Ipisu 6:10 - Manobo Western Bukidnon

¹⁰ Menge suled, ketepusan heini he menge lalag ku keniyu: kinahanglan he lig-eni niw is kedsarig niw te Nengazen wey te lavew he zekelà he gehem din.

Ipisu 6:10 Кръстосани препратки

1 Kurintu 16:13

Layun kew, menge suled, med-andam; hemeni niw te edtuu si Jesu Kristu; kenè niw ikeeled is kedtuu niw, kekenà, ipeehè niw is kelig-en te kedtuu niw.

2 Kurintu 13:11

Menge suled, iyan dà heini menge lalag ku keniyu; berakat he mebmelipayen kew. Purungi niw is menge ulaula niw; tumana niw is menge sambag ku keniyu. Kinahanglan he mesevaha is gehinawa niw ne mebmelinawen is ked-ubpè niw. Su emun ebeelan niw heini, is Megbevayà he iyan puunà te g̵ag̵ew wey kelinew, layun eduma keniyu.

Ipisu 1:19

Ne id-ampù ku zaan he ipesavut din keniyu ke hengkey is kenà egkesukud he utew lavew he zekelà he g̵ehem te Megbevayà he zini edterebahu te kenitew te menge tumutuu kandin. Ne iyan heini sikan is utew zekelà he g̵ehem

Ipisu 3:16

Ne edhengyuan ku sikandin he puun te utew zekelà he g̵ehem din, beg̵ayi kew zin te utew melig-en he kedtuu pinaag̵i te ked-ulini keniyu te Wag̵as he Mulin-ulin,

Pilipus 3:1

Na, menge suled, ketepusan heini he sambag ku keniyu. Lipey kew tenged te upakat niw te Nengazen. Maambe ke idsublì ku keniyu is daan he sambag ku su melemu zà heini, ne kela ke egkehimu he pinaag̵i kayi egkelig-enan is isip niw.

Pilipus 4:13

Egkehimu ku is minsan hengkey he ibpeulaula kedì tenged te tavang ni Kristu he iyan edlig-en kedì.

Pilipus 4:8

Ketepusan heini, menge suled, he menge lalag ku keniyu. Iyan niw itag̵ù diyà te isip niw is meupiya, is dait he igkezelig̵i, is tutuu he tuluuwen, is metazeng wey hustu wey mekempet he ulaula, wey is minsan hengkey he igkehimu te minsan hentei he egketahud.

Kulusas 1:11

Ne ibeg̵ey zin keniyu is dekelà he g̵ehem he ebpuun te zekelà he g̵ehem din, ne tenged kayi te g̵ehem layun niw egkeantus is kemereg̵enan he zekelà is kelipey niw.

2 Timoteo 2:1

Sikew, Timoteo, is iring te tutuu he anak ku, heg̵eta nu is kedtuu nu su zekelà is tavang te Megbevayà kenita tenged te nekidsevaha ki ki Jesu Kristu.

2 Timoteo 4:17

Minsan pa zutun midtevangan a te Nengazen ne midlig-enan e zin ne tenged dutun nepurungan ku te edsangyew is Meupiya he Tudtulanen diyà te langun he menge etew zutun he kenà menge Hudiyu. Ne tenged dutun nelibri a ne wazà a mehimetayi.

1 Pedro 3:8

Duen pa egkeg̵iyen ku keniyu te langun ne iyan is: kinahanglan he mesevaha is isip niw wey g̵ehinawa niw. Mebpepurpurungè kew wey megig̵ineg̵awè kew su iring kew en te teltelesuled. Kinahanglan he memetulanged kew wey kenè kew menge mepelevawen.

1 Pedro 4:11

Sikita is edwali, kinahanglan he is kedwali ta, ne utew hustu he iring te iyan en edwali is Megbevayà. Sikita is edtavang, ne kinahanglan he kenè ta edlipatan he is idtavang ta, ne ziyà ebpuun te Megbevayà su wey pinaag̵i te g̵ehem ni Jesu Kristu iyan mevantug is Megbevayà te minsan keenu su iyan dait he edelig̵en wey zait he ebayàbayà te wazà pidtemanan.

1 Pedro 5:10

Mevavè dà is ked-antus niw ne edheg̵eten te Megbevayà is kedsarig niw kandin. Ebig̵eran kew zin, edlig-enan kew zin wey ebeg̵ayan kew zin te zesen. Iyan sikandin puunà te minsan hengkey he tavang kenitew. Midhimu kiw zin he tumutuu su wey pinaag̵i te kebpekidsevaha tew ki Kristu mekeambit kiw te wazà pidtemanan he utew kegkelavew zin.

1 Juan 2:14

Sikiyu is menge vatà, ebpesuratan ku sikiyu su menge emig̵u kew en te Amey tew he Megbevayà. Iyan ibpesurati ku keniyu te menge meg̵urang is: tenged te emig̵u kew en ni Kristu. Daan en sikandin te wazè pa limbag̵a is minsan hengkey. Iyan ibpesurati ku keniyu te menge menguhed su mevig̵er en is kedtuu niw ne kenà egkeawà diyan te isip niw is Lalag te Megbevayà, wey nezaag niw en si Setanas.