Juan 19:24 - Manobo Western Bukidnon

²⁴ Ne tenged dutun migkag̵i is menge sundaru te, “Kenè tew ebindasen, kekenà, edripahan tew wey tew metueni ke hentei kenitew is ebpekeg̵aked.” Umba neulaula zan heini su egketuman kes netagnà dengan he Lalag te Megbevayà he insurat he edhenduen te, “Mibahinbahin dan is ugelingen ku ne midripahan dan is bisti ku.” Ne neulaula haazà dutun te menge sundaru.

Juan 19:24 Кръстосани препратки

Mateo 27:35

Ne inransang dan sikandin diyà te krus; ne zutun midripa zan ke hentei is ebpekeangken te menge ugelingen din.

Marcos 15:24

Ne zutun inransang dan sikandin diyà te krus. Mibpemahinbahin dan is menge ugelingen din ne midripa zan dutun ke hengkey is egkeangken te kada sevaha kandan.

Lucas 23:34

Ne zutun te kemulu zan pa idransang si Jesus, ne mid-ampù sikandin diyà te Megbevayà, ke sikandin te, “Amey ku, peseyluwa nu sikandan su wazè dan metueni ke hengkey heini is ed-ul-ulahan dan.” Ne zutun, haazà is midransang kandin, midripa zan ke hentei is ebpekeangken te menge ugelingen ni Jesus.

Juan 10:35

Ne ke si Jesus te, “Kenà egkehimu he edhelinen is insurat he Lalag te Megbevayà. Umba, ke migngezanan din te menge megbevayà is menge kepuun tew zengan he mibeg̵ayan te lalag din,

Juan 13:18

Kenè kew pudu is egkeg̵iyan ku kayi su netuenan ku ke hengkey is gehinawa te uman sevaha keniyu te menge pinilì ku. Duen sevaha keniyu he ed-ekalan e zin. Umba egkeulaula heini su wey metuman sikan is netagnà dengan diyà te insurat he Lalag te Megbevayà he edhenduen te, ‘Is duma ku he ebpekidtug̵en kediey, iyan nehimu he kuntada ku.’

Juan 19:28

Ne zutun netuenan ni Jesus he nepasad din en is langun he netagnà mehitenged kandin, ne migkag̵i te, “Egkemezahan a.” Ne pinaag̵i zutun netuman is netagnà dengan diyà te insurat he Lalag te Megbevayà.

Nengeulaula 13:27

Is menge Hudiyu he menge meg̵inged diyà te Hiruselim wey is menge egalen dan, wazè dan mesavut he iyan si Jesus sikan is edlibri kenitew. Ne wazè dan daan mesavut is insurat he tagnà te ebpemeneuven dengan te Megbevayà. Minsan ke egkezineg dan is kebesaha kayi kada Sebadu ziyà te menge simbahan dan, nengetuman dan gihapun kes nengetagnà pinaag̵i te kegkag̵i zan he zait si Jesus he edhimetayan.