Ipisu 6:11 - Manobo Western Bukidnon

¹¹ Gemita niw is langun he menge himan te kebpekidtebek he ibeg̵ey te Megbevayà su wey kew mekesukul ki Setanas emun egemiten din is ketau zin te kegkeiza zin keniyu.

Ipisu 6:11 Кръстосани препратки

Marcos 13:22

Su ebpenlepew is teruen he etew he egkeg̵iyen dan he iyan sikandan sikan is hadì he mibpilì te Megbevayà wey ke egkeg̵iyen dan be he ebpeneuven sikandan te Megbevayà. Ne ebpemeehè dan te egkengein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Ruma 13:12

Su zini te kelibutan, iring te utew merusirem tenged te mezaat he ulaula, iyan, meg̵aan en egketapus is kezukileman su meg̵aan en egkepawà, he ke và dà egkeg̵iya, meg̵aan en edlikù si Kristu. Ne tenged kayi, ed-engkezan tew en is menge mezaat he ulaula he zait te kezukileman ne idsun-ud tew is limbutung he iyan is kerayag, he ke và dà egkeg̵iya, ed-ul-ulahan tew is meupiya he ulaula.

Ruma 13:14

Ne idsun-ud ta is Nengazen tew he si Jesu Kristu, he ke và dà egkeg̵iya, ed-ul-ulahan ta is ulaula zin. Ne kenè te en maan ed-isipen is kedtumana te menge mezaat he kebayà te lawa ta.

1 Kurintu 10:13

Is minsan hengkey he ibpenuley kenita ni Setanas, ne kenà beg̵u su layun din en ibpenuley te menusiyà is iring dutun. Iyan, egkeserig̵an ta is Megbevayà su kenè din idtug̵ut he ebpenulayan ki te subra te egkeantus ta. Layun din ibeg̵ey kenitew is kelig-en su wey zuen paag̵i te kedlikayi ta he kenè ki mekeulaula te mezaat.

2 Kurintu 10:4

Su is menge ketezengan, he ke và dà gumaan, he idsukul zey te mezaat, ne kenà ebpuun te etew, kekenà, mekeg̵eg̵ehem utew su ziyà ebpuun te Megbevayà. Ne heini is menge ketezengan, kenà egkesukulan te minsan hengkey he tarù he ketezengan he igkuntada te Megbavayà minsan ke utew melig-en.

2 Kurintu 11:3

Egkeipeng a keniyu su kela ke meengkezi niw is kebpurungi niw kedtumana te menge sug̵ù ni Kristu su kela ke mesahug is kedtuu niw te selakew he edtuuwen. Kela ke meiringi niw si Ibà dengan su mid-akalan sikandin te teruen he uled he iyan si Setanas.

2 Kurintu 2:11

Ne umba ed-ul-ulahan ku heini su wey kenè kiw meekali ni Setanas. Netuenan tew ke hengkey is mezaat he edhimuwen din pezem dini te kenitew.

2 Kurintu 4:4

Kenè dan edtuu su mid-elangan is isip dan ni Setanas he iyan ed-ezapen te menge etew kayi te kelibutan. Tenged kayi kenà egketeyawan is isip dan te Meupiya he Tudtulanen mehitenged te utew kegkelavew ni Kristu. Pinaag̵i ki Kristu egkesayud ki ke hentei is Megbevayà su iyan sikandin dagwey te Megbevayà.

2 Kurintu 6:7

ibpenurù dey is tutuu he Lalag te Megbevayà ne edtevangan key te g̵ehem te Megbevayà. Pinaag̵i kayi te langun egketuusan he menge sulug̵uen key te Megbevayà. Iyan kelasag dey wey lembitan dey is metazeng he ulaula.

Ipisu 4:14

Dutun ne egkehimu he kenè kiw en ebpekeiring te vatà su is etew he iring dutun ne egkehalinhalin is kedtuu zin su melemu ebpeketuu te minsan hengkey he tuluuwen he ibpenurù kandin te menge teruen he etew he metau he edlimbung.

