Juan 14:26 - Manobo Western Bukidnon

²⁶ Ne edsug̵uen te Amey ku zini te keniyu is Menenavang he ed-ilis kediey. Iyan sikandin sikan is Wag̵as he Mulin-ulin ne ibpenurù din keniyu is langun, ne ibpetenuzan din keniyu is langun he migkag̵i ku keniyu.

Juan 14:26 Кръстосани препратки

Mateo 1:18

Iyan heini g̵ug̵ud te keag̵i te ked-enaka ki Jesu Kristu. Nekeg̵unan is iney zin si Maria te maama he egngezanan ki Jose. Iyan, te wazè dan pa meked-esawa, netuenan ni Maria he meg̵ingey sikandin pinaag̵i te g̵ehem te Wag̵as he Mulin-ulin.

Mateo 1:20

Ne zutun te kemulu zin pa ed-isipa is iring kayi, mibpeteg̵einep kandin is belinsug̵uen te Nengazen. Ne ke sikandin te, “Sikew Jose, is kevuwazan ni Hadì David, kenè ka melenew he ebpengesawa ki Maria su meg̵ingey sikandin pinaag̵i te g̵ehem te Wag̵as he Mulin-ulin.

Mateo 28:19

Umba, penhipanew kew en diyà te minsan hendei wey niw metukid te ebpesavut is langun he menge etew ziyà te langun he menge inged. Ne penurua niw he medsundan dan kedì. Pemewtismuwi niw sikandan wey metueni he nekidsevaha zan te Amey tew he Megbevayà, wey siak is Anak din, wey is Wag̵as he Mulin-ulin.

Mateo 3:11

Wahig is ibewtismu ku keniyu,” ke si Juan, “he tuus te mid-iniyug̵an niw is mezaat he ulaula, iyan, duen etew he ed-ilis kediey ne iyan ibewtismu zin keniyu is Wag̵as he Mulin-ulin, ne emun kenà, ne hapuy. Lavew sikandin kedì, ne minsan is ked-uwit dà te sepatus din, kenè e pa zait he sulug̵uen din.

Marcos 12:36

Umba id-insè ku heini su mid-ulinan si Hadì David te Wag̵as he Mulin-ulin ne migkag̵i, ke sikandin te, ‘Migkag̵i is Megbevayà diyà te Nengazen ku te, “Kayi ka pinuu te zapit te egkekewanan ku taman te kenè ku pa ibpeluhud diyà te kenikew is menge kuntada nu.” ’ ”

Marcos 13:11

Ne zutun te kedekepa keniyu su ed-uwiten kew ziyà te hukmanan, kenè niw igkesamuk ke hengkey is egkeg̵iyen niw su emun dutun kew en, iyan niw egkekag̵i is ibpekag̵i keniyu te Megbevayà su is menge lalag he egkekag̵i niw zutun ne kenè en keniyu, kekenà, lalag he ibpekag̵i keniyu te Wag̵as he Mulin-ulin.

Lucas 1:15

su utew zekelà is pid-etawan din sumalà is ked-isipa kandin te Nengazen. Kenà sikandin ed-inum te vinu wey minsan hengkey he ebpekelangut. Ne puun dà dutun te kenè pa sikandin id-anak egkepurung sikandin egkeulini te Wag̵as he Mulin-ulin.

Lucas 1:35

Ne midtavak haazà is belinsug̵uen te, “Is Wag̵as he Mulin-ulin, iyan ebpengelintau kayi ziyan te kenikew ne edlig-enan ka te g̵ehem te Megbevayà. Ne tenged kayi, heini is id-anak nu, pudu metazeng is menge ulaula zin ne egkengezanan sikandin he Anak te Megbevayà.

Lucas 1:41

Ne hein nezineg ni Elisabet haazà is kebpenelehuzan ni Maria ne midredsà medleg̵uwat haazà is batà diyà te g̵etek ni Elisabet. Ne zutun nepurung si Elisabet meulini te Wag̵as he Mulin-ulin.

