Kulusas 1:10 - Manobo Western Bukidnon

¹⁰ Su emun ebeelan din is iring kayi, ne human egkehimu is menge ulaula niw he zait he menge ulaula te menge etew he neg̵aked te Nengazen tew, ne egkehimu zaan he layun niw egkeveeli is egkesuatan din; layun niw egkeulaula is minsan hengkey he menge meupiya he ulaula. Ne layun daan ed-iseg is kegketueni niw te menge ulaula te Megbevayà.

Kulusas 1:10 Кръстосани препратки

Juan 15:16

Kenè kew iyan nekepilì kediey, kekenà, iyan a nekepilì keniyu. Intezù ku sikiyu wey kew mekepemeg̵as te menge meupiya he ulaula ne wey kenà daan mahanew is beg̵as niw. Ne is minsan hengkey he ebuyuen niw ziyà te Amey ku he Megbevayà tenged te kedtuu niw kediey, ibeg̵ey zin keniyu.

Juan 15:8

Emun ebpenigudu kew ebpemeg̵as, he ke và dà egkeg̵iya, ke layun meupiya is menge vaal niw, egkezelig̵an te menge etew is Amey ku he Megbevayà ne egketuenan he tutuu kew iyan he menge sumusundan ku.

Juan 17:3

Ne iyan heini paag̵i he egkezawat dan is untung he wazà pidtemanan. Kinahanglan he egkesavut dan ke hentei ka is sevaha zà he tutuu he Megbevayà wey kinahanglan he egkesavut dan daan ke hentei a is Anak nu he si Jesu Kristu.

Ruma 1:13

Egkesuatan ku, menge suled, he metueni niw he kenà egkeawà dini te isip ku is kegkesuat ku te edhendiyan, iyan, kenè e pa g̵untaan ebpekehendiyan su zuen edsanggen kedì. Egkesuat a he edhendiyan su pinaag̵i te kebpenurù ku, kela ke zuen menge etew ziyan he ebpeketuu ki Jesus, iring te pinaag̵i te kebpenurù ku, duen menge kenà Hudiyu zaan diyà te zuma he menge inged he nemeketuu kandin.

Ruma 4:12

Ne nehimu zaan si Abraham he kepuun, he ke và dà egkeg̵iya, egkeiringan te langun he menge Hudiyu he kenè dan iyan serig̵i is kedsirkunsidara kandan, kekenà, iyan dan serig̵i is kedtuu zan he iring te kedtuu ni Abraham te wazè pa sikandin sirkunsidara.

Ruma 6:4

Su pinaag̵i te kebewtismuwi kenita tenged te elili ta si Jesus, nehimu he iring te iyan ki minatey wey inleveng duma kandin. Ne nehimu heini su wey meveg̵ayi ki te veg̵u he untung iring te mibanhew si Kristu pinaag̵i te g̵ehem te Amey tew he Megbevayà.

2 Kurintu 2:14

Ne minsan pa zutun utew zekelà is kebpeselemati ku te Megbevayà su tenged te kebpekidsevaha tew ki Kristu, iring kiw te menge vihag ni Kristu he ibpeehè din diyà te minsan hentei. Ne pinaag̵i kenitew ibpesavut din diyà te menge etew ke hentei sikandin diyà te minsan hendei.

2 Kurintu 4:6

Su zutun te kedlimbag̵a te Megbevayà te langun migkag̵i sikandin te, “Maawà is kerusireman ne mehimu is kerayag.” Ne iyan daan sikandin kes midtayew te isip dey su wey zey mesavut ke hengkey is gehem te Megbevayà he impezayag pinaag̵i ki Jesu Kristu.

2 Kurintu 5:9

Iyan, ke minsan hendei ki, ke zini ki te kelibutan wey ke ziyè ki ve te ed-ubpaan te Megbevayà, iyan utew ta egkesuati is kedtumana ta te egkesuatan te Megbevayà.

2 Kurintu 9:8

Ne egkehimu te Megbevayà he ibeg̵ey zin kenita is subra pa zutun te egkinehenglanen ta, su wey ta layun maazen is langun he menge kinahanglan ta wey zuen ta zaan subra he igketavang ta te zuma.

