Ipisu 5:8 - Manobo Western Bukidnon

⁸ Su zengan utew merusirem is ibayè niw, iyan, guntaan neteyawan is ibayè niw su nehimu kew en he menge sakup te Nengazen. Ne tenged kayi, kinahanglan he zait is ulaula niw te ked-ikula niw te merayag he ibayà.

Ipisu 5:8 Кръстосани препратки

Mateo 3:8

Emun tutuu he mid-iniyug̵an niw en is ulaula niw he mezaat, ipeehè niw pinaag̵i te menge meupiya he vaal niw.

Mateo 4:16

Is langun kayi he menge etew, henduen be te ziyà mekeubpà te merusirem wey henduen be te ziyè dan en te Iveyaan su g̵eine te nekesuwey zan te Megbevayà. Iyan, diyà te huziyan he timpu egketeyawan en sikandan su ebpekeuma ziyà te kandan is ebpeketayew te isip dan.”

Lucas 1:79

Henduen be te ziyè kiw ed-ubpà te utew merusirem su utew kiw egkengehandek te silut he iyan is wazè din ketepusan he kemetayen; iyan, emun ebpekeuma is Nengazen tew edteyawan kiw zin te g̵ag̵ew zin. Ne ibpeehè din kenitew is paag̵i wey ebmelinawen is ked-ubpè tew,” ke si Zacarias.

Lucas 16:8

Ne zutun,” ke si Jesus, “hein nezineg haazà dutun te egalen din ke hengkey is mid-ulaula zutun te sulug̵uen din, ne nekekag̵i te, ‘Hey, utew metau sikandin su ebpeneg̵ane en sikandin he zaan te keuyag̵an din keuzemà.’ ” Ne ke si Jesus te, “Is menge etew he kenà ebpemineg te menge lalag te Megbevayà, utew metau te paag̵i te kegkezeyzey zan. Iyan, is menge etew he sakup te Megbevayà, kenè dan bes mulà utew metau te paag̵i wey mezeyzey sikandan keuzemà diyà te langit.

Juan 1:9

Ne zutun he timpu nekeuma zini te kelibutan si Kristu, sikan is tutuu he kerayag. Iyan sikandin sikan is ebpeketayew te isip te tivuuk he menusiyà.

Juan 12:35

Ne migkag̵i ziyà te kandan si Jesus te, “Siak is kerayag he ebpeketayew te kedsavut niw, egkesipeg̵an en is ked-ewai ku keniyu. Te kemulu pa merayag, purungi niw susiya is ibayè niw su kela ke egkezukileman kew. Is edhipanew he merusirem is ibayè din, kenè din egketuenan ke hendei sikandin ebpekepevayà.

Juan 12:36

Siak is kerayag. Te kemulu e pa zini te keniyu, sarig kew kediey te kerayag su wey layun meteyawi is isip niw.” Ne zutun te nekag̵i ni Jesus haazà, mid-ewaan din haazà is mezakel he menge etew ne mid-eles sikandin.

Juan 12:46

Umba midhendini a is kerayag te kelibutan su wey ku meteyawi is isip te menge etew. Ne ke zuen edtuu kedì, kenè en egkerusireman is isip din.

Juan 8:12

Ne mid-uman megkag̵i si Jesus diyà te menge etew, ke sikandin te, “Iyan a sikan is kerayag he ebpeketayew te isip te tivuuk he menusiyà. Ne is etew he edsundan kediey, kenà en sikandin egkesakup te g̵ehem te kerusireman, kekenà, egketeyawan is kedsavut din te kerayag he ebpekeveg̵ay te untung he wazà pidtemanan.”

Nengeulaula 17:30

Dengan hein wazè pa sikandin mekilala te menusiyà, mibpesagdan din is mezaat he ulaula te menge etew, iyan, guntaan indawey zin en te langun he menge etew te minsan hendei he ibpeiniyug̵an is memezaat he ulaula.

Nengeulaula 26:18

Ne is ibpesavut nu kandan, egkehimu he iyan igkeawà te kegkelakap dan te kedtuu wey zan daan meewai is merusirem ne medhalin dan diyà te merayag. Ne pinaag̵i kayi egkepeleg̵uyan dan is kebeyveyai kandan ni Setanas ne ebpekepesakup dan te Megbevayà. Ne egkepesaylu is menge salè dan tenged te kedtuu zan kedì ne egkehimu zan daan he menge tumutuu he pinilì te Megbevayà.’

Ruma 1:21

Su minsan te nesavut dan en he zuen Megbevayà, wey netuenan dan he zait sikandin he edtehuzen, wazè dan sikandin tehuza, ne wazè dan peselemati is gag̵ew zin kandan, kekenà, nehimu he wazè en pulus te egketag̵ù diyà te isip dan. Ne tenged kayi, iring te nezukileman is menge isip dan su kenè dan en ebpekesavut te hustu he ibpesavut pezem kandan te Megbevayà.

Ruma 13:12

Su zini te kelibutan, iring te utew merusirem tenged te mezaat he ulaula, iyan, meg̵aan en egketapus is kezukileman su meg̵aan en egkepawà, he ke và dà egkeg̵iya, meg̵aan en edlikù si Kristu. Ne tenged kayi, ed-engkezan tew en is menge mezaat he ulaula he zait te kezukileman ne idsun-ud tew is limbutung he iyan is kerayag, he ke và dà egkeg̵iya, ed-ul-ulahan tew is meupiya he ulaula.