Lucas 1:67

Ne zutun nepurung meulini is amey zin he si Zacarias te Wag̵as he Mulin-ulin ne migkag̵i zin haazà is impinted kandin ne ke sikandin te,

Lucas 11:13

Ne sikiyu is menusiyà he kenà memetazeng, emun meupiya is ibeg̵ey niw ziyà te menge anak niw, iyan pe be is Amey tew he Megbevayà diyà te langit kenà mebeg̵ey keniyu te Wag̵as he Mulin-ulin ke ebuyuen niw.”

Lucas 2:25

Ne zuen dutun maama he ed-ubpà diyà te Hiruselim he egngezanan ki Simeon. Metazeng haazà he etew he layun edsimba te Megbevayà. Kenà egkeawà diyà te g̵ehinawa zin is kebperetenga zin te kegketuman te midtagnà dengan he zuen timpu he edlibriyen te Megbevayà is nengepilì din he menge etew he menge kevuwazan ni Israyil. Layun ed-ulinan si Simeon te Wag̵as he Mulin-ulin.

Lucas 24:49

Ne edsug̵uen ku zini te keniyu is Wag̵as he Mulin-ulin he impesarig te Amey ku he Megbevayà. Iyan, dini kew tag̵ad te inged he Hiruselim taman te kenè kew pa egkevulusan te g̵ehem din he ebpuun te langit.”

Juan 1:33

Ne hein aney zutun,” ke si Juan, “wazè ku pa metueni he iyan sikandin kes netagnà he hadì, iyan, sikan is Megbevayà he iyan midsug̵ù kedì wey a mekepemewtismu pinaag̵i te wahig, migkag̵i kedì he zaan te, ‘Emun egkeehè nu is etew he edtenaan wey kenà ed-ewaan te Wag̵as he Mulin-ulin, iyan en etew he ibpemewtismu zin is Wag̵as he Mulin-ulin.’

Juan 12:16

Ne haazà is kedseled ni Jesus diyà te Hiruselim, wazè pa mesavut te menge sumusundan din he kegketuman haazà te netagnà dengan, asal, hein midlikù en si Jesus diyà te langit, netenuzan dan is mibeelan din ne nesavut dan he neulaula heini sumalà is netagnà dengan diyà te insurat he Lalag te Megbevayà.

Juan 14:16

ne edhengyuan ku is Amey ku su wey zin ikeveg̵ey keniyu is Menenavang he ed-ilis kediey he kenà edsuwey keniyu te minsan keenu.

Juan 14:25

Egkeg̵iyen ku keniyu heini is langun te kemulu e pa zini te keniyu.

Juan 15:26

Ne mid-uman megkag̵i si Jesus te, “Is Menenavang he ebpuun te Amey ku, edsug̵uen ku zini te keniyu. Iyan sikandin sikan is Wag̵as he Mulin-ulin he ebpenurù te tutuu he edtuuwan. Ne emun ebpekeuma en dini te kelibutan, ibpesavut din ke hentei a.

Juan 16:7

Ne minsan pa kayi, benar iyan is egkeg̵iyen ku he igkezeyzey niw is ked-ewai ku keniyu su emun kenè ku sikiyu ed-ewaan, kenà ebpekehendini te keniyu is Menenavang. Ne emun ed-awà a, edsug̵uen ku sikandin dini te keniyu.

Juan 2:22

Ne neug̵et pa zutun hein nevanhew en si Jesus, netenuzan te menge sumusundan din heini is migkag̵i zin dutun, ne human dan dutun mesavut he tutuu is netagnà te insurat he Lalag te Megbevayà mehitenged te kegkevanhew ni Jesus wey tutuu zaan is midtagnà ni Jesus.

Juan 20:22

Ne te nekag̵i zin heini midhiyupan din sikandan ne ke sikandin te, “Berakat he meulini kew te Wag̵as he Mulin-ulin.

Juan 6:45

Duen netagnà he insurat dengan te ebpeneuven te Megbevayà he edhenduen te, ‘Ebpenuruen te Megbevayà is tivuuk he menusiyà.’ Umba,” ke si Jesus, “is langun he ebpemineg te ibpenurù kandin te Amey ku he Megbevayà, edsundan kediey.

