Kulusas 1:5 - Manobo Western Bukidnon

⁵ Umba mezesen is kedtuu niw wey zekelà is gag̵ew niw su kenà egkeawà is perateng niw te langun diyà te langit he integ̵ana keniyu te Megbevayà. Nezineg niw heini zutun te kebpesevuta keniyu te tutuu he penurù he iyan is Meupiya he Tudtulanen.

Kulusas 1:5 Кръстосани препратки

Lucas 12:33

Ivelegyè niw is langun he azen niw ne ipemeg̵ey niw is halin diyà te menge egkengeayuayu. Pinaag̵i kayi egkehimu he zuen ketig̵eyunan niw ziyà te langit. Is menge azen niw ziyà te langit, ne kenà egkezeetan ne kenà egketerinan su wazà ebpenakew ne wazà ipes he ebpekeketket.

Nengeulaula 10:36

Netuenan niw en is Meupiya he Tudtulanen he impesavut te Megbevayà kenami te menge kevuwazan ni Israyil su pinaag̵i ki Jesu Kristu he iyan Nengazen te langun he menge etew, impesavut din he egkeawà is pauk te Megbevayà kenitew.

Nengeulaula 13:26

Ne menge suled,” ke si Pablo, “sikiyu is menge zuma ku he kevuwazan ni Israyil wey kevuwazan ni Abraham, wey sikiyu zaan is kenà Hudiyu he ed-azap daan te Megbevayà, iyan kiw kes mibpeuwitan te Megbevayà te Meupiya he Tudtulanen wey kiw melibri te kedsiluti kenitew.

Nengeulaula 23:6

Ne naahà ni Pablo he menge Sedusiyu is duma zutun te nengetig̵um he menge ebmeg̵urangen, ne is duma, ne menge Perisiyu. Ne tenged dutun, mibpekezag̵ing is egkag̵i te, “Menge suled, Perisiyu a ne Perisiyu zaan is ginikanan ku. Iyan ketezengan ke maan is mid-uwit e zan dini te keniyu g̵untaan is: edtuu a he keuzemà ebenhawen te Megbevayà is menge minatey.”

Nengeulaula 24:15

Is edtuuwan kayi te menge etew, edtuuwan ku zaan su edtuu a he is Megbevayà, ebenhawen din keuzemà is langun he etew, se meupiya is ulaula zin se mezaat is ulaula zin.

Ruma 10:8

Su zuen duma pa he insurat he Lalag te Megbevayà he ebpesavut kenita he utew melemu is kebpeketuu ta te Lalag te Megbevayà su is Lalag te Megbevayà, daan dini te kenita, ne egkehimu he ibpenudtul ta te zuma. Ne heini is Lalag te Megbevayà mehitenged te kedtuu ki Kristu, ne iyan daan edtudtulen dey.

1 Kurintu 13:13

Na, duen tetelu he ebpeveelan kenita he kenà egkeawà. Kinahanglan he edtuuwan ta is Megbevayà, kinahanglan daan he layun ta ebperetenga is kegketuman te impenaad kenita te Megbevayà, ne kinahanglan daan he ebmahalen ta is menge zuma ta. Ne is lavew he meupiya kayi te tetelu, ne iyan is kebmahala ta te menge zuma ta.

1 Kurintu 15:19

Sikitew is tumutuu he uuyag pa, ne zuen egkeperateng tew keuzemà diyà te langit he meupiya pinaag̵i ki Kristu, iyan, ke tarù heini ne iyan kiw mekehizuhizu he menge etew zini te tivuuk he kelibutan su neketuu kiw te tarù.

2 Kurintu 5:19

Iyan ibpesavut dey is: pinaag̵i ki Kristu egkehimu he edhimuwen te Megbevayà is tivuuk he menusiyà he menge emig̵u zin. Ne id-awè din diyà te isip din is menge mezaat he ulaula zan. Ne sikami, insarig din kenami is kedtudtula he egkehimu en he ebpekid-emig̵u te Megbevayà is menusiyà.

2 Kurintu 6:7

ibpenurù dey is tutuu he Lalag te Megbevayà ne edtevangan key te g̵ehem te Megbevayà. Pinaag̵i kayi te langun egketuusan he menge sulug̵uen key te Megbevayà. Iyan kelasag dey wey lembitan dey is metazeng he ulaula.

Gelasya 2:14

Ne hein nesavut ku he ed-ul-ulahan dan is supak te tutuu he impenurù te Meupiya he Tudtulanen, migkeg̵iyan ku si Pedro ziyà te etuvangan te langun kandan, ke siak te, “Sikew, Pedro, sikan is menge tumutuu he kenè tew zuma he Hudiyu, maan is ibpetuman nu kandan is kesug̵uan tew te menge Hudiyu? Su minsan Hudiyu ka, mid-engkezan nu en is kedtumana nu kayi he kesug̵uan,” ke siak.

Gelasya 2:5

Ne wazè dey itug̵ut he meveyveyai key zan te minsan hengkey he paag̵i su wey kenà meumani te tarù is tutuu he Meupiya he Tudtulanen, ne kenà egkezeetan is kedtuu niw.

