Juan 14:12 - Manobo Western Bukidnon

¹² Utew venar is egkeg̵iyen ku keniyu he ke zuen edtuu kediey, egkehimu zin is nengeveelan ku, asal lavew pa he mekeg̵eg̵ehem is egkeveelan din tenged te ed-ulì a ziyà te Amey ku he Megbevayà.

Juan 14:12 Кръстосани препратки

Mateo 21:21

Ne midtavak si Jesus te, “Tipig̵i niw heini ziyà te isip niw he ke edsarig kew te Megbevayà te kenà duwazuwa, egkehimu niw heini is midhimu ku kayi te kayu he igira. Ne kenà kayi zà taman su minsan pa ke ekeg̵iyan niw heeyan is buntud te, ‘Med-awè ka keniyan ne agbur ka ziyà te zag̵at,’ ne ebpemineg̵en kew zin.

Marcos 11:13

Ne nepantew zin dutun is kayu he zehunen he egngezanan te igira. Ne midhendutun si Jesus su ed-ahaan din ke zuen beg̵as dutun. Iyan, hein dutun en, neehè din he wazà beg̵as, kekenà, tekew he menge zahun, su haazà, kenè pa timpu te hustu he kebpemeg̵as.

Marcos 16:17

Ne sikan is etew he edtuu kediey, duen menge singyal he egkehimu zan. Pinaag̵i te keg̵ehem te ngazan ku igkepeg̵uwè dan is menge mezaat he mulin-ulin he ebpenlalung te menge etew. Ne ebpekekag̵i sikandan te kineg̵iyan he kenè dan egketuenan.

Juan 14:28

Nezineg niw is migkag̵i ku he ed-ewaan ku sikiyu ne edlikù e zed dini te keniyu. Angin ke tutuu he mahal a ziyà te g̵ehinawa niw su igkelipey niw pezem heini su g̵untaan egkehimu he ed-ulì a ziyà te Amey ku he iyan lavew kenà a.

Juan 16:7

Ne minsan pa kayi, benar iyan is egkeg̵iyen ku he igkezeyzey niw is ked-ewai ku keniyu su emun kenè ku sikiyu ed-ewaan, kenà ebpekehendini te keniyu is Menenavang. Ne emun ed-awà a, edsug̵uen ku sikandin dini te keniyu.

Juan 4:37

Utew tutuu is erubasa he edhenduen te, ‘Ebpemula is sevaha ne selakew is edrag̵un.’

Juan 5:20

Siak is Anak din, utew a mahal ziyà te g̵ehinawa te Amey ku, ne ibpeehè din kediey is langun he ebeelan din. Ne kenà duen dà taman su keuzemà, lavew pa he mekeg̵eg̵ehem is ibpenurù din kediey, ne ebeelan ku wey kew meinuinu.

Juan 7:33

Ne migkag̵i si Jesus te, “Kenè en utew egkeug̵et ne ed-ewaan ku sikiyu su ed-ulì a ziyà te Megbevayà he midsug̵ù kedì.

Juan 7:39

(Is wahig he ebpekeveg̵ey te untung he migkag̵i ni Jesus iyan is Wag̵as he Mulin-ulin. Egkezawat heini te minsan hentei he edtuu ki Jesus, asal zutun he timpu wazè pa iveg̵ey is Wag̵as he Mulin-ulin su wazè pa si Jesus med-ulì diyà te langit.)

Nengeulaula 10:46

Su is menge Hudiyu zutun, nezineg dan haazà is menge kenà Hudiyu he ebpendalig te Megbevayà wey netekewtekew zan pintezi te menge kineg̵iyan he wazè dan dutun hanew ke hengkey haazà is egkeg̵iyen dan.

Nengeulaula 16:18

Ne kada andew zutun iyan en haazà ed-ul-ulahan din. Ne te malù neug̵et, si Pablo, kenè en ebpekeantus ne midlilingey ne migkeg̵iyan din haazà is mezaat he mulin-ulin te, “Pinaag̵i te g̵ehem te ngazan ni Jesu Kristu, egkeg̵iyan ku sikew he med-awè ka keniyan te vahi!” Ne zutundutun mid-ewaan haazà is bahi te mezaat he mulin-ulin.