Juan 7:39

(Is wahig he ebpekeveg̵ey te untung he migkag̵i ni Jesus iyan is Wag̵as he Mulin-ulin. Egkezawat heini te minsan hentei he edtuu ki Jesus, asal zutun he timpu wazè pa iveg̵ey is Wag̵as he Mulin-ulin su wazè pa si Jesus med-ulì diyà te langit.)

Nengeulaula 1:2

taman en te kebetuna kandin te Megbevayà pehendiyà te langit. Hein midhimetayan si Jesus ne nevanhew, mezakel is paag̵i te kebpaahaa zin te menge epustul te timaan he nevanhew en sikandin. Su seled te kepatan he andew zutun, layun sikandin ebpaahà kandan. Impenurù din kandan is kedhadì te Megbevayà. Ne te wazè pa sikandin betuna pehendiyà te langit, impenurù din daan pinaag̵i te g̵ehem te Wag̵as he Mulin-ulin is ebpeveelan din kandan te menge epustul he zaan he nepilì din.

Nengeulaula 1:4

Ne sengeandew te netig̵um dan, migkag̵i zin kandan he, “Kenè kew med-awà dini te inged he Hiruselim, kekenà, medtag̵ad kew taman te kenè pa ibeg̵ey keniyu kes impenaad te Amey tew he Megbevayà. Nekag̵i ku en heini keniyu he zaan.

Nengeulaula 1:8

Iyan,” ke si Jesus, “ebeg̵ayan kew zin te g̵ehem emun egkelumunan kew en te Wag̵as he Mulin-ulin, ne is tudtul te keag̵i ku, idsangyew niw zini te Hiruselim wey id-eneb niw zini te prubinsya he Hudiya wey ziyà daan te prubinsya he Semarya wey minsan hendei zini te egketemanan te kelibutan.”

Nengeulaula 11:16

Ne zutun netenuzan ku is lalag te Nengazen tew he si Jesus he ke sikandin te, ‘Wahig is imbewtismu ni Juan te menge etew, iyan, iyan kebewtismuwi keniyu is edlumunan kew te Wag̵as he Mulin-ulin.’

Nengeulaula 13:2

Ne zutun te ked-azap dan te Nengazen wey kedsalang dan te egkaan su ed-ampù dan, duen impesavut te Wag̵as he Mulin-ulin kandan. Ke sikandin te, “Ipeveyveyai niw kedì si Bernabe wey si Seulu su wey zan meveeli is ibpeveelan ku kandan.”

Nengeulaula 13:4

Ne haazà is dezuwa, geina te midsug̵ù sikandan te Wag̵as he Mulin-ulin, midlazas dan pehendiyà te inged he Silusya ne zutun mid-untud dan te barku su edhendiyè dan te pulu te zag̵at he egngezanan te Sipru.

Nengeulaula 15:28

Impesavut kenami te Wag̵as he Mulin-ulin ne neuyunan dey zaan he kenè dey keniyu ibpetuman is memereg̵en he imbilinbilin he kesug̵uan; iyan dà heini is utew kinahanglan he edtumanen niw.

Nengeulaula 15:8

Ne is Megbevayà, impeehè din kenitew is kedewata zin te kenà menge Hudiyu su imbeg̵ey zin kandan is Wag̵as he Mulin-ulin iring te kebeg̵aya zin dini te kenitew. Nesayud sikandin te minsan gehinawa tew te menusiyà.

Nengeulaula 16:6

Ne ziyè dan mekevayà te menge inged he ziyà te Perigya wey Gelasya su wazà sikandan tug̵uti te Wag̵as he Mulin-ulin he ibpesavut dan is Lalag te Megbevayà diyà te prubinsya he Asya.

