Juan 1:29 - Manobo Western Bukidnon

²⁹ Hein mid-ilis he andew zutun, naahà ni Juan si Jesus he edhendiyà te kandin, ne ke si Juan diyà te menge etew, “Iyan heini sikan is etew he egngezanan te ibpemuhat he Nati he Kerehidu he ibeg̵ey te Megbevayà su pinaag̵i kandin egkeawà is menge memezaat he ulaula te menusiyà.

Juan 1:29 Кръстосани препратки

Mateo 1:21

Maama is id-anak din ne ngezani nu ki Jesus, he ke và dà egkeg̵iya, Menluluwas, su iyan sikandin edlibri te menge etew he edsunud kandin wey kenè en sikandan siluti tenged te menge salè dan.”

Mateo 20:28

Su iring te siak, is Kakey te Menusiyà, kenà iyan inhendini ku te kelibutan is wey a metevangi te menge etew, kekenà, wey a meketavang ne wey a zaan mekepehimatey wey ku mevelukasi is mezakel he menge etew.”

Juan 1:35

Ne hein mid-ilis dutun he andew, diyè en maan si Juan duma is dezuwa he menge sumusundan din te naahaan din ki Jesus.

Juan 1:36

Ne neehè din en maan si Jesus is edsag̵ad. Ke si Juan te, “Iyan heeyan sikan is etew he iring te ibpemuhat he Nati he Kerehidu he imbeg̵ey te Megbevayà!”

Juan 1:43

Ne hein mid-ilis he andew zutun neisip ni Jesus he edhendiyà te prubinsya he Geliliya. Mibeyaan din si Felipe ne ke sikandin te, “Duma ka kedì.”

Juan 2:1

Ne nekezuwa zutun duen eseweey ziyà te inged he Kana he ziyà te prubinsya he Geliliya, ne midtelavuk is iney ni Jesus.

Juan 3:16

Utew mahal ziyà te g̵ehinawa te Megbevayà is tivuuk he menusiyà, ne tenged kayi minsan sikan is budtung he Anak din wazè din menug̵uni, kekenà, impehendini zin su wey is langun he edtuu kandin, kenà mesiluti is gimukud dan, kekenà, meveg̵ayi sikandan te untung he wazà pidtemanan.

Juan 4:42

ne migkeg̵iyan dan sikan is bahi te, “Nemeketuu key, kenà tenged dà te migkag̵i nu, kekenà, tenged daan te nezineg dey is menge lalag din, ne netuenan dey en he tutuu iyan he iyan sikandin sikan is Menluluwas te menusiyà.”

Juan 6:51

Iyan a egkeenen he ebpuun te langit wey ebpekeveg̵ey te untung; ne ke zuen egkaan kediey kenè en ebpatey is gimukud din. Is egkeenen he ibeg̵ey ku, iyan is lawa ku. Ibeg̵ey ku heini su wey maangken te tivuk he menusiyà is untung he wazà pidtemanan,” ke si Jesus.

Nengeulaula 13:39

Kenè kiw egkelibri te menge salè tew pinaag̵i te kedtumana tew te kesug̵uan ni Moises, iyan, is minsan hentei he edtuu ki Jesus, egkelibri mulà sikandin.

Nengeulaula 8:32

Iyan ebesahan dutun te upisyal is insurat ni Esaias dengan he edhenduen te, “Iring sikandin te vuutan he kerehidu he migkuwa zan su edhimetayan. Ne wazà migkag̵i zin su iring sikandin te nati he kerehidu he kenà ed-erang ke ed-elutan.

1 Kurintu 15:3

Ne lavew kayi te langun he impesavut ku keniyu, haazà is impenurù daan kediey. Ne iyan is: si Kristu, mibpehimatey su wey kiw melibri te silut mehitenged te menge salè tew sumalà is impesavut dengan te insurat he Lalag te Megbevayà.

2 Kurintu 5:21

Wazà minsan hengkey he mezaat he ulaula ni Kristu, iyan, midhimu te Megbevayà he iyan sikandin midsilutan tenged te salè tew su wey pinaag̵i te kebpekidsevaha tew kandin, egkehimu he ed-isipen kiw he metazeng te Megbevayà.

