpekidsevaha niw wey kedtuu niw te menge tumutuu su edsupaken dan is tutuu he tuluuwen he impenurù keniyu.

1 Kurintu 10:12

Ne tenged kayi, haazà is etew he egkeisip din he mezesen en is kedtuu zin, ne kinahanglan he purungi zin pa heg̵eta is kedtuu zin su kela ke mekesalà sikandin gihapun.

1 Kurintu 8:9

Ne minsan pa zutun kinahanglan he purungi niw isipa heini is intug̵ut en keniyu su kela ke tenged keniyu egkesanggen is kedtuu te sevaha he wazè pa sikandin mekesavut te hustu.

2 Kurintu 10:5

Ne iyan heini egemiten dey te kedeeg̵a te menge tarù he ketezengan te menge mepedelig̵en he etew he kenà egkesuat he edtuu te ibpesavut te Megbevayà. Ne minsan is ked-isipa zan te tarù, egkehimu he ed-ilisan dey su wey zan human meisip is tutuu ne pinaag̵i kayi ebpemineg̵en dan is menge sug̵ù ni Kristu.

Gelasya 1:14

Is menge zuma ku he menge Hudiyu he serenganè ku te penuig̵en, wazà nekerepeng kedì te kebenteyani ku te menge tuluuwen dey te menge Hudiyu. Ne wazà kandan kedì nekerepeng te kebenteyani te imbilinbilin he menge vetasan te g̵inepuan dey.

Gelasya 4:3

Ne iring kiw zaan dutun su neveyveyaan kiw zengan te menge kenè pa hustu he tuluuwen dini te kelibutan su iring kiw pa te menge vatà is ebantey te langun dutun.

Gelasya 4:9

Iyan, guntaan te nekilala niw en is Megbevayà iring te kegkekilelaa zin keniyu, maan is edlikuan niw is wazà pulus he menge tuluuwen he kenà ebpekelibri keniyu te silut? Maan is egkesuatan niw he meuripen kew en maan kayi?

Gelasya 5:15

Iyan, emun iyan niw zà ed-ul-ulahan is kebpepespesipelehey wey kebpeeg-eg̵età, ne egkepurung egkezeeti is upakat niw te menge tumutuu ki Kristu.

Ipisu 2:2

Dutun he timpu mid-ikul niw is mezaat he ibayà he iyan ed-ikulen te menge etew he kuntada te Megbevayà. Midtuman kew te menge sug̵ù ni Setanas. Iyan sikandin ebayàbayà te menge zuen din gehem diyà te hewhewanan. Iyan daan sikandin ebayàbayà te langun he kenà ebpemineg te menge sug̵ù te Megbevayà.

Ipisu 4:20

Ne sikiyu mulà, dutun te kebpeketuu niw ki Kristu, kenà iyan heini sikan is impenurù keniyu.

Ipisu 5:6

Su tenged kayi he menge ulaula, utew egkepeuki te Megbevayà keuzemà is menge etew he kenà ebpemineg te menge sug̵ù din. Ne tenged dutun, kenè niw itug̵ut he meketuu kew te tarù he penurù te minsan hentei he etew pinaag̵i te menge ketezengan dan he kenà tutuu.

Pilipus 3:2

Likayi niw is menge kuntada te Megbevayà he mezaat is ulaula zan he iyan is menge Hudiyu he ebpenurù he iyan egkesuatan te Megbevayà is kebpelii niw te lawa niw.

Kulusas 2:18

Duen daan menge etew he egkag̵i he lavew sikandan tenged te zuen kun menge egkein-inuwan he impaahà kandan wey tenged te kenè dan mepelevawen. Ne ibpenurù dan he kinahanglan he ebpekeazap ki te menge velinsug̵uen te Megbevayà ziyà te langit. Kenè niw, menge suled, itetenged is kedsudì dan keniyu su is iring dutun he etew, ne ebpezalig dà, iyan, wazà hustu he ketezengan te kebpezalig dan su iyan ebayàbayà te isip dan is kelibutanen he kebayè dan.

Kulusas 2:20

Na, menge suled, geina te iring te minatey ki en duma ki Kristu, wey kenè ki en maan egkeveyveyaan te menge kenà hustu he tuluuwen, kinahanglan he kenè kew en maan mebpemineg te menge sug̵ù te menge etew he menge kuntada te Megbevayà. Menge sug̵ù heini te menge etew zà duen. Egkag̵i zan he zuen menge egkeenen he kenà ibpekaan kenitew te Megbevayà, ne minsan is kegezami wey is kegewezi zà kayi ne wazè din kun itug̵ut kenitew. Kenè niw, menge suled, pemineg̵a is iring dutun su wazà pulus te idawey zan su emun egkeenen tew is egkeenen ne egkeawà heini.

Kulusas 2:23

Haazà is menge etew, henduen be te hustu is ibpenurù dan. Egkag̵i zan he kinahanglan he ed-ezapen ta is menge velinsug̵uen te Megbevayà, wey kinahanglan he ebminusen ta is pid-etawan ta wey kinahanglan daan he edresayen ta is lawa ta. Ne minsan pa kayi, kenà hustu heini is ibpenurù dan su is menge sug̵ù he iring kayi, ne kenà heini ebpeketavang kenita te kedsukul te mezaat he kebayà te lawa ta.

1 Timoteo 6:20

Sikew Timoteo, purungi nu tumana is tuluuwen he insarig kenikew. Likayi nu is menge etew he supak te Megbevayà is kegkag̵ikag̵i zan. Likayi nu zaan is kunaan te zuma ke tutuu en he ketau.

2 Timoteo 3:13

Iyan, is menge lalung he etew, wey is menge uvag kun tumutuu, ed-iseg mulà ebmezaat is menge ulaula zan. Edtezinen dan is isip te menge etew, iyan, egketazin daan is kandan he isip.

Hibriyuhanen 13:9

Umba, kenè niw tuuwi is menge selakew he tuluuwen he kenà iyan kes tutuu he impenurù keniyu. Iyan hustu he ibmelig-en te kedtuu tew is kedtevangi kenitew te Megbevayà, ne kenà iyan is kedlikayi te menge egkeenen he indawey te kesug̵uan su wazà heini ikezeyzey te menge etew he ebantey kayi.

Hibriyuhanen 3:12

Umba, menge suled, susiya niw is gehinawa niw. Kinahanglan he wazà minsan sevaha keniyu he mezaat is ed-isipen din nè wazè din kedtuu, su pinaag̵i kayi egkeengkezan din is wazè din kemetayen he Megbevayà.

1 Pedro 1:18

Netuenan ta he utew mahal is imbelukas din kenita. Su nengeuripen ki zengan te menge ulaula he wazà pulus he imbilinbilin kenita te menge kepuun ta. Sikan is imbelukas din kenita, ne kenà iring te selapì wey vulawan he egkeawà is bali zin.

2 Pedro 3:17

Minahal ku he menge suled, geina te netuenan niw en heini he zaan, andam kew su wey kenè kew meketuu te menge tarù he ibpenurù te menge lalung he etew ne egkelipatan niw is tutuu he tuluuwen he midtuuwan niw.

2 Juan 1:8

Andam kew wey kenà maawà diyan te keniyu is midheg̵uan niw su wey kenà meterini keuzemà is suhul te Megbevayà keniyu.