Ipisu 4:14 - Manobo Western Bukidnon

¹⁴ Dutun ne egkehimu he kenè kiw en ebpekeiring te vatà su is etew he iring dutun ne egkehalinhalin is kedtuu zin su melemu ebpeketuu te minsan hengkey he tuluuwen he ibpenurù kandin te menge teruen he etew he metau he edlimbung.

Ipisu 4:14 Кръстосани препратки

Mateo 11:7

Ne hein nekeg̵enat en haazà is menge sumusundan ni Juan, migkag̵i si Jesus diyà te mezakel he nengetig̵um he menge etew, ke sikandin te, “Hein midhilesung niw si Juan diyà te tanà he wazà duen ed-ubpà he etew, hengkey is inhilesunga niw kandin? Iyan be ed-ahaan niw is etew he iring te sagbet he egkengewaleng te keramag? Kenà iyan haazà su kenà egkehalinhalin is gehinawa ni Juan.

Mateo 24:11

Ne zutun ebpemenlepew is mezakel he teruen he etew he egkag̵i is uman sevaha kandan he ebpeneuven sikandin te Megbevayà. Ne mezakel is egkelimbungan dan.

Mateo 24:24

Su zuen ebpemenlepew he menge teruen. Ne egkag̵i is kada sevaha kandan te, ‘Iyan a sikan is hadì,’ ne emun kenà, ne ke sikandin te, ‘Ebpeneuven a te Megbevayà.’ Ne ebpemeehè dan te