Juan 14:24 - Manobo Western Bukidnon

²⁴ Ke zuen etew he kenà a mahal ziyà te g̵ehinawa zin, kenè din edtumanen is menge sugù ku. Heini is menge lalag ku, kenà dini zà te isip ku ebpuun, kekenà, diyà ebpuun te Amey ku he iyan midsug̵ù kediey.

Juan 14:24 Кръстосани препратки

Mateo 19:21

Ne migkag̵i si Jesus te, “Emun edheg̵eten nu pa, ulì ka ne ivelegyè nu is langun he menge azen nu, ne is halin, ibpemeg̵ey nu ziyà te menge egkengeayuayu, ne edsepian ka ziyà te langit. Ne ke egkeipus nu heeyan likù ka zini wey ka mekesundan kediey.”

Juan 14:10

Wazè ke ves medtuu he zini te kedì is Amey ku, ne ziyà a zaan te kandin su sevaha key zà? Minsan is menge lalag ku keniyu, kenè ku egkeg̵iyen te kediey zà he isip su is Amey ku he zini ed-ubpà te kediey, kandin he vaal heini.

Juan 14:15

Emun mahal a ziyà te g̵ehinawa niw, edtumanen niw is menge sug̵ù ku keniyu,

Juan 14:25

Egkeg̵iyen ku keniyu heini is langun te kemulu e pa zini te keniyu.

Juan 3:11

Kenè nu lipati he is egkeg̵iyen dey, kenà tarù. Netuenan dey he tutuu is ibpesavut dey su neehè dey en, iyan, kenè niw mulà edtuuwan is egkeg̵iyen dey.

Juan 3:34

Ne is midsug̵ù te Megbevayà, egkeg̵iyen din is ibpekag̵i kandin te Megbevayà su is Megbevayà, mibpepurungan din sikandin peulini te Wag̵as he Mulin-ulin.

Juan 5:19

Ne zutun midtavak si Jesus te, “Utew venar is egkeg̵iyen ku keniyu he siak is Anak te Megbevayà, wazà egkehimu ku te kediey zà duen he g̵ehem; iyan dà edhimuwen ku is egkeehè ku he edhimuwen te Amey ku. Is ebeelan din, iyan daan ebeelan ku.

Juan 5:38

Ne netuenan ku he kenè niw edewaten is lalag din su siak is midsug̵ù din, wazà a keniyu tuuwi.

Juan 7:16

Ne midtavak kandan si Jesus te, “Kenà kediey zà he ketau is ibpenurù ku, kekenà, diyà ebpuun te Megbevayà he iyan midsug̵ù kediey.

Juan 7:28

Ne nezineg ni Jesus haazà, ne zutun te kebpenurù din diyà te simbahan he Valey te Megbevayà mibpekezag̵ing is egkag̵i te, “Kunaan niw ke netuenan niw ke hentei a wey ke hendei a ebpuun, iyan, wazà, su wazà a medhendini te kediey zà he egkesuatan su impehendini a te Megbevayà. Iyan sikandin sikan is tutuu he Megbevayà, iyan, wazè niw metueni ke hentei sikandin.

Juan 8:26

Mezakel pa pezem,” ke si Jesus, “is menge lalag ku keniyu mehitenged te menge ulaula niw wey niw mesavut he mezaat is menge vaal niw, iyan, iyan dà ibpesavut ku zè pa te menusiyà is nezineg ku ziyà te midsug̵ù kedì, ne egkeserig̵an is menge lalag din.”

Juan 8:28

Ne tenged dutun migkag̵i en maan si Jesus te, “Siak is Kakey te Menusiyà, dutun te kedrensanga niw kedì keuzemà diyà te kayu he ibpehitindeg, egketuenan niw human he iyan a sikan is mibpilì te Megbevayà he ibpahadì. Egketuenan niw zutun he is langun he mibeelan ku, impeveelan kedì te Amey ku he Megbevayà wey is ibpekag̵i zin kedì, iyan nekag̵i ku.

Juan 8:38

Is impaahà kedì te Amey ku, iyan egkeg̵iyen ku, ne sikiyu, ebeelan niw mulà is nezineg niw ziyà te keniyu he amey.”

Juan 8:42

Ne migkag̵i kandan si Jesus te, “Angin pezem ke amey niw is Megbevayà su mahal a g̵eina ziyan te g̵ehinawa niw su te kedhendini ku, diyà a ebpuun te kandin. Kenà kediey zà he suat is kedhendini ku, kekenà, midsug̵ù e zin.