Gelasya 1:4

Si Kristu, imbelavag din is untung din su wey mepalis is menge salè tew su wey kiw melibri, ne kenè tew meiringi is menge etew he ed-ulaula te mezaat te g̵untaan he timpu kayi te kelibutan. Umba mibeelan heini ni Kristu su edtumanen din is egkesuatan te Amey tew he Megbevayà.

Gelasya 3:13

Minsan pa te nesupak te en is kesug̵uan, nelibri ki ni Jesus te silut su midrewakan en si Jesus he elili kenitew zutun te kedrensanga kandin te krus, su zuen insurat he Lalag te Megbevayà he edhenduen te, “Ke zuen etew he edhimetayan ne idtaud te impasek he kayu ne tuus heini te rawak kandin te Megbevayà.”

1 Timoteo 2:6

Imbelavag din is untung din ne mibpehimatey su wey zin mevelukasi is langun he menge etew. Ne pinaag̵i kayi, dutun te hustu he timpu, impeehè din he egkesuatan te Megbevayà he melibri te silut is tivuuk he menusiyà.

Tito 2:14

Mibpehimatey sikandin he elili kenitew wey kiw zin melibri te kebpekeulaula tew te mezaat ne wey kiw zin daan mehimu he menge g̵aked din he etew he nelumpiyuwan he utew en egkengesuat he ed-ulaula te meupiya.

Hibriyuhanen 1:3

Pinaag̵i kayi te Anak din ibpezayag is mekeg̵eg̵ehem he anlag te Megbevayà su neked-iring dan. Ke hengkey is Megbevayà ne iyan ded daan sikan is Anak din. Ne pinaag̵i te g̵ehem te kegkag̵i kayi te Anak ebeyveyaan din is minsan hengkey he linimbag. Ne hein nepasad din en is ked-ewaa zin te menge salè tew, mid-ulì diyà te langit ne mibpinuu ziyà te egkekewanan te Megbevayà su edhadì.

Hibriyuhanen 2:17

Umba kinahanglan he ebpeetew sikandin su wey mehimu sikandin he iring kenitew te menge suled din te minsan hengkey he paag̵i. Ne mid-ulaula zin heini su wey mehimu sikandin diyà te etuvangan te Megbevayà he iring te lavew he memumuhat tew he utew hihizuwen wey metinumanen su wey zin mepalis is menge salè tew.

Hibriyuhanen 9:28

Ne si Kristu zaan, kesevaha zà is kebpehimatey zin he iyan kebpemuhata zin te lawa zin wey zin maawà is menge salà te utew mezakel he menge etew. Ne ed-uman pa ebulus si Jesus dini te kelibutan, kenà te ked-ewaa zin te menge salè tew, kekenà, edhimesazen din is kedlibriya zin te langun he utew zekelà is perateng dan kandin.

1 Pedro 1:19

Iyan imbelukas din si Kristu he impelengesa he utew mevali. Iring sikandin te nati he kerehidu he wazà igkesawey zuen he impemuhat.

1 Pedro 2:24

Iyan si Kristu midsilutan tenged te menge salè tew zutun te kedrensanga kandin diyà te krus. Umba iyan sikandin midsilutan su wey tew meengkezi is menge mezaat he ulaula ne wey tew iyan meulaula is metazeng. Is menge palì din dutun, ne iyan nekevawì kenitew.

1 Pedro 3:18

Kesevaha zà is kebpehimatey ni Kristu wey mepesaylu is menge salè tew. Mibpehimatey su wey mehimu sikandin is metazeng he elili tew te kenà memetazeng wey kiw mehimu he menge g̵aked te Megbevayà. Nepatey is lawa zin, iyan, nevanhew sikandin

1 Juan 2:2

Iyan sikandin impemuhat tenged kenitew wey mepalis is menge salè tew, ne kenè kenitew zà he salà is egkepalis, kekenà, is menge salà daan te tivuuk he menusiyà.

