Juan 1:16 - Manobo Western Bukidnon

¹⁶ Ne g̵eina te utew sikandin belig̵eg̵awen kenà egketapus is menge meupiya he idtuvad din kenitew te langun.

Juan 1:16 Кръстосани препратки

Mateo 13:12

Su is etew he neketuu wey zuen kedsavut din, ed-umanan pa te Megbevayà te kedsavut su wey mehustu is kedsavut din. Iyan, sikan is kenà edtuu, id-awà te Megbevayà diyà te kandin sikan is deisey he nesavut din.

Mateo 3:11

Wahig is ibewtismu ku keniyu,” ke si Juan, “he tuus te mid-iniyug̵an niw is mezaat he ulaula, iyan, duen etew he ed-ilis kediey ne iyan ibewtismu zin keniyu is Wag̵as he Mulin-ulin, ne emun kenà, ne hapuy. Lavew sikandin kedì, ne minsan is ked-uwit dà te sepatus din, kenè e pa zait he sulug̵uen din.

Mateo 3:14

Ne si Juan, kenà dutun egkesuat, ne ke sikandin te, “Iyan a zait he ebewtismuwan nu kenà te iyan ka ebpebewtismu kedì.”

Lucas 21:15

Su iyan e en metau te idtavak niw te menge insè dan. Ne ibeg̵ey ku zutun keniyu is ketau te ked-isip-isip wey kew meketavak. Ne zutun haazà is menge kuntada niw, kenè dan ebpeketavak te ketezengan niw ne kenè dan daan ebpekepeg̵intarù te tutuu he egkeg̵iyen niw.

Juan 3:34

Ne is midsug̵ù te Megbevayà, egkeg̵iyen din is ibpekag̵i kandin te Megbevayà su is Megbevayà, mibpepurungan din sikandin peulini te Wag̵as he Mulin-ulin.

Ruma 5:17

Ne emun tenged te kedsupak dutun te sevaha zà he etew he si Adan, ebpematey is tivuuk he menusiyà, wey pe be kenà lavew pa he mekeinuinu is nehimu te sevaha zà daan he etew he si Jesu Kristu. Su is minsan hentei he edawat te zekelà he g̵ag̵ew kandin te Megbevayà pinaag̵i ki Jesu Kristu, ne ed-isipen sikandin he metazeng, ne ebeg̵ayan sikandin te untung he wazè din pidtemanan ne ebpekehadì sikandin duma te Megbevayà.

Ruma 5:2

Tenged te kedtuu tew ki Jesus midhimu zin en he meg̵eg̵awi kenitew is Megbevayà. Umba zekelà is kelipey ta su egkeperateng ta he keuzemà ebpekeambit ki te utew kegkelavew te Megbevayà.

Ruma 5:20

Ne umba imbeg̵ey te Megbevayà is kesug̵uan su wey med-iseg is kegketueni te menge etew te kezekelà te kedsupaka zan kandin. Ne zutun te mid-iseg mebmezakel is menge kedsupak, impeiseg ipezekelà te Megbevayà is gag̵ew zin te menge etew.

Ruma 8:9

Ne sikita mulà, kenè ki en ebeyveyaan te mezaat he suat te lawa ta su emun dini ed-ubpà te kenita is Wag̵as he Mulin-ulin ebeyveyaan ki te Wag̵as he Mulin-ulin. Ne ke zuen etew he wazà diyà te kandin is Wag̵as he Mulin-ulin he midsug̵ù ni Kristu, kenà sikandin sakup ni Kristu.

Ipisu 1:23

Sikitew is edsarig ki Kristu, ne iring kiw te lawa zin ne iyan sikandin ulu tew. Ne sikitew is lawa zin, ne wazà kurang te ked-ulini zin kenitew su ziyà sikandin te minsan hendei te tivuuk he kelimbag̵an.

Ipisu 3:19

Berakat he mesavut niw is gag̵ew zin keniyu, minsan pa te kenà heini egkepurung egkesavut te minsan hentei. Egkesuatan ku heini su wey metuman diyan te keniyu is wazè din kurang he kegkeulini keniyu te Megbevayà.

Kulusas 1:19

Ne egkesuatan te Amey tew he Megbevayà he ke hengkey sikandin, iyan ded daan sikan is Anak din.

Kulusas 2:3

Su iyan dà sikandin ebpekeveg̵ey te minsan hengkey he tutuu he ketau wey tutuu he kedsavut.

1 Pedro 1:11

Mid-istudyuwan dan ke keenu wey ke egkemenumenu is kegketuman kayi, su in-ulin heini kandan te Wag̵as he Mulin-ulin he ebpuun diyà te ki Kristu. Impesavut din kandan he zuen menge kemeresayan he egkeantus ni Kristu zini te kelibutan ne emun egketapus haazà edhimuwen sikandin he utew lavew.

1 Pedro 1:2

Nengaaram kew te Megbevayà he Amey tew sumalà is kebayè din dengan he iyan is: edhimuwen kew zin he metazeng pinaag̵i te Wag̵as he Mulin-ulin wey kew mehimu he menge sakup ni Jesu Kristu ne wey kew zaan mepesaylu tenged te kebpelisi keniyu te lengesa ni Jesus. Berakat he ikeg̵ag̵ew kew zin wey mebmelinawen kew utew.