Ipisu 1:17

Is Megbevayà te Nengazen tew he si Jesu Kristu he iyan daan Amey tew he zait he ebentug̵en, edhengyuan ku layun sikandin he pinaag̵i te Wag̵as he Mulin-ulin, ne iveg̵ey zin keniyu is ketau wey ipeg̵awag̵awa zin keniyu is kegketueni niw te menge ulaula zin.

Ipisu 2:10

Su is kedlimbag̵a kenita he veg̵u, ne iyan baal te Megbevayà. Pinaag̵i te kebpekidsevaha ta ki Jesus midlimbag ki zin su wey ta meulaula is meupiya he midteg̵ana zin en he zaan wey ta meveeli.

Ipisu 4:1

Ne tenged kayi te langun, siak is pirisu tenged te midtuman ku is menge sugù te Nengazen, edhengyuan ku sikiyu he g̵eina te midhimu kew te Megbevayà he menge tumutuu zin, ul-ulaha niw is ulaula he zait he ed-ul-ulahan te tumutuu.

Ipisu 4:13

Pinaag̵i kayi egkehimu human he egkesevaha kiw te kedtuu tew wey kegketueni tew te menge ulaula te Anak te Megbevayà. Ne zutun egkepurung egkeheg̵et is kedtuu tew ki Jesus ne zutun wazà kurang te menge ulaula tew iring te wazà daan kurang te menge ulaula ni Kristu.

Ipisu 5:10

Purungi niw istudyuwi ke hengkey is menge ulaula he egkesuatan te Nengazen.

Ipisu 5:15

Umba, menge suled, pekeventayi niw is menge ulaula niw su wey kew mehimu he menge metau, ne kenà menge paglung.

Ipisu 5:2

Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

Pilipus 1:11

Ne zutun egkeveelan niw is minsan hengkey he metazeng he ulaula tenged te g̵ehem he ibeg̵ey ni Jesu Kristu su wey mezalig wey mevantug is Megbevayà.

Pilipus 1:27

Menge suled, ke minsan hengkey is egkehitavù kediey, utew kinahanglan he is menge ulaula niw, ne kenà ebpekesuwey te impenurù ni Kristu pinaag̵i te Meupiya he Tudtulanen. Su emun kenè kew edsuwey kayi, minsan ke kenà a ebpekelikù diyan, egketudtulan a he nesevaha is gehinawa niw wey tuyù niw te kedhag̵ù su wey metuuwi te mezakel he menge etew is Meupiya he Tudtulanen.

Pilipus 4:18

Nezawat ku en is impeuwit niw ne utew subra is imbeg̵ey niw. Ne kenà ad egkealang-alang su inhated en ni Ipepruditu zini is idtavang niw kedì. Iring heini te pemuhat he utew mehemut, he ke và dà egkeg̵iya, utew igkesuat te Megbevayà.

Kulusas 2:19

Ne wazè dan en upakat ki Kristu he iyan ed-uwit kenitew. Iyan si Kristu puunà te zesen te kedtuu tew ne pinaag̵i kandin ed-iseg is kezesen te upakat tew te langun he tumutuu sumalà is egkesuatan te Megbevayà, iring te lawa tew, ne ed-iseg daan is desen din ne kenè ebpekedsusuwey pinaag̵i te kegkevagkes kayi zutun te menge ug̵at din.

Kulusas 2:6

Ne g̵eina te midawat niw si Jesu Kristu he Nengazen niw kinahanglan he is menge ulaula niw, ne zait te upakat niw kandin.

Kulusas 3:20

Sikiyu is menge vatà he tumutuu te Nengazen, pemineg̵a niw layun is menge sug̵ù te g̵inikanan niw su utew heini egkesuati te Megbevayà.

Kulusas 4:5

Purungi niw, menge suled, te minsan keenu he timpu is ulaula niw ziyà te menge etew he wazè pa medtuu ki Kristu su wey meketuu sikandan te Lalag te Megbevayà.

1 Tiselunika 2:12

Midsembag̵an dey sikiyu; iyan key midlangan te g̵ehinawa niw ne midhengyuan dey sikiyu he med-ulaula kew te sungkad te egkesuatan te Megbevayà. Iyan sikandin midhimu keniyu he tumutuu wey kew zin mehedii wey kew tulusa.

