Juan 19:11 - Manobo Western Bukidnon

¹¹ Ne midtavak si Jesus te, “Is keg̵ehem nu te kebayàbayà kediey, ke wazè pa iveg̵ey heini te Megbevayà diyà te kenikew, wazè nu g̵eina egkehimu. Umba sikan is midsug̵ù he uwita a zini te kenikew, iyan edhuna he zekelà is salè din, kenà sikew.”

Juan 19:11 Кръстосани препратки

Mateo 26:65

Ne haazà is lavew he memumuhat, mibpemindas din is kumbalè din he tuus te utew sikandin nepauk dutun te migkag̵i ni Jesus, ne ke sikandin te, “Uvag en kun Anak te Megbevayà! Nekesupak en heini te Megbevayà! Wazè en kinahanglan he zuen pa tistig̵us su sikiyu is langun, nezineg niw en heini is menge lalag din he utew supak te Megbevayà!

Mateo 27:2

Mibakus dan si Jesus te kedina ne inhated dan sikandin diyà te ki Pilatu he iyan gubirnedur zutun.

Mateo 6:13

Ipekeziyù key kenikew te mezesen he penuley ne ilikey key kenikew ki Setanas.’

Marcos 14:44

Si Hudas, is giya zan diyà te ki Jesus, migkag̵i zin he zaan ke hengkey is tuus te kegketueni zan ki Jesus, ke sikandin te, “Is etew he edhezekan ku, ne iyan en ebpen-ahaan niw. Ne zekepa niw en ne purungi niw ventayi ke ed-uwiten niw.”

Lucas 22:53

Ne hein duma a keniyu kada andew ziyà te Valey te Megbevayà is ebpenurù ne wazà a keniyu zutun dà dekepa. Iyan, iyan heini g̵untaan kes timpu he imbanglis keniyu wey niw meveeli is egkesuatan ni Setanas.”

Juan 18:13

Ne midhunaan dan uwita sikandin diyà te ki Anas su enug̵ang si Anas ni Keyipas te lavew he memumuhat dutun he tuig.

Juan 18:3

Ne zutun nekeuma si Hudas he edumahan te sengekumpeniya he sundaru wey pulis he midsug̵ù te menge punuan he memumuhat wey menge Perisiyu. Ne ebpenusulù he nengeg̵umeenan sikandan.

Juan 19:10

Ne mid-uman megkag̵i si Pilatu te, “Maan is kenè ka egkag̵i? Wazè nu ve metueni he zekelà is keg̵ehem ku; igkepaawè ku sikew ne egkehimu zaan he idsug̵ù ku he iransang ka te krus?”

Juan 3:27

Ne midtavak si Juan te, “Wazà gehem te minsan hentei ke wazà iveg̵ey kandin te Megbevayà.

Juan 7:30

Ne edekepen dan pezem si Jesus dutun, iyan, wazà nekeaku he egawed kandin su wazè pa itug̵ut te Megbevayà.

Juan 9:41

Ne midtavak si Jesus te, “Emun wazè niw metueni he lakap is kedsavut niw, wazè niw g̵eina salà, iyan, geina te egkag̵i kew he meupiya is kedsavut niw te hustu, kenà egkeawà is salè niw.”

Nengeulaula 2:23

Ne heini si Jesus, impalad te etew keniyu. Ne zaan he netuenan heini te Megbevayà su iyan imbanglis din ki Jesus. Impehimetayan niw sikandin te menge etew he kenà ed-azap te Megbevayà. Ne inransang dan te krus.

Nengeulaula 3:13

Is Megbevayà he ed-ezapen te menge kepuun tew he si Abraham, si Isaak, wey si Hakub, midtulus din is sulug̵uen din he si Jesus. Ne te wazè pa sikandin tulusa, impalad niw ziyà te menge punuan ne midsumpalit niw ziyà te etuvangan ni Gubirnedur Pilatu. Ne si Pilatu, edlibriyen din pezem si Jesus,

Nengeulaula 4:28

Ne mid-uyunan dan ke hengkey is ed-ul-ulahan dan diyà te kandin sumalà is imbanglis nu he meulaula zan.

Ruma 11:36

Iyan sikandin sikan is nenlimbag te minsan hengkey; ne iyan sikandin ed-uwit te minsan hengkey he linimbag, ne pinaag̵i zaan te minsan hengkey he linimbag edelig̵en sikandin. Berakat he zelig̵a is Megbevayà te wazè pidtemanan.

Ruma 13:1

Ne kinahanglan he edtuman kiw te velaud te gubirnu is minsan hentei kenitew. Su wazà ebpemunuan te inged he wazà itug̵ut te Megbevayà he mekepemunuan wey wazà gubirnu he wazà tukuza te Megbevayà.

Santiago 1:17

Is minsan hengkey he ibeg̵ey kenitew he meupiya he wazè din kurang, ne ziyà ebpuun te Megbevayà he iyan nenlimbag te langun he edsig̵a ziyà te langit. Egkengehalinhalin heini, iyan, is Megbevayà, kenà mulà sikandin edhalin, ne kenà egkehalin te minsan hengkey.

Santiago 4:17

Tentenuzi niw he ke netuenan te minsan hentei kenitew ke hengkey is meupiya he ed-ul-ulahan ne kenè din ed-ul-ulahan, nekesalà sikandin diyà te Megbevayà.