Juan 3:18 - Manobo Western Bukidnon

¹⁸ Is minsan hentei he edtuu kedì kenè en sikandin edsilutan te Megbevayà, iyan, is kenà edtuu kediey, netuenan en he zaan he edsilutan sikandin su siak is budtung he Anak te Megbevayà, wazè e zin tuuwi.

Juan 3:18 Кръстосани препратки

Marcos 16:16

Ne sikan is edtuu kayi wey ebpebewtismu, ebeg̵ayan te untung he wazà pidtemanan. Ne sikan is kenà edtuu ne edhukuman te silut.

Juan 1:12

Asal is minsan hentei he nekezawat wey midtuu kandin, mibeg̵ayan din sikandan te ketenged wey zan mehimu he menge anak te Megbevayà.

Juan 1:18

Wazè pa menusiyà he nekeahà te Megbevayà, iyan, sikan is Anak din he vudtung, impetuenan din kenitew is Amey zin he Megbevayà su iyan dan layun telezuma.

Juan 20:31

Ne iyan insurata ku kayi te menge egkein-inuwan su wey kew meketuu he iyan si Jesus Anak te Megbevayà wey sikan is mibpilì te Megbevayà he ibpahadì, ne emun edtuu kew kandin ebeg̵ayan kew te untung he wazà pidtemanan.)

Juan 3:16

Utew mahal ziyà te g̵ehinawa te Megbevayà is tivuuk he menusiyà, ne tenged kayi minsan sikan is budtung he Anak din wazè din menug̵uni, kekenà, impehendini zin su wey is langun he edtuu kandin, kenà mesiluti is gimukud dan, kekenà, meveg̵ayi sikandan te untung he wazà pidtemanan.

Juan 3:36

Is minsan hentei he edtuu te Anak te Megbevayà, ebeg̵ayan sikandin te untung he wazà pidtemanan; is minsan hentei he kenà ebpemineg te menge sug̵ù te Anak te Megbevayà, kenà egkeveg̵ayan te untung he wazà pidtemanan, kekenà, wazà pidtemanan te kegkepeuki kandin te Megbevayà.

Juan 5:24

Utew venar is egkeg̵iyen ku he is minsan hentei he ebpemineg te menge lalag ku ne edtuu te Megbevayà he midsug̵ù kediey zini, iyan ebpekeangken te untung he wazà pidtemanan. Kenà sikandin keuzemà edsilutan su nekelikey en te kemetayen is gimukud din wey naangken din en is untung he wazà pidtemanan.

Juan 6:40

Is langun he nesayud ke hentei a is anak din, ne edtuu kediey, egkesuatan te Amey ku he meveg̵ayi te untung he wazà pidtemanan ne ebenhawen ku keuzemà dutun te ketepusan he andew.”

Juan 6:47

Utew venar is egkeg̵iyen ku he is etew he edtuu kediey, naangken din en is untung he wazà pidtemanan.

Ruma 5:1

Guntaan, tenged te midtuu ki en ki Jesus, mid-isip ki en te Megbevayà he metazeng he iring te wazè ki keenu mekesalà, ne tenged kayi pinaag̵i te mid-ulaula te Nengazen tew he si Jesu Kristu melinew en is kedepitè tew te Megbevayà.

Ruma 8:1

Ne sikita is nekidsevaha ki Jesu Kristu, kenè ki en egkehukuman te silut.

Ruma 8:34

Ne wazà daan ebpekekag̵i he zait ki he edsilutan su edtevangan ki ni Jesu Kristu. Minatey sikandin he elili kenita ne kenà duen dà taman, su nevanhew en daan. Ne g̵untaan utew sikandin lavew su ziyà sikandin ebpinuu te zapit te egkekewanan te Megbevayà ne edtevangan ki zin diyà te etuvangan te Megbevayà.

Hibriyuhanen 12:25

Umba, purung kew pemineg te Lalag te Megbevayà ne kenè kew sukul. Su is menge etew zengan he wazè dan pemineg̵a is Lalag te Megbevayà he insug̵ù kandan ni Moises dini te kelibutan, emun wazà sikandan mekelikey te silut te Megbevayà, iyan kew pe be mekelikey te silut emun kenè niw ebpemineg̵en is egkeg̵iyen din te ebpuun te langit.

Hibriyuhanen 2:3

Ne iring din ded daan, sikitew is menusiyà, kenè kiw zaan ebpekelikey te silut te Megbevayà emun ebey-anan tew, ne kenè tew edtumanen is impenurù kenitew mehitenged te mekeg̵eg̵ehem he kedlibriya zin kenitew te silut. Is nehuna he nekepenudtul kayi, ne iyan en is Nengazen tew he si Jesus. Ne is menge etew he nemekezineg kandin, edtistig̵usan dan dini te kenitew he tutuu heini.

Hibriyuhanen 3:19

Ne netuenan tew he wazè dan mekeseled dutun su wazè dan tuuwi is Lalag te Megbevayà.

1 Juan 3:23

Ne iyan insug̵ù din kenitew is: kinahanglan he edtuuwan tew is Anak din he si Jesu Kristu wey ebmahalen tew te kada sevaha is menge zuma tew sumalà is insug̵ù daan dengan ni Jesus.

1 Juan 4:9

Impehendini te Megbevayà is sebsevaha zà he Anak din te kelibutan su wey pinaag̵i kandin mekeangken kiw te untung he wazà pidtemanan. Iyan haazà kebpaahaa zin te g̵ag̵ew zin kenitew.

1 Juan 5:10

Is minsan hentei he edtuu he Anak te Megbevayà si Jesus, nevenaran sikandin te kebpenistig̵us te Megbevayà. Is minsan hentei he kenà edtuu te kebpenistig̵us te Megbevayà, ed-isipen din he teruen is Megbevayà su wazè din tuuwi is kebpenistig̵us te Megbevayà mehitenged te Anak din he si Jesus.

1 Juan 5:12

Is minsan hentei he nekidsevaha te Anak te Megbevayà, duen din en untung he wazà pidtemanan. Is minsan hentei he wazà mebpekidsevaha te Anak te Megbevayà, wazè din untung he wazà pidtemanan.