Kulusas 2:12 - Manobo Western Bukidnon

¹² Ne tenged kayi inleveng kew zuma kandin dutun te kebewtismuwi keniyu, ne nevanhew kew zaan duma kandin su nekidsevaha kew kandin tenged te midtuuwan niw he mekeg̵eg̵ehem is Megbevayà. Iyan sikandin sikan is mibanhew ki Kristu.

Kulusas 2:12 Кръстосани препратки

Lucas 17:5

Ne migkag̵i haazà is menge epustul diyà te ki Jesus te, “Heg̵eta nu is kedtuu zey.”

Nengeulaula 14:27

Ne hein nekeuma zan diyà te Entiyukya, midtig̵um dan is menge tumutuu ne midtudtul zan is langun he nehimu te Megbevayà pinaag̵i kandan wey is kedhimuwa zin te paag̵i wey meketuu is menge etew he kenà Hudiyu.

Nengeulaula 2:24

Iyan, midlibri si Jesus te Megbevayà ne mibanhew zin su kenà egkehimu he egkevakus si Jesus te kemetayen.

Nengeulaula 2:32

Ne ke si Pedro te, “Iyan egkeg̵iyen din si Jesus he mibanhew te Megbevayà. Ne is langun te sikami, ebpeketistig̵us key he nevanhew su neehè en te menge mata zey.

Ruma 4:24

kekenà, tenged daan kenitew wey tew mesavut he ragkes kiw zaan dutun. Sikitew, ed-isipen kiw zaan te Megbevayà he metazeng emun edtuuwan tew sikandin. Iyan sikandin sikan is mibanhew ki Jesus he Nengazen tew.

Ruma 7:4

Ne iring din ded daan, menge suled, heini is nehitavù kenitew su zutun te kebpatey ni Kristu he elili kenitew, ne mibpatey ki zaan, ne tenged kayi kenè en egkehimu he ibpetuman kenita te minatey en is menge sug̵ù he imbilinbilin ni Moises. Ne umba nehimu heini su wey kiw mesakup ni Kristu he nevanhew en ne wey tew metuman is egkesuatan te Megbevayà.

1 Kurintu 12:13

Ne sikitew is langun, Hudiyu se kenà Hudiyu, sulug̵uen se kenà sulug̵uen, ne pudu kiw mibewtismuwan te sevaha zà he Wag̵as he Mulin-ulin; ne pinaag̵i kayi nehimu kiw en he sevaha zà he lawa, ne mid-ulinan kiw pudu te sevaha zà he Wag̵as he Mulin-ulin.

1 Kurintu 15:20

Iyan, tutuu is egkeg̵iyen ku he nevanhew iyan si Kristu. Ne tenged kayi egketuenan tew he tutuu iyan he egkengevanhew zaan keuzemà is menge minatey su nehuna man mevanhew si Kristu.

Gelasya 3:27

Su midtuuwan niw si Jesu Kristu, ne nebewtismuwan kew he tuus te sumusundan kew zin, ne tenged dutun insun-ud niw si Kristu, he ke và dà egkeg̵iya, neiringan niw is menge ulaula ni Kristu.

Ipisu 2:8

Su tenged dà te g̵ag̵ew zin kenita, midlibri ki zin te silut dutun te kebpeketuu ta. Wazè ki melibri pinaag̵i te kenita he vaal,

Ipisu 3:17

su wey, pinaag̵i te kedtuu niw, melumuni is gehinawa niw ni Jesu Kristu. Ne idhangyù ku zaan he heg̵eti zin wey lig-eni zin is kebmahala niw te minsan hentei. Umba idhangyù ku heini su wey sikiyu,

Ipisu 3:7

Nehimu a he sulug̵uen te Megbevayà te kedsengyawa te Meupiya he Tudtulanen. Tenged dà te g̵ag̵ew zin kediey wey pinaag̵i te g̵ehem din imbeg̵ey zin kediey heini is ketengdanan.

Ipisu 4:5

Sevaha zà is Nengazen tew he iyan si Jesus; iyan dà sikandin edtuuwan tew; sevaha zà daan is imbewtismuwi kenitew.

Ipisu 5:14

Ne mehitenged kayi zuen erubasa he edhenduen te, “Sikew is edlipezeng, gimerat kad; sikew is minatey, ne mevanhew kad ne egketeyawan ka ni Jesu Kristu.”

Pilipus 1:29

Su is mibpeveelan keniyu te Megbevayà, ne kenà iyan dà is kedtuuwi niw ki Kristu, kekenà, elin daan is ked-entusa niw te kemeresayan tenged te kedtuu niw kandin.

Kulusas 1:29

Siak, ebpenigudu a ebaal he edlig-enan te zekelà he zesen ni Kristu su wey metuman heini.

Kulusas 2:13

Ne sikiyu, wazè niw pa zengan untung he wazè din pidtemanan tenged te memezaat is menge ulaula niw te kenà menge Hudiyu wey tenged te midtuman niw is memezaat he kebayà te lawa niw. Ne minsan pa zutun, mibeg̵ayan kew te Megbevayà te untung he wazè din pidtemanan ne nevanhew kew en duma ki Kristu. Mibpesaylu kiw te Megbevayà te langun he menge salè tew.

Hibriyuhanen 12:2

Edhemenan ta is kedsarig ta ki Jesus su iyan sikandin puunà te kedtuu ta ne pinaag̵i zaan kandin egkeheg̵et is kedtuu ta. Mid-antus din is kedrensanga kandin dutun te krus. Ne wazè din ikeeled haazà is kedhimetayi kandin, kekenà, mid-isip din he utew zin igkelipey is egkeulaula zin emun egkeipus haazà is ked-antus din. Ne g̵untaan mibpinuu en sikandin dutun te utew lavew he pinuuwà su ziyà te zapit te egkekewanan te Megbevayà.

Hibriyuhanen 6:2

Kenè tew ed-ul-ulitan is ked-istudyu te kebpemewtismu, wey is kedewata te Wag̵as he Mulin-ulin, is kegkevenhawa kenita keuzemà, wey is kedsusiya te Megbevayà keuzemà te tivuuk he menusiyà,

1 Pedro 3:21

Ne iyan teg̵ialung kayi te wahig is kebewtismu he ebpekelibri kenitew te silut. Ne haazà is kebewtismu, ne kenà iyan is kedlumpiyuwi te lawa tew ziyà te wahig, kekenà, iyan is kedhengyui tew te Megbevayà he maawè din is menge salè tew. Egkehimu heini tenged te mibanhew zin si Jesu Kristu.