Juan 12:48 - Manobo Western Bukidnon

⁴⁸ Is etew he kenà edawat kedì ne kenà edtuman te menge penurù ku, edhukuman sikandin te silut keuzemà dutun te ketepusan he andew, su iyan idsiluti kandin is menge penurù ku he wazè din dewata.

Juan 12:48 Кръстосани препратки

Mateo 10:15

Kenè niw lipati heini he lavew pa is idsilut te Megbevayà dutun te inged emun egkeuma keuzemà is andew te kedsilut, kenà te silut din dengan diyà te menge lalung he etew he meg̵inged diyà te inged he Suduma wey te inged he Gumura.

Mateo 21:42

Ne migkag̵i si Jesus te, “Siguradu nevasa niw en sikan is insurat he Lalag te Megbevayà he edhenduen te, ‘Sikan is batu he himan te valey, mid-engkezan te menge pandey su kunaan dan ke wazè din pulus. Ne heini, nehimu en guntaan he vatu he iyan dà ebpekepurung te valey. Ulaula heini te Nengazen, ne igkeinuinu tew utew.’

Mateo 25:31

Siak is Kakey te Menusiyà, dutun te kedlikù ku he utew zekelà is gehem te ked-anlag ku wey edumahan ad te langun he menge velinsug̵uen ku, ebpinuu ad is edhadì.

Marcos 12:10

Ne ke si Jesus en maan te, “Siguradu nevasa niw en sikan is insurat he Lalag te Megbevayà he edhenduen te, ‘Sikan is batu he himan te valey he vatu, mid-engkezan te menge pandey su kunaan dan ke wazè din pulus. Ne heini, nehimu en guntaan he vatu he iyan dà ebpekepurung te valey.

Marcos 16:16

Ne sikan is edtuu kayi wey ebpebewtismu, ebeg̵ayan te untung he wazà pidtemanan. Ne sikan is kenà edtuu ne edhukuman te silut.

Marcos 8:31

Ne zutun impesavut ni Jesus te menge sumusundan din is imbanglis kandin. Ke sikandin te, “Siak is Kakey te Menusiyà, mezakel is menge kemeresayan he ibpaantus kediey. Edsumpeliten a te menge ebmeg̵urangen te menge Hudiyu wey te menge punuan he memumuhat wey te menge menunudlù te kesug̵uan. Edhimetayan e zan ne seled te tetelu he andew zutun egkevanhew a.”

Lucas 10:16

Ne zutun migkeg̵iyan din haazà is menge sumusundan din te, “Is minsan hentei he etew he ebpemineg te ibpenurù niw, ne iring te iyan e zin nepemineg. Ne sikan is etew he kenè kew zin edseg̵ipaan, ne iring te iyan a wazè din seg̵ipaa. Ne sikan is etew he kenà edseg̵ipà kedì, ne iyan wazè din seg̵ipaa is Megbevayà he midsug̵ù kedì.”

Lucas 17:25

Iyan, siak is Kakey te Menusiyà, kinahanglan he egkehuna pa egkeuma is kedresaya kedì, wey is kenà kedewata te menge etew te menge penurù ku.

Lucas 20:17

Iyan, midtengtengan ni Jesus sikandan ne ke sikandin te, “Emun iyan egkeisip niw he kenà heini ed-ul-ulahan te Megbevayà hengkey is kedsevuta niw zuen te insurat dengan he Lalag te Megbevayà he edhenduen te, ‘Sikan is batu he idhiman te valey, mid-engkezan te menge pandey su kunaan dan ke wazè din pulus, iyan, nehimu heini g̵untaan he vatu he iyan dà ebpekepurung te valey.’ ” Ne impelaus ni Jesus is lalag din te,

Lucas 7:30

Iyan, is menge Perisiyu wey is menge menunudlù te kesug̵uan te menge Hudiyu, wazè dan mulà pezumdumahi is egkesuatan te Megbevayà he ibpeulaula kandan ne wazè dan daan mebpebewtismu ki Juan.

Lucas 9:22

Ne ke sikandin daan te, “Siak is Kakey te Menusiyà, kinahanglan he mezakel is menge kemeresayan he ibpaantus kediey. Edsumpeliten a te menge ebmeg̵urangen te menge Hudiyu wey te menge punuan he memumuhat wey te menge menunudlù te kesug̵uan. Edhimetayan e zan ne seled te tetelu he andew zutun egkevanhew a.”

Lucas 9:26

Is minsan hentei he igkeeled e zin wey igkeeled din is ibpenurù ku, siak is Kakey te Menusiyà, igkeeled ku zaan sikandin keuzemà ke edlikù a he zekelà is gehem te ked-anlag ku wey edsun-uzan ad te mekeg̵eg̵ehem he anlag te Amey ku he Megbevayà wey te anlag te menge velinsug̵uen te Megbevayà.

Juan 11:24

Ne migkag̵i si Marta te, “Uya, netuenan ku he egkevanhew sikandin keuzemà ke ebpemenhawen is menge minatey zutun te ketepusan he andew.”

