Juan 6:68 - Manobo Western Bukidnon

⁶⁸ Ne midtavak si Simon, sikan is migeraran ki Pedro, ke sikandin te, “Wazà duma he egkesundanan dey su iyan ke zà ebpenurù te paag̵i te kebpekeangken te untung he wazà pidtemanan.

Juan 6:68 Кръстосани препратки

Mateo 16:16

Ne zutun midtavak si Simon Pedro te, “Iyan ka sikan is mibpilì te Megbevayà he ibpahadì din te menusiyà; iyan ka sikan is Anak te wazè din kemetayen he Megbevayà.”

Marcos 8:29

Ne zutun mid-insaan din sikandan te, “Ne sikiyu zaan, hentei e man sumalà is ked-isipa niw kediey?” Ne zutun midtavak si Pedro te, “Iyan ka sikan is mibpilì te Megbevayà he ibpahadì din te menusiyà.”

Lucas 9:20

Ne migkag̵i si Jesus te, “Ne sikiyu zaan, hentei e man sumalà is ked-isipa niw kediey?” Ne midtavak si Pedro te, “Iyan ka sikan is mibpilì te Megbevayà he ibpahadì din te menusiyà.”

Juan 12:49

Su is menge penurù ku, kenà dini zà ebpuun te kediey zà he isip, su midsug̵ù a te Amey ku he Megbevayà ne insug̵ù din kediey is ibpenurù ku.

Juan 12:50

Netuenan ku he is insug̵ù din kediey he menge lalag, iyan ebpekeveg̵ey te untung he wazà pidtemanan. Ne tenged kayi egkeg̵iyen ku is ibpekag̵i zin kediey.”

Juan 17:8

su is impepenurù nu kediey, impenurù ku en kandan ne netuenan dan he tutuu iyan he ziyan a ebpuun te kenikew. Ne midtuu zan he midsug̵ù a kenikew.

Juan 5:24

Utew venar is egkeg̵iyen ku he is minsan hentei he ebpemineg te menge lalag ku ne edtuu te Megbevayà he midsug̵ù kediey zini, iyan ebpekeangken te untung he wazà pidtemanan. Kenà sikandin keuzemà edsilutan su nekelikey en te kemetayen is gimukud din wey naangken din en is untung he wazà pidtemanan.

Juan 6:40

Is langun he nesayud ke hentei a is anak din, ne edtuu kediey, egkesuatan te Amey ku he meveg̵ayi te untung he wazà pidtemanan ne ebenhawen ku keuzemà dutun te ketepusan he andew.”

Juan 6:63

Iyan dà ebpekeveg̵ey te untung he wazà pidtemanan is Wag̵as he Mulin-ulin. Wazà egkehimu te lawa zà duen. Is menge lalag he migkag̵i ku keniyu, diyà ebpuun te Wag̵as he Mulin-ulin, ne ebpekeveg̵ey te untung he wazà pidtemanan.

Nengeulaula 13:26

Ne menge suled,” ke si Pablo, “sikiyu is menge zuma ku he kevuwazan ni Israyil wey kevuwazan ni Abraham, wey sikiyu zaan is kenà Hudiyu he ed-azap daan te Megbevayà, iyan kiw kes mibpeuwitan te Megbevayà te Meupiya he Tudtulanen wey kiw melibri te kedsiluti kenitew.

Nengeulaula 4:12

Iyan dà si Jesus ebpekelibri te silut kenitew,” ke si Pedro, “su zini te tivuuk he kelibutan wazè en duma pa he ngazan he etew he ebpemeleveg he imbeg̵ey te Megbevayà.”

Nengeulaula 5:20

ne migkeg̵iyan din sikandan te, “Hendiyè kew te Valey te Megbevayà ne ipenurù niw te langun he menge etew heini is beg̵u he untung.”

Nengeulaula 7:38

Ne hein nengetig̵um is menge kepuun tew ziyà te tanà he wazà dutun ed-ubpà he etew, pinaag̵i ki Moises nekepekidlalag dan te velinsug̵uen te Megbevayà diyà te vuntud he egngezanan te Siney. Ne nezawat ni Moises dutun kes kenà egkehanew he menge Lalag te Megbevayà wey zin daan ikeveg̵ey kenitew.

Nengeulaula 8:37

Ne midtavak si Felipe te, “Egkehimu emun hustu en is kedtuu nu.” Ne midtavak haazà is upisyal te, “Neketuu ad; edtuuwan ku he Anak te Megbevayà si Jesu Kristu.”