1 Tiselunika 4:1

Ne g̵untaan, menge suled, tenged te kegkesevaha tew te Nengazen tew he si Jesus, duen ebuyuen dey wey edhengyuen dey ziyan te keniyu. Impenurù dey keniyu is ed-ul-ulahan he egkesuatan te Megbevayà, ne mid-ulaula niw en. Iyan, edhengyuen dey keniyu he ipeiseg niw pa is ked-ul-ulaha niw kayi.

2 Timoteo 2:4

Sikan is mibpesundaru, ne kenà egkehimu he ed-ul-ulahan din is ed-ul-ulahan te kenà sundaru, su kinahanglan he layun sikandin andam te kebpenunuat te egalen din.

Tito 3:1

Keg̵iyi nu is menge tumutuu ziyan he kinahanglan he mebpesakup dan te velaud te gubirnu wey te menge upisyal ziyan. Medtuman dan te menge sug̵ù dan kandan ne medtavang dan ke zuen meupiya he ed-ul-ulahan te gubirnu.

Tito 3:14

Ipenurù nu ziyà te menge zuma nu he tumutuu ziyan he kinahanglan he iyan dekelà diyà te g̵ehinawa zan is ked-ulaula zan te meupiya wey zan metevangi is menge edlised. Kenà meupiya ke zuen tumutuu he peg̵ulen su wazà pulus dutun.

Hibriyuhanen 11:5

Ne si Inuk daan. Tenged te kedtuu zin wazà sikandin mebpatey su midtulus sikandin te Megbevayà ne kenè en sikandin egkeahà dini te kelibutan su ziyè en sikandin te Megbevayà. Duen insurat he Lalag te Megbevayà he ibpesavut he te wazè pa tulusa si Inuk, nesuat is Megbevayà te menge ulaula zin.

Hibriyuhanen 13:16

Kenè niw lipati is kebpurung niw te minsan hentei he zuma niw, ne mebpetebtevangè kew su is ulaula he iring kayi, ne iring te pemuhat he egkesuatan te Megbevayà.

Hibriyuhanen 13:21

Berakat he pinaag̵i ki Jesu Kristu, is Megbevayà he ebeg̵ey te kelinew, beg̵ayi kew zin te minsan hengkey he tavang wey niw tumana is egkesuatan din. Berakat daan he himuwa kiw zin he menge etew he utew zin egkesuati is menge ulaula. Edelig̵en tew si Jesu Kristu te wazà pidtemanan.

2 Pedro 1:8

Ne emun ed-iseg layun is ked-ul-ulaha niw kayi te langun, kenà egkehimu he kenà utew zekelà is pulus te kedtuuwi niw te Nengazen tew he si Jesu Kristu.

2 Pedro 3:18

Kinahanglan he pinaag̵i te kegkeg̵eg̵awi keniyu te Nengazen tew wey Menluluwas tew he si Jesu Kristu, med-iseg is kedsevuta niw te ibpesavut din. Berakat he iyan sikandin edelig̵en guntaan wey te wazà pidtemanan.

1 Juan 3:22

Ibeg̵ey zin kenita is ebuyuen ta su edtumanen ta is menge sug̵ù din wey ed-ul-ulahan ta is egkesuatan din.

1 Juan 5:20

Netuenan tew zaan he midhendini en te kelibutan is Anak te Megbevayà ne imbeg̵ey zin kenitew is kedsavut wey kiw mehimu he menge emig̵u te tutuu he Megbevayà. Nekidsevaha kiw te tutuu he Megbevayà su nekidsevaha kiw te Anak din he si Jesu Kristu. Iyan sikandin tutuu he Megbevayà, iyan sikandin puunà te untung he wazà pidtemanan.

3 Juan 1:6

Mibpenudtul zan te menge tumutuu zini hein midtig̵um key he utew zekelà is gag̵ew nu kandan. Emun ed-uman dan edtuluy ziyan tevangi nu en maan sikandan te paag̵i he egkesuatan te Megbevayà wey zan mekelaus dutun te kedhipanew zan.