Ruma 2:19

Kunaan niw ke iyan kew ebpekeag̵ak te menge etew he nengelakap is isip dan, ne kunaan niw zaan ke iyan kew sulù he ebpeketayew te ibayè dan pehendiyà te Megbevayà.

1 Kurintu 1:30

Ne minsan pa zutun, midhimu te Megbevayà he mesevaha si Jesu Kristu wey sikitew ne midhimu zin daan he zuen ketau tew he ebpuun te ki Kristu. Ne pinaag̵i ki Kristu mid-isip kiw en he metazeng te Megbevayà ne nehimu kiw en daan he menge g̵aked te Megbevayà, ne nevelukasan kiw zin te kegkeuripen tew te mezaat he ulaula.

2 Kurintu 3:18

Ne, menge suled, sikitew is langun, nesavut tew en he utew lavew is gehem te Nengazen tew, ne wazà ebpekealang te kedsevuta tew kayi. Ne pinaag̵i kayi te g̵ehem he ebpuun te Nengazen he iyan kes Wag̵as he Mulin-ulin, edhimuwen kiw zin he iring te kandin ne layun ed-iseg heini is gehem.

2 Kurintu 4:6

Su zutun te kedlimbag̵a te Megbevayà te langun migkag̵i sikandin te, “Maawà is kerusireman ne mehimu is kerayag.” Ne iyan daan sikandin kes midtayew te isip dey su wey zey mesavut ke hengkey is gehem te Megbevayà he impezayag pinaag̵i ki Jesu Kristu.

2 Kurintu 6:14

Kenè kew, menge suled, mebpekidsevaha te menge etew he kenà tumutuu su kenà egkehimu he egkesevaha is meupiya wey mezaat. Ne kenà daan egkehimu he ebpeked-amur is kerayag wey is merusirem.

Gelasya 5:25

Ne is Wag̵as he Mulin-ulin, geina te mibeg̵ayan ki zin te veg̵u en he untung, kinahanglan he ebpevayàbayè ki zaan kandin.

Ipisu 2:2

Dutun he timpu mid-ikul niw is mezaat he ibayà he iyan ed-ikulen te menge etew he kuntada te Megbevayà. Midtuman kew te menge sug̵ù ni Setanas. Iyan sikandin ebayàbayà te menge zuen din gehem diyà te hewhewanan. Iyan daan sikandin ebayàbayà te langun he kenà ebpemineg te menge sug̵ù te Megbevayà.

Ipisu 4:18

Wazè dan hanew te hustu he ibayà ne wazè dan untung he ibeg̵ey te Megbevayà, geina te nengepaglung sikandan tenged te kezesen te g̵ehinawa zan.

Ipisu 5:2

Kinahanglan he ipeehè niw layun he mahal ziyà te g̵ehinawa niw is menge zuma niw iring te mahal kiw ziyà te g̵ehinawa ni Kristu. Mibpehimatey sikandin he elili kenitew wey kiw zin melibri. Nehimu heini he pemuhat he utew mehemut, he ke và dà egkeg̵iya, utew egkesuati te Megbevayà.

Ipisu 6:12

Su kenà iyan edtebeken tew is menge etew zà duen, kekenà, iyan edtebeken tew is menge mezaat he kedesenan he ziyà ed-ubpà te langit wey is menge kenà egkeahà he hadì, wey menge egalen, wey menge ebayàbayà te langun he menge mezaat he etew he nesakup te kerusireman guntaan dini te kelibutan.

Kulusas 1:12

Ne kenà duen dà taman su zekelà dutun is kebpeselemat niw te Amey tew he Megbevayà tenged te kedhimuwa zin keniyu he zait he mekeambit kew zutun te langun he ibeg̵ey zin diyà te keniyu te menge g̵aked din he midteyawan is isip dan.

Kulusas 1:13

Midtevangan kiw te Amey tew he Megbevayà ne tenged kayi wazè kiw en maan meveyveyai te kerusireman, he ke và dà egkeg̵iya, si Setanas. Ne g̵untaan iyan en ebayàbayà kenitew is Anak te Megbevayà he si Jesus he utew mahal ziyà te g̵ehinawa te Megbevayà.

Tito 3:3

Su sikita zaan is tumutuu, engey ki zengan wey mesinupaken ki te Megbevayà su wazè ta meturedu is tutuu he ibayà. Nengeuripen ki te menge mezaat he kebayà te lawa ta wey te menge kelipey he kenà meupiya. Neteg̵eb dengan is isip ta te kelelalung wey kesina. Nepeukan ki te menge etew ne nepeukan ta zaan sikandan.

1 Juan 1:7

Emun merayag mulà is ibayè tew iring te merayag is Megbevayà, he ke và dà egkeg̵iya, emun mibpesakup kiw te Megbevayà, egkeupakat kiw ne layun kiw edlumpiyuwi te minsan hengkey he salè tew pinaag̵i te kebpelisi kenitew te lengesa ni Jesus he Anak te Megbevayà.