Juan 16:2 - Manobo Western Bukidnon

² Su id-awè dan is ketenged niw te kedseled diyà te simbahan, ne kenà iyan dà heini su keuzemà ke zuen edhimatey keniyu, kunaan din ke igkesuat te Megbevayà haazà is mibeelan din.

Juan 16:2 Кръстосани препратки

Mateo 10:28

Kenè kew mahandek te menge etew zà duen su iyan dà egkepatey zan is lawa niw; ne kenè dan egkepatey is gimukud niw. Iyan ikehandek niw is Megbevayà su egkepatey zin is lawa wey minsan is gimukud niw pinaag̵i te Impirnu.

Mateo 24:9

Egkuntedahan kew te tivuuk he menusiyà tenged te menge sumusundan ku sikiyu. Ne edekepen kew te menge etew ne ibpalad kew zan diyà te edrasey keniyu ne is duma keniyu edhimetayan dan.

Lucas 6:22

Utew kew zeyzey emun egkuntedahan kew te menge etew ne kenè kew zan edewaten he zuma zan, ne ebpeel-elezan kew zan, ne egkeg̵iyen kew zan he memezaat is ulaula niw tenged te midsundan kew kedì te Kakey te Menusiyà. Iyan heini kes mid-ulaula zengan te menge kepuun dan diyà te menge ebpeneuven te Megbevayà. Medlipey kew utew emun egkehitavù heini ziyan te keniyu su utew zekelà is suhul keniyu te Megbevayà he ebpeebuten niw ziyà te langit.

Juan 12:42

Ne minsan pa zutun mezakel is nemeketuu ki Jesus he menge punuan he menge Hudiyu, iyan, wazè dan keg̵iya he neketuu zan kandin su nahandek dan te menge Perisiyu su kela ke ewaa is ketenged dan te kedseled te menge simbahan.

Juan 16:25

Migamit ku is menge sempità te kebpenurua ku keniyu, iyan, meg̵aan en egkeuma is andew he kenè en maan menge sempitè pa is egemiten ku su zutun, melemu niw en he egkesavut is egkeg̵iyen ku. Ne zutun utew niw egkekeleduwi is egkeg̵iyen ku keniyu mehitenged te Amey ku he Megbevayà.

Juan 16:32

Egkesipeg̵an en is timpu he zutun ebpekedsusuwey kew is langun; ed-ulì is kada sevaha keniyu ziyà te ed-ubpaan din ne egkeewaan a. Ne minsan pa zutun duen ku pa zuma su iyan duma ku is Amey ku he Megbevayà.

Juan 4:21

Ne migkag̵i si Jesus te, “Benar, Bayi, is egkeg̵iyen ku kenikew he egkeuma is timpu he kenè en maan dini zà te vuntud wey minsan diyà te Hiruselim ed-ezapa is Amey tew he Megbevayà.

Juan 4:23

Duen ebperetengen he timpu ne netuman en guntaan he is menge etew he egkesuat he ed-azap te Amey tew he Megbevayà, ne kinahanglan he ezapa zan pinaag̵i te g̵ehem te Wag̵as he Mulin-ulin wey tutuu is ked-ezapa zan kandin. Iyan heini menge etew he edewaten te Megbevayà wey zan mekeazap kandin.

Juan 9:22

Umba iyan haazà tavak dutun te menge g̵inikanan din su nahandek dan te menge punuan he Hudiyu su neuyun en he zaan is menge punuan he ke zuen egkag̵i he iyan si Jesus sikan is mibpilì te Megbevayà he ibpahadì, ne haazà is egkag̵i, kenè dan en ibpeseled te menge simbahan dan.

Juan 9:34

Ne midtavak dutun is menge punuan te, “Ebpenurù ke ve kenami he mesinupaken ke man utew puun pa te ked-enaka kenikew!” Ne zutun migkeg̵iyan dan sikandin he kenè dan en maan ebmehimuwen he ebpekeseled sikandin diyà te menge simbahan dan te menge Hudiyu.

Nengeulaula 5:33

Ne hein nezineg heini te menge punuan, utew zan nengepauk ne ed-isipen dan en edhimetayi is menge epustul.

Nengeulaula 7:56

Ne ke si Esteban te, “Ahaa niw man! Egkeehè ku en is langit he nepuwasan ne zutun is Kakey te Menusiyà he edhithitindeg te zapit te egkekewanan te Megbevayà.”

1 Kurintu 4:13

Ne emun ed-el-elezen key ne kenà mezaat is idtavak dey. Minsan guntaan henduen key te rapek dà duen su kenè key idrerepengan te menge etew, ne henduen key te utew minus is pid-etawan din.

Pilipus 3:6

Ne tuus te utew meheg̵et dini te g̵ehinawa ku is kedtumana ku te menge tulumanen dey te menge Hudiyu, su mibpemesipelahan ku is menge tumutuu ki Jesus. Ne sumalà te kedtumana ku te kesug̵uan he imbilinbilin ni Moises wazè ku netuenan he supak ku te Megbevayà.

Impezayag 6:9

Ne in-awà dutun te nati he kerehidu haazà is ikelima en he tiyap dutun te velesahan. Ne neehè ku zutun te zizalem te vangkù he pemuhatà is menge g̵imukud te menge etew he midhimetayan tenged te kedtuu zan te Lalag te Megbevayà wey tenged daan te kedsengyawa zan dutun te lalag.