1 Juan 3:5

Netuenan niw en he umba mibpeetew si Kristu su wey zin maawà is menge salè tew. Ne netuenan niw zaan he wazà minsan sevaha he salà he nehimu zin wey egkehimu zin.

1 Juan 4:10

Is tutuu he g̵ag̵ew, kenà iyan is kebmahala tew te Megbevayà, kekenà, iyan is kebmahala zin kenitew wey is kebpehendiniya zin te Anak din su wey pinaag̵i te kebpehimatey zin mepesaylu is menge salè tew.

Impezayag 12:11

Heini is menge suled tew, nezaag dan en si Setanas tenged te kedtig̵is te lengesa te migeraran he impemuhat he nati he kerehidu, wey tenged te insangyew zan is tutuu he tuluuwen, wey tenged daan te wazè dan iyan menug̵uni is untung dan, kekenà, mibpehimatey zan tenged te kedtuu zan.

Impezayag 13:8

Ed-ezapen haazà is langgam te langun he menge etew zini te kelibutan he wazà ikesurat is ngazan dan diyà te libru he zutun ilista is menge etew he ebeg̵ayan te untung. Iyan haazà kes libru zuen te nati he kerehidu he zengan dà imbanglis is kebpehimatey zin te wazè pa tukuza is kelibutan.

Impezayag 14:1

Ne zutun neehè ku is buntud he Siyun ne zutun edhithitindeg sikan is nati he kerehidu ne zuma zin daan dutun is nenggatus wey kepatan wey heepat he libu he menge etew. Ne haazà is menge etew, insurat diyà te menge vuked dan is ngazan dutun te nati wey is ngazan daan te Amey zin he Megbevayà.

Impezayag 14:10

ne ibpeinum kandin is binu te pauk te Megbevayà, he ke và dà egkeg̵iya, silut kandin te Megbevayà, ne heini is mepait he vinu, midtag̵ey en te Megbevayà diyà te tasa he iyan sikan is meinit he pauk din. Ne haazà is menge etew, edresayen sikandan diyà te meregreg he esupri ziyà te Impirnu. Ne egkeahà haazà dutun te nati he kerehidu wey te menge velinsug̵uen te Megbevayà.

Impezayag 14:4

Iyan haazà he menge maama he wazè dan mekesalà pinaag̵i te kedhilavet te kenè dan esawa su utew lumpiyu is menge ulaula zan ne wazè dan suwayi sikan is nati he kerehidu te minsan hendei sikandin ebpevayà. Mibelukasan sikandan puun duen te perayan he iyan is tivuuk he menusiyà wey zan mehimu he iyan nepengilizan dutun wey ikeveg̵ey sikandan diyà te Megbevayà wey ziyà te nati he kerehidu.

Impezayag 15:3

Ne egkentahan dan is kentahan duen te sulug̵uen te Megbevayà he si Moises he iyan sikan is kentahan he idalig dutun te nati he kerehidu. Ke sikandan te, “Sikew is Megbevayà, mekeg̵eg̵ehem ka he Nengazen te langun. Utew zekelà wey utew egkein-inuwi is langun he menge vaal nu! Hadì ka te langun he menge g̵inhedian. Metazeng wey tutuu is menge ulaula nu!

Impezayag 17:14

Edtebeken dan sikan is nati he kerehidu ne egkezaag sikandan dutun te nati su egalen sikandin te minsan hentei he egalen wey hadì te minsan hentei he hadì. Ne is menge etew he edumahan dutun te nati, ne migeraran sikandan te menge impetuu wey menge pinilì, wey menge metinumanen he menge sumusundan te Megbevayà.”

Impezayag 19:7

Edlilipey kiw utew ne edelig̵en tew sikandin tenged te zekelà he g̵ehem din! Su iyan en heini timpu he kegketuman te eseweey te nati he kerehidu. Is ed-esewaan te nati, ne mibistiyan en.