Juan 5:45

Kenè niw isipa he iyan a edsumbung keniyu keuzemà diyà te etuvangan te Amey ku he Megbevayà. Su kes lukes niw he si Moises, edsarig kew te insurat he menge lalag din, ne nasì iyan sikandin edsumbung keniyu zutun he andew.

Juan 6:39

Ne is Amey ku he Megbevayà he midsug̵ù kediey, iyan din egkesuatan is: edlig-enan ku is langun he menge etew he imbeg̵ey zin kediey su wey wazà minsan sevaha kandan he kenà egkeveg̵ayan te untung. Ne ebenhawen ku sikandan keuzemà dutun te ketepusan he andew.

Juan 8:47

Emun anak te Megbevayà is etew, ebpeming̵en din is menge lalag te Megbevayà. Umba kenè niw ebpemineg̵en su kenè kew menge anak din.”

Nengeulaula 17:31

Midtendek din en is andew keuzemà he zutun ed-imbistigahan din is tivuuk he menusiyà, ne metazeng daan is ked-imbistiga zin pinaag̵i te etew he mibpilì din. Impeehè din he tutuu heini is ebeelan din su haazà is etew, minatey ne mibanhew te Megbevayà!”

Nengeulaula 3:23

Ne sikan is kenà ebpemineg kandin te ebpeneuven te Megbevayà, kenè en sikandin idragkes te menge etew he ed-ulinan te Megbevayà,’ ke si Moises dengan.

Ruma 2:16

Ne kenà heini egkelipatan te Megbevayà keuzemà te andew he zutun pinaag̵i ki Jesu Kristu edsusiyen din is minsan in-eles he menge isip te langun he menge etew. Iyan heini ibpenurù pinaag̵i kayi te Meupiya he Tudtulanen he idsangyew ku.

2 Kurintu 4:3

Ne is Meupiya he Tudtulanen he ibpesavut dey, emun in-eles heini, iyan dà neelesan kayi is menge etew he kenà edawat te untung he wazè din pidtemanan.

2 Tiselunika 1:8

Dutun, edsilutan din sikandan is wazà medtetenged te Megbevayà wey wazà mebpemineg te Meupiya he Tudtulanen te keag̵i te Nengazen tew he si Jesus.

Hibriyuhanen 10:25

Kenè tew ed-engkezan is kedtig̵um tew te ked-azap te Megbevayà; kenè tew ed-iringan is duma he menge tumutuu he mid-engkezan dan en is kedsimba, kekenà, edtig̵um kiw su wey kiw mekepesemsembag̵à. Utew heini kinahanglan, lavew en emun egketuusan ta he meg̵aan en is kedlikù te Nengazen tew he si Jesus.

Hibriyuhanen 12:25

Umba, purung kew pemineg te Lalag te Megbevayà ne kenè kew sukul. Su is menge etew zengan he wazè dan pemineg̵a is Lalag te Megbevayà he insug̵ù kandan ni Moises dini te kelibutan, emun wazà sikandan mekelikey te silut te Megbevayà, iyan kew pe be mekelikey te silut emun kenè niw ebpemineg̵en is egkeg̵iyen din te ebpuun te langit.

Hibriyuhanen 2:3

Ne iring din ded daan, sikitew is menusiyà, kenè kiw zaan ebpekelikey te silut te Megbevayà emun ebey-anan tew, ne kenè tew edtumanen is impenurù kenitew mehitenged te mekeg̵eg̵ehem he kedlibriya zin kenitew te silut. Is nehuna he nekepenudtul kayi, ne iyan en is Nengazen tew he si Jesus. Ne is menge etew he nemekezineg kandin, edtistig̵usan dan dini te kenitew he tutuu heini.

Hibriyuhanen 4:12

Uuyag is Lalag te Megbevayà ne zekelà is gehem din. Iring te sundang he zezuwa is gerangan din he utew meg̵arang, iyan, meg̵arang pa is Lalag te Megbevayà kenà haazà is sundang su edlembasan din minsan is isip ta, gehinawa ta, wey tuyù ta ne igkepetuenan din kenita ke hengkey is ked-isipa kenita te Megbevayà.

1 Pedro 1:5

Kenitew en haazà is integ̵ana zin. Tenged te nekesarig kiw kandin, nelig-enan kiw te g̵ehem te Megbevayà te kemulu kiw pa edtag̵ad te kedtulusa zin kenitew keuzemà te ketepusan he timpu.

2 Pedro 3:3

Idhuna ku keniyu ibpesavut he keuzemà te ketepusan he timpu duen ebpemenlepew he menge etew he iyan ebayàbayà kandan is menge mezaat he kebayè dan. Edsumpeliten kew zan he egkag̵i te,

2 Pedro 3:7

Ne haazà is Lalag te Megbevayà he iyan inlimbag din dengan, pinaag̵i zutun midteg̵enahan din en is langit wey tanà su wey melimas din te hapuy keuzemà dutun te andew te kedsusiya zin wey kedsiluti zin te menge etew he wazè dan kedtahud kandin.