Ipisu 6:21 - Manobo Western Bukidnon

²¹ Si Tikiku is minahal tew he suled wey metinumanen he sulug̵uen te Nengazen tew, iyan ebpeketudtul keniyu mehitenged te kebpekesavuk ku wey ke hengkey is egkeulaula ku kayi.

Ipisu 6:21 Кръстосани препратки

Nengeulaula 20:4

Ne zuen tigBiriya, si Supatir he anak ni Piru he nekezuma kandin. Elin daan miduma si Eristarku wey si Sigundu he menge tigTiselunika, si Gayu he tigDirbi, wey si Timoteo, si Tikiku wey si Trupimu he menge tig-Asya.

1 Kurintu 4:17

Umba, edsug̵uen ku ziyan te keniyu si Timoteo. Minahal ku sikandin he anak he utew metinumanen te menge sug̵ù te Nengazen. Ibpenurù din keniyu is menge ulaula ku, ne iyan heini meupiya he ed-ul-ulahan te tumutuu ki Kristu, ne iyan daan ibpenurù ku te menge tumutuu ziyà te minsan hendei he inged.

Pilipus 1:12

Menge suled, egkesuatan ku he mesavut niw he is langun he mereg̵en he nehitavù kediey, ne kenà mezaat, kekenà, meupiya, su neketavang kedì te kedsengyawa te Meupiya he Tudtulanen.

Kulusas 1:7

Impenurù keniyu heini ni Ipapras he minahal he zuma zey he sulug̵uen ni Kristu. Metinumanen sikandin te menge sug̵ù ni Kristu pinaag̵i te kedtavang din kenami.

1 Timoteo 4:6

Emun ibpenurù nu heini ziyà te menge zuma he tumutuu egkehimu ka he metinumanen he sulug̵uen ni Jesu Kristu. Ne egkeheg̵et is kedtuu nu pinaag̵i te ked-istudyu nu te tuluuwen tew wey pinaag̵i te kedhamen nu te hustu he impenurù kenikew.

2 Timoteo 4:12

Midsug̵ù ku si Tikiku ziyà te inged he Ipisu.

Tito 3:12

Emun ebpeveyaan ku sikew ki Ertimas ne emun kenà, si Tikiku, gaanggaan ka telavuk kediey ziyà te Nikupulis su ziyà a ed-ubpà ke egkeuma is tipenguzan.

Pilimun 1:16

Ne g̵untaan kenà sikandin uripen nu zà duen, kekenà, utew pa mahal kenà is uripen su suled nu en daan tenged te kedtuu zin ki Kristu. Utew sikandin mahal zini te g̵ehinawa ku ne mahal pa zaan diyan te kenikew, kenà tenged dà te uripen nu, kekenà, tenged daan te suled nu en tenged te Nengazen.

1 Pedro 5:12

Mid-ug̵upan a ni Silvanu te edsurat kayi. Suled tew sikandin he utew egkeserig̵i. Iyan insurati ku keniyu kayi su wey ku meheg̵et is kedtuu niw. Ibpesavut ku keniyu he impenurù ku en keniyu he tutuu is gag̵ew te Megbevayà keniyu. Ne kenè niw heini lipati.

2 Pedro 3:15

Kenè niw lipati he iyan ibpelevaya te Megbevayà kenitew su wey melibri ki te silut din. Iyan daan heini impesavut keniyu te emig̵u tew he si Pablo zutun te surat he impeuwit din keniyu. Impinted heini kandin te Megbevayà.