Ipisu 4:24

Kinahanglan he edhimuwen kew he veg̵u en he etew he iyan sikan is beg̵u en he linimbag pinaag̵i te zagwey te Megbevayà. Egketuusan heini is beg̵u he etew pinaag̵i te menge tutuu wey metazeng he ulaula he ibpeulaula keniyu te Megbevayà.

Ipisu 6:13

Umba, menge suled, gemita niw en is menge himan te kebpekidtebek he imbeg̵ey te Megbevayà. Su zutun emun egkeuma haazà is timpu he zutun utew mereg̵en is kedtebeka te menge mezaat, ne egkesukulan niw is menge kuntada niw ne emun egketapus en haazà is tebek ne wazè kew meewai te zesen.

Kulusas 3:10

Ne g̵untaan midhimu ki en te Megbevayà he veg̵u en he etew he edhimuwen din he iring te kandin. Umba midhimu ki zin he veg̵u su wey ta mepurung mesavut ke hentei sikandin.

1 Tiselunika 5:8

Iyan, sikitew mulà is nesakup te maandew, kinahanglan he ed-eg̵enen tew is menge mezaat he suat tew. Idsun-ud tew is limbutung he iyan is kedtuu tew te Megbevayà wey is kebmahala tew zini te g̵ehinawa tew te menge zuma tew. Ne iring te kalù tew te sundaru is kedhemeni tew te kebperateng tew te kedlibriya te Megbevayà kenitew te silut.

Hibriyuhanen 7:25

Ne tenged kayi, egkehimu te minsan keenu he timpu he edlibriyen din te silut is minsan hentei he menge etew emun pinaag̵i kandin ed-aput sikandan diyà te Megbevayà su wazà pidtemanan te untung din, ne layun din egkehimu te edtavang sikandan diyà te etuvangan te Megbevayà.

Santiago 4:7

Ne tenged dutun, pesakup kew te Megbevayà. Sukuli niw si Setanas ne ebpelag̵uy keniyu.

1 Pedro 5:8

Med-andam kew, mebantey kew su is kuntada tew he si Setanas, edrig̵urig̵u en he iring te erimaung he edhinig̵er su ebpen-ahà te edewiyen din.

Hudas 1:24

Utew zekelà is kebpeselemati tew te Megbevayà. Iyan metau he edtavang kenitew su wey kenè kiw mekesuwey ziyà te kandin. Iyan metau he id-etuvang kiw keuzemà kandin diyà te vulawan he ed-ulian he wazà igkesewayi kenitew he utew zekelà dutun is kelipey tew.

Impezayag 12:9

midsegseg haazà is dekelà he uled puun te langit. Ne haazà he deragun, iyan si Setanas, sikan is mezaat he mulin-ulin he mid-ekalan din is tivuuk he menusiyà. Ne sikandin wey is langun he menge velinsug̵uen din, intimbag sikandan pehendini te tanà.

Impezayag 19:20

Ne midakep haazà is langgam ne midakep daan kes ebpeneuven ni Setanas, sikan is mibpaahà te menge egkein-inuwan diyà te etuvangan te langgam. (Pinaag̵i zutun te menge egkein-inuwan mid-ekalan din wey meketuu te langgam haazà is langun he menge etew he midtiyapan te tiyap duen te langgam wey mid-azap te ledawan te langgam.) Ne sikan is langgam wey kes ebpeneuven ni Setanas, intimbag sikandan he uuyag pa ziyà te ranew he egkeregreg te esupri.

Impezayag 2:24

Ne sikiyu is duma ziyan te Tiyetira he wazà mekezawat te penurù dutun te vahi, he ke và dà egkeg̵iya, wazè niw zewata is egngezanan te menge mezalem he penurù ni Setanas, wazè en duma pa he ebpeveelan ku keniyu.