Ipisu 6:23 - Manobo Western Bukidnon

²³ Is Amey tew he Megbevayà wey is Nengazen tew he si Jesus, berakat he sikiyu is menge suled dey, tuvazi kew zan te melinawen he kebpekesavuk, wey ipeehè dan keniyu is kebmahala zan keniyu ziyà te g̵ehinawa zan wey heg̵eta zan is kedtuu niw kandan.

Ipisu 6:23 Кръстосани препратки

Juan 14:27

Edteg̵akan ku is isip niw te kelinew. Is kelinew he zini te isip ku, iyan idtag̵ak ku keniyu. Is menge etew zini te kelibutan he kenà edtuu, kenè dan ebpekeveg̵ey keniyu te kelinew he iring kayi. Ne kinhanglan he kenà mebmesakit is gehinawa niw ne kenè kew zaan mahandek.

Ruma 1:7

Ne tenged kayi, ebpesuratan ku sikiyu is langun diyan te inged he Ruma he mahal ziyà te g̵ehinawa te Megbevayà he midhimu zin he menge sakup din. Is Amey tew he Megbevayà wey is Nengazen tew he si Jesu Kristu, berakat he ikeg̵ag̵ew kew zan wey iveg̵ey keniyu is melinawen he kebpekesavuk.

Ruma 15:33

Is Megbevayà he iyan puunà te kelinew, berakat he ulini kew zin.

1 Kurintu 1:3

Ikeg̵agew kew te Amey tew he Megbevayà wey te Nengazen tew he si Jesu Kristu ne veg̵ayi kew zan te melinawen he kebpekesavuk.

2 Kurintu 13:11

Menge suled, iyan dà heini menge lalag ku keniyu; berakat he mebmelipayen kew. Purungi niw is menge ulaula niw; tumana niw is menge sambag ku keniyu. Kinahanglan he mesevaha is gehinawa niw ne mebmelinawen is ked-ubpè niw. Su emun ebeelan niw heini, is Megbevayà he iyan puunà te g̵ag̵ew wey kelinew, layun eduma keniyu.

Gelasya 5:6

Su emun tumutuu ki en ki Jesu Kristu, neked-iiring kiw en diyà te Megbevayà is nengesirkunsidar wey is wazà mesirkunsidar. Iyan dà duen din pulus diyà te Megbevayà is kedtuu ta kandin he egketuusan heini pinaag̵i te g̵ag̵ew ta te zuma ta.

Gelasya 6:16

Is minsan hentei he ed-ikul kayi te ibayà he impenurù ku pinaag̵i kayi te surat, berakat he mehizuwi te Megbevayà wey veg̵ayi te melinawen he kebpekesavuk, ne kenà iyan dà sikandin, kekenà, elin daan is langun he menge tutuu he tumutuu te Megbevayà.

Ipisu 6:24

Berakat he ikeg̵ag̵ew te Megbevayà is minsan hentei he kenà egkeawà diyà te g̵ehinawa zin is kebmahala zin te Nengazen tew he si Jesu Kristu.

1 Tiselunika 5:8

Iyan, sikitew mulà is nesakup te maandew, kinahanglan he ed-eg̵enen tew is menge mezaat he suat tew. Idsun-ud tew is limbutung he iyan is kedtuu tew te Megbevayà wey is kebmahala tew zini te g̵ehinawa tew te menge zuma tew. Ne iring te kalù tew te sundaru is kedhemeni tew te kebperateng tew te kedlibriya te Megbevayà kenitew te silut.

2 Tiselunika 1:3

Menge suled, kinahanglan he layun dekelà is kebpeselemati zey te Megbevayà tenged keniyu. Ne hustu heini su layun dekelà is ked-uswag te kedtuu niw wey layun daan ed-iseg is kebmahala niw te uman sevaha he menge zuma niw ziyà te g̵ehinawa niw.

2 Tiselunika 3:16

Berakat he iveg̵ey keniyu te Nengazen is melinawen he g̵ehinawa te minsan keenu he timpu wey te minsan hengkey is kebpekesavuk niw. Iyan sikandin ebeg̵ey te kelinew. Dumahi kew is langun te Nengazen.

1 Timoteo 1:14

Ne kenà dutun dà taman su utew ad ingkeg̵ag̵ew te Megbevayà ne g̵untaan neketuu ad ki Jesu Kristu ne utew en sikandin mahal zini te g̵ehinawa ku.

1 Timoteo 1:3

Ed-umanan ku egkeg̵iya kenikew is sambag ku hein mid-awà a ziyan pehendiyà te Mesidunya. Iyan is: kenè ka med-awà diyan te Ipisu. Iyan idsembag̵i ku kenikew su zuen menge etew ziyan he kinahanglan he zewaya nu. Dewaya nu he med-engked dan te kebpenurù te menge sayep he tuluuwen

1 Timoteo 5:8

Su ke zuen tumutuu he kenè din ed-elimahan is menge edsarig kandin, lavew en sikandan he ziyà ed-ubpà te valey zin, mid-engkezan din en is kedtumana zin te tuluuwen tew. Meupiya pa sikan is wazà meketuu kenà sikandin.

1 Pedro 5:14

Mebpelimlimuey kew. Mebmelinawen is gehinawa te uman sevaha keniyu he nekidsevaha ki Kristu.

3 Juan 1:14

Egkesuatan ku he kenè en utew egkeug̵et edhendiyan a ne human ki ebpekedlalag.

Impezayag 1:4

Siak si Juan, ne ebpesuratan ku is pitu he gurupu te menge tumutuu he ziyà te prubinsya he Asya. Ibpengumew-umew ku he ikeg̵ag̵ew kew te Megbevayà, wey te Wag̵as he Mulin-ulin, wey ni Jesu Kristu, ne iveg̵ey zan daan keniyu is melinawen he kebpekesavuk. Is Megbevayà, daan en sikandin te wazè pa limbag̵a is minsan hengkey; kemulu pa sikandin guntaan wey kenà sikandin egkehanew te wazà pidtemanan. Is Wag̵as he Mulin-ulin he ziyà ed-ubpà te etuvangan te pinuuwà te Megbevayà, ne pitu is gehem din. Si Jesu Kristu, iyan egkeserig̵an is lalag din. Iyan sikandin kes nehuna he zuen din beg̵u en he untung pinaag̵i te kegkevenhawa kandin. Iyan sikandin ebayàbayà te menge hadì dini te kelibutan. Dekelà is gehinawa zin kenitew. Midlibri kiw zin te silut te menge salè tew pinaag̵i te kebpaag̵as din te lengesa zin.