Impezayag 19:9

Ne migkeg̵iyan a zutun te velinsug̵uen, ke sikandin te, “Isurat nu heini: Utew zeyzey is langun he ibpemetelavuk dutun te eseweey te nati he kerehidu.” Ne impelaus din haazà is lalag din te, “Iyan heini tutuu he menge Lalag te Megbevayà!”

Impezayag 21:14

Ne is elavat dutun te inged, ne sepulù wey zezuwa is impepinuuwan dutun he zekelà he vatu. Ne midsuratan haazà is menge vatu te menge ngazan te sepulù wey zezuwa he menge epustul zuen te nati he kerehidu.

Impezayag 21:27

Iyan, wazà minsan hengkey he mezaat wey is minsan hentei he ebpenurù te tarù wey is etew he ed-azap te ledawan he ebpekeseled dutun. Iyan dà ebpekeseled dutun is menge etew he inlista is menge ngazan dan dutun te libru te nati he kerehidu he zutun idlista is ebpemeg̵ayan te untung he wazà pidtemanan.

Impezayag 21:9

Ne zutun mid-uvayan a te sevaha zutun te pitu he velinsug̵uen he sikan is nen-ulà te pitu he lediyà he nepenù te pitu he huziyan en he idrasey te menusiyà, ne ke sikandin te, “Duma ka kedì su ibpeehè ku kenikew is ed-esawaan te nati he kerehidu.”

Impezayag 5:6

Ne zutun duen neehè ku zutun te teliwazà te pinuuwà te edhadì wey te heepat he menge linimbag he kedesenan wey te menge ebmeg̵urangen. Iyan neehè ku zutun is: duen edhithitindeg he nati he kerehidu ne neehè ku zaan dutun te lawa zin is menge tulak te palì din te kedhimetayi kandin dengan. Pitu is sungey zin wey pitu zaan is mata zin he iyan is pitu he g̵ehem te Wag̵as he Mulin-ulin he edsug̵uen te Megbevayà he ibpeeneb din te tivuuk he kelibutan.

Impezayag 5:8

Ne hein nekuwa zin en haazà is belesahan, sikan is menge heepat he linimbag wey is menge keluwaan wey heepat he ebmeg̵urangen, midlangkeb dan diyà te etuvangan dutun te nati he kerehidu su ed-ezapen dan. Ne zuen arpa te uman sevaha zutun te menge ebmeg̵urangen ne zuen egewezan dan he menge lediyà he vulawan he nepenù te veyewà he edtutungen su wey zuen mehemut he evel ne iyan kehulug̵an dutun is menge ked-ampù te menge etew he g̵aked te Megbevayà.

Impezayag 6:1

Ne zutun mibantey a ne in-awà dutun te nati he kerehidu haazà is egkehuna zutun te pitu he tiyap dutun te velesahan, ne nezineg ku is migkag̵i te sevaha zutun te heepat he linimbag, ke sikandin te, “Na, genat ke en!” Ne iring te beransì is dag̵ing dutun te kegkag̵i zin.

Impezayag 6:16

Ne mibpemengulahì dan diyà te menge vuntud wey menge vatu. Ke sikandan te, “Lilizi key su wey key kenà maahà te ebpimpinuu ziyà te pinuuwà te edhadì he ziyà te langit ne wey key zaan kenà meumahi te pauk te nati he kerehidu.

Impezayag 7:14

Ne midtavak a te, “Iyan ka nesayud.” Ne ke sikandin te, “Heini is menge etew, ebpemekeuma sikandan he ebpuun dutun te zekelà he kemeresayan diyà te lumpad te kelibutan. Mibpemìpian dan is menge bisti zan diyà te lengesa te nati he kerehidu wey zan mehimu he meputì, he ke và dà egkeg̵iya, nepalis en is menge salè dan.

Impezayag 7:17

Su is nati he kerehidu he ziyà te teliwazà te pinuuwà te edhadì, iyan sikandin ed-elima kandan. Ibpeturedu zin kandan is ebpuunan te menge wahig he ebpekeveg̵ey te untung he wazà pidtemanan. Ne is Megbevayà, id-awè din en is keseengan kayi te menge etew,” ke sikandin.