Gelasya 5:5

Iyan, sikami mulà, pinaag̵i te g̵ehem te Wag̵as he Mulin-ulin wey tenged te kedtuu zey kandin, iyan ebpeebuten dey is kedhimuwa kenami he metazeng te Megbevayà.

Ipisu 1:13

Ne iring din ded daan diyan te keniyu su hein impesavut keniyu is tutuu he tuluuwen he iyan kes Meupiya he Tudtulanen mehitenged te kedlibriya kenitew te silut, nemeketuu kew ki Kristu, ne midhimu kew zaan te Megbevayà he menge sakup din pinaag̵i te kebeg̵aya zin keniyu te Wag̵as he Mulin-ulin he zaan he impenaad din.

Ipisu 4:21

Tutuu iyan he impesavut keniyu is keag̵i ni Kristu ne impesavut daan keniyu is tutuu he tuluuwen he impenurù din.

Kulusas 1:23

Iyan, kinahanglan he kenè niw engkezi is kedtuu te tutuu he tuluuwen, kekenà, lig-eni niw is kedtuu niw ne kenè kew medarà is ebpaabut te langun he impenaad te Megbevayà he nezineg niw zengan hein impenurù keniyu is Meupiya he Tudtulanen. Heini is nekag̵i he Meupiya he Tudtulanen, ne insangyew ziyà te menge etew ziyà te minsan hendei. Siak si Pablo, midsug̵ù a wey ku ikesangyew is Meupiya he Tudtulanen.

Kulusas 1:27

su egkesuatan din he sikitew is menge g̵aked din, ne egkesayud kiw ke hengkey is utew lavew he meupiya he edhimuwen din diyà te langun he menge etew. Ibpesayud din en kenitew he edlumunan kiw ni Kristu ne tenged kayi egketuenan tew he edtulusen kiw keuzemà.

Kulusas 3:16

Menge suled, layun niw zewata is impesavut ni Kristu. Pepempenuruey kew wey mebpesemsembag̵è kew sumalà is ketau te kada sevaha. Kanta kew te menge idalig te Megbevayà, wey menge Salmo, wey elin daan is menge kentahan he ibpinted keniyu te Wag̵as he Mulin-ulin. Kentahi niw is Megbevayà he utew zekelà is kebpeselemati niw kandin.

1 Tiselunika 2:13

Ne elin daan layun dey ibpeselemati te Megbevayà is: hein impesavut dey keniyu is Lalag te Megbevayà, midawat niw su nesavut niw he Lalag te Megbevayà ne kenà lalag te etew zà duen. Su pinaag̵i te lalag din egkelig-enan is kedtuu tew te nemeketuu kandin.

2 Tiselunika 2:16

Berakat he lipaya kew wey lig-eni kew te Nengazen tew he si Jesu Kristu wey te Amey tew he Megbevayà su wey meupiya is langun he menge vaal niw wey is langun he menge lalag niw. Mahal kiw layun diyà te g̵ehinawa zin ne pinaag̵i te g̵ag̵ew zin kenitew zuen tew igkelipey he wazè din pidtemanan wey zuen tew zaan utew meupiya he ebperetengen.

1 Timoteo 1:15

Duen erubasa he utew tutuu ne kinahanglan he tuuwi te minsan hentei; ne iyan is: “Midhendini si Jesu Kristu te kelibutan wey zin libriya te silut is menge mekesesalà.” Ne siak, iyan a tuwas he lalung te langun kandan.

2 Timoteo 4:8

Ne g̵untaan integ̵ana en kedì te Nengazen is suhul he iyan ibeg̵ey zin diyà te langun he memetazeng he etew. Ibeg̵ey zin heini keuzemà te andew te kedsusiya zin te nengeulaula te tivuuk he menusiyà. Iyan sikandin kes metazeng is kedsusi zin. Ne kenà iyan e zà midteg̵enahan din te suhul, kekenà, midteg̵enahan din daan is langun he utew egkeg̵alew ke ebpekelikù sikandin.

Hibriyuhanen 7:19

su kenà egkehimu he ed-isipen kiw he metazeng pinaag̵i te kedtumana kayi. Ne tenged kayi, imbeg̵ey en kenitew te Megbevayà is meupiya pa he egkeserig̵an he paag̵i. Ne pinaag̵i kayi, egkehimu he pinaag̵i te ked-azap tew ebpekeetuvang kiw en te Megbevayà.

1 Pedro 2:2

Ed-iring ki zuen te vatà he kemulu pa edsusu he layun egkesuat te g̵atas. Kinahanglan he layun ki ed-inum te g̵atas he iyan is wag̵as he Lalag te Megbevayà su wey layun mebmezesen is kedtuu ta taman te timpu keuzemà he edtulusen ki te Megbevayà.

1 Pedro 3:15

Layun niw isipa he iyan egalen niw si Kristu. Layun niw endama is tavak ke zuen ed-insà keniyu ke maan is ebpekesarig kew te Megbevayà.

2 Pedro 1:12

Minsan pa te nesavut niw en heini is langun wey meheg̵et en is kedtuu niw te tutuu he tuluuwen, kinahanglan he layun ku heini ibpezineg keniyu.

1 Juan 3:3

Is minsan hentei he ebperateng te kedlikù ni Kristu, layun din ebpurungi is menge ulaula zin su wey wazà mezaat iring te wazà daan mezaat he ulaula ni Kristu.