Nengeulaula 2:33

Midtulus en si Jesus ne impepinuu en diyà te lavew he pinuuwà diyà te zapit te egkekewanan te Megbevayà, ne imbeg̵ey kandin te Amey tew he Megbevayà is Wag̵as he Mulin-ulin he impesarig din kandin. Umba nengeehè niw wey nengezineg niw g̵untaan heini is langun he egkein-inuwan su ebpuun te g̵ehem te Wag̵as he Mulin-ulin he imbeg̵ey te Megbevayà.

Nengeulaula 2:4

Ne mibpurungan ulini te Wag̵as he Mulin-ulin is kada sevaha kandan, ne netekewtekew zan pintezi te menge kineg̵iyan he kenè dan egketuenan sumalà is gehem he imbeg̵ey kandan te Wag̵as he Mulin-ulin.

Nengeulaula 20:28

Bentayi niw is ulaula niw wey ventayi niw zaan is langun he tumutuu he insarig keniyu te Wag̵as he Mulin-ulin; kinahanglan he iyan kew edlig-en te kedtuu te menge tumutuu te Megbevayà. Nehimu kiw zin he sakup pinaag̵i te kebpehimatey te anak din.

Nengeulaula 20:35

Ne pinaag̵i kayi te langun, impeehè ku keniyu he kinahanglan he pinaag̵i te kebpenigudu tew egketevangan tew is egkengeayuayu su egketenuzan tew is menge lalag dengan te Nengazen tew he si Jesus su ke sikandin te, ‘Dekelà is kelipey ta ke ebeg̵ey ki, kenà ke iyan ki edawat.’ ”

Nengeulaula 28:25

Ne g̵eina te kenè dan egkeuyun, ebpemen-ulì dan en. Ne te kemulu zan pa zutun, impelaus ni Pablo is lalag din te, “Utew tutuu is migkag̵i zengan te Wag̵as he Mulin-ulin diyà te menge kepuun tew pinaag̵i te kebpeneuva zin ki Esaias.

Nengeulaula 5:3

Ne migkeg̵iyan sikandin ni Pedro te, “Eneniyas, maan is ebpevayàbayè ka ki Setanas su edlimbungan niw is Wag̵as he Mulin-ulin su kenè niw id-amin is selapì.

Nengeulaula 7:51

Ne ke si Esteban te, “Sikiyu is menge zuma ku he Hudiyu, utew memehunit is gehinawa niw. Kenè kew egkesuat he ebpemineg; ne kenè kew zaan edtuman te Lalag te Megbevayà. Kenè kew ed-engked he edsupak te Wag̵as he Mulin-ulin. Kes mid-ulaula te menge kepuun tew, iyan daan ed-ul-ulahan niw.

Nengeulaula 7:55

Ne si Esteban, nepurung sikandin ulini te Wag̵as he Mulin-ulin ne midlingahà diyà te langit ne neehè din is mekeg̵eg̵ehem he anlag te Megbevayà. Ne elin dutun neehè din si Jesus he ziyà edhithitindeg te zapit te egkekewanan te Megbevayà.

Ruma 14:17

Su is kedhedii kenita te Megbevayà, ne kenà pinaag̵i te kedtumana ta te menge sug̵ù mehitenged te menge keenen wey inumen he idawey, kekenà, pinaag̵i te kebpeketezenga kenita te Megbevayà he metazeng wey pinaag̵i te melinawen he kebpekidepitè ta te menge zuma ta, wey pinaag̵i zaan te kelipey he ibeg̵ey te Wag̵as he Mulin-ulin.

Ruma 15:13

Is Megbevayà he iyan puunà te langun he meupiya he ebpeebuten tew, berakat he veg̵ayi kew zin te utew zekelà he kelipey wey melinawen he kebpekesavuk tenged te kedtuu niw kandin su wey pinaag̵i te g̵ehem te Wag̵as he Mulin-ulin meheg̵et is kebpeebuta niw te langun he meupiya he egkezawat niw keuzemà.

Ruma 15:16

wey a mehimu he sug̵ù ni Jesu Kristu ziyan te keniyu te menge etew he kenà menge Hudiyu. Henduen te memumuhat a su ke pinaag̵i kedì ebpeketuu is menge etew; egkehimu zan he iring te pemuhat ku he pinaag̵i te kedlumpiyuwi kandan te Wag̵as he Mulin-ulin edewaten te Megbevayà.