Nengeulaula 19:12

Su minsan penuwilu zà wey ke tualya he neg̵amit din, ed-uwiten dan diyà te menge egkengezeruwan wey edlelungen te mezaat he mulin-ulin ne egkengeulian sikandan.

Nengeulaula 2:33

Midtulus en si Jesus ne impepinuu en diyà te lavew he pinuuwà diyà te zapit te egkekewanan te Megbevayà, ne imbeg̵ey kandin te Amey tew he Megbevayà is Wag̵as he Mulin-ulin he impesarig din kandin. Umba nengeehè niw wey nengezineg niw g̵untaan heini is langun he egkein-inuwan su ebpuun te g̵ehem te Wag̵as he Mulin-ulin he imbeg̵ey te Megbevayà.

Nengeulaula 2:41

Ne zutun, mezakel is nemeketuu te impesavut kandan ni Pedro ne mibpebewtismu sikandan. Ne zutun he andew neumanan kes menge tumutuu te tetelu he libu.

Nengeulaula 4:16

“Ebmenmenuwen tew heini is menge etew su venar man iyan he egkein-inuwan is nehimu zan, ne nevantug en heini zini te tivuuk he inged he Hiruselim ne kenè tew egkevarew.

Nengeulaula 4:33

Ne is menge epustul, utew zekelà is gehem he imbeg̵ey kandan te kedtistig̵us he nevanhew is Nengazen tew he si Jesus, ne zekelà daan is kedtuvazi te Megbevayà te langun kandan te nemeketuu ki Jesus.

Nengeulaula 4:4

Ne minsan pa zutun, neketuu is mezakel he nekepemineg engki Pedro. Ne tenged dutun is kezakel te menge maama zutun te nemeketuu ki Jesus ne migawhat te lelima he libu.

Nengeulaula 5:15

Ne tenged te menge egkein-inuwan he nehimu te menge epustul, mid-uwit te menge etew is menge egkengezeruwan ne impenavuk dan diyà te kilid te menge kersada he impemehizeg̵à diyà te menge ikam wey hizeg̵aan dan su wey melembungi sikandan te alung ni Pedro ke edsag̵ad.

Nengeulaula 6:7

Ne impeiseg dan is kedweliya zan te Lalag te Megbevayà diyà te mezakel he menge etew. Ne utew mahabet is menge tigHiruselim he nemeketuu ki Jesus. Ne mezakel zaan is menge memumuhat he nemeketuu.

Nengeulaula 8:7

Mezakel is nengeulian din he etew he edlelungen te mezaat he mulin-ulin ne nekekulahì is menge mezaat he mulin-ulin te ked-awè dan dutun te edlelungen dan. Ne elin daan nengeulian din is menge piang wey mibpematey is divaluy he lawa.

Nengeulaula 9:34

Ne migkeg̵iyan sikandin ni Pedro te, “He Iniyu, ebewian ka ni Jesu Kristu.” Enew ka ne tepiza nu is menge g̵elemiten nu te kedhizeg̵à. Ne zutundutun neulian si Iniyu ne mid-enew.

Nengeulaula 9:40

Ne impeg̵awas ni Pedro is langun te sikandan ne midluhud sikandin is ed-ampù diyà te Megbevayà. Ne zutun midsineruwan din haazà is lawa zutun te minatey ne ke sikandin te, “He Tebita, enew ka.” Ne migimerat si Tebita ne neehè din si Pedro, ne mid-enew ne mibpinuu.

Ruma 15:19

pinaag̵i te menge singyal wey egkein-inuwan wey pinaag̵i zaan te g̵ehem te Wag̵as he Mulin-ulin. Midhipanew a puun diyà te inged he Hiruselim pehendiyà te inged he Iliriku ne mibpurungan ku te ebpesavut is Meupiya he Tudtulanen te keag̵i ni Kristu.