Ruma 5:5

Ne umba kenà egkehimu he kenè tew egkekuwa keuzemà is impenaad kenitew te Megbevayà su pinaag̵i te Wag̵as he Mulin-ulin he imbeg̵ey zin kenitew, egketuusan ta he ingkeg̵ag̵ew ki te Megbevayà.

1 Kurintu 12:3

Ne tenged kayi ibpesavut ku zaan keniyu he ke zuen etew he ed-ulinan te Wag̵as he Mulin-ulin, kenà egkehimu he egkeg̵iyen din he zait he edrewaken si Jesus, ne iring din ded daan kenà egkehimu he egkeg̵iyen din he Nengazen din si Jesus emun kenà pinaag̵i te ked-ulini kandin te Wag̵as he Mulin-ulin.

1 Kurintu 6:19

Siguradu netuenan niw he is lawa niw, ne iyan ed-ubpaan te Wag̵as he Mulin-ulin he imbeg̵ey keniyu te Megbevayà. Kenè ki en maan teg̵ig̵aked te lawa ta, kekenà,

2 Kurintu 13:14

Berakat he ikeg̵ag̵ew kew te Nengazen tew he si Jesu Kristu wey verakat he ipeehè keniyu te Megbevayà he mahal kew ziyà te g̵ehinawa zin wey verakat daan he meheg̵et is upakat niw te Wag̵as he Mulin-ulin. Iyan a si Pablo.

2 Kurintu 6:6

Ne midlikayan dey is meremerik he ulaula. Hustu is kedsevuta zey te Lalag te Megbevayà; mepeseyluwen key ne metinevangen key te minsan hentei. Ed-ulinan key te Wag̵as he Mulin-ulin; ibpeehè dey is gag̵ew zey ziyà te langun;

Ipisu 1:13

Ne iring din ded daan diyan te keniyu su hein impesavut keniyu is tutuu he tuluuwen he iyan kes Meupiya he Tudtulanen mehitenged te kedlibriya kenitew te silut, nemeketuu kew ki Kristu, ne midhimu kew zaan te Megbevayà he menge sakup din pinaag̵i te kebeg̵aya zin keniyu te Wag̵as he Mulin-ulin he zaan he impenaad din.

Ipisu 1:17

Is Megbevayà te Nengazen tew he si Jesu Kristu he iyan daan Amey tew he zait he ebentug̵en, edhengyuan ku layun sikandin he pinaag̵i te Wag̵as he Mulin-ulin, ne iveg̵ey zin keniyu is ketau wey ipeg̵awag̵awa zin keniyu is kegketueni niw te menge ulaula zin.

Ipisu 4:30

Ne kenè niw ul-ulaha is minsan hengkey he kenà egkesuatan te Wag̵as he Mulin-ulin su iyan sikandin tuus diyan te keniyu he g̵aked kew te Megbevayà, wey tuus daan he keuzemà egkeuma is andew he zutun edhimesaza te Megbevayà is langun he nepuunan din en he vaal te kedlibriya zin keniyu te kebpekesalà.

1 Tiselunika 4:8

Emun ebpesegdanen niw heini is penurù ku keniyu, kenè niw iyan dà egkepesagdan is penurù te etew, kekenà, iyan niw egkepesagdan is penurù te Megbevayà. Iyan sikandin kes mibeg̵ey kenitew te Wag̵as he Mulin-ulin.

2 Timoteo 1:14

Pinaag̵i te kedtavang te Wag̵as he Mulin-ulin he zini ed-ubpà te kenita, bentayi nu he kenà mahalin haazà is tutuu he tuluuwen he insarig kenikew te Megbevayà.

Tito 3:5

midlibri ki zin te silut. Iyan ingkelibriya zin kenita is: kenà tenged te menge metazeng he ulaula he nehimu ta, kekenà, tenged dà te hizu zin kenita. Midlibri ki zin pinaag̵i te kedlumpiyuwi kenita he iyan is kebpeuman ta kebpaanak pinaag̵i te g̵ehem te Wag̵as he Mulin-ulin he nekeveg̵ey kenita te veg̵u he untung.

Hibriyuhanen 10:15

Ne zuen daan ibpenurù kenitew te Wag̵as he Mulin-ulin dutun te insurat he Lalag te Megbevayà he edhenduen te,

Hibriyuhanen 2:4

Ne is Megbevayà, midtistig̵usan din daan haazà is impenurù dan su mibeg̵ayan din sikandan te g̵ehem wey zan ikepaahà is menge singyal, wey menge egkein-inuwan he kenà ed-iring-iring. Ne zuen daan menge ketau he imbeg̵ey zin diyà te menge tumutuu pinaag̵i te ked-ulini kandan te Wag̵as he Mulin-ulin sumalà is egkesuatan din he ebeg̵ayan.

Hibriyuhanen 3:7

Su zuen insurat he lalag te Wag̵as he Mulin-ulin he edhenduen te, “Guntaan emun egkezineg niw is lalag keniyu te Megbevayà,

Hibriyuhanen 9:8

Iyan heini ulaula te menge memumuhat dutun te simbahan, ne pinaag̵i kayi ibpesavut kenitew te Wag̵as he Mulin-ulin he te kemulu pa kinahanglan he egemiten haazà is egkehuna he rug̵u he egngezanan te mahal he rug̵u, kenè pa ebpekeseled is menge etew zà duen dutun te utew mahal he rug̵u.

1 Pedro 1:12

Impezayag kandan te Megbevayà he kenà kandan he ibmeupiya haazà is netagnè dan dutun, kekenà, kenitew g̵untaan. Ne g̵untaan impesavut en keniyu is tutuu mehitenged dutun te netagnè dan. Duen menge etew he midsug̵ù te Megbevayà su wey zan metudtul keniyu is Meupiya he Tudtulanen. Mid-ulinan sikandan te Wag̵as he Mulin-ulin he midsug̵ù te Megbevayà. Ne heini is impesavut dan keniyu, minsan is menge velinsug̵uen te Megbevayà ziyà te langit, egkesuatan dan he mesavut dan heini.

2 Pedro 1:21

Su heini is penurù, wazà diyà dà mebpuun te isip te etew zà duen, kekenà, impinted te Megbevayà. Mid-ulinan te Wag̵as he Mulin-ulin is ebpemeneuven dengan, ne is menge lalag dan, iyan impekag̵i kandan te Megbevayà.

1 Juan 2:20

Sikiyu mulà, mibpeulinan kew ni Kristu te Wag̵as he Mulin-ulin ne tenged dutun nesavut niw te langun is tutuu he tuluuwen.

1 Juan 2:27

Iyan, sikiyu, wazà kinahanglan he zuen selakew pa he ebpenurù keniyu su mibpeulinan kew en ni Kristu te Wag̵as he Mulin-ulin. Pinaag̵i zutun egkesavut niw is langun he ibpesavut keniyu ni Kristu. Tutuu mulà ne kenà tarù haazà is ibpesavut din keniyu umba kinahanglan he hemeni niw is kebpekidsevaha niw kandin sumalà is impenurù en keniyu.

1 Juan 5:7

Tetelu is ebpenistig̵us mehitenged ki Jesu Kristu.

Hudas 1:20

Ne sikiyu mulà, menge minahal ku he suled, peniguduwi niw is kebpetebtevangè niw su wey meheg̵et is kedtuu niw te tuluuwen he impetuuwan kenitew te Megbevayà. Pekezesen kew ampù pinaag̵i te g̵ehem he ibeg̵ey te Wag̵as he Mulin-ulin.

Impezayag 2:11

Is minsan hentei keniyu, mebpemineg kayi te egkeg̵iyen te Wag̵as he Mulin-ulin diyan te keniyu te menge tumutuu. Is etew he ebpekezaag ki Setanas, kenè en egkeragkes te silut he iyan is ikezuwa he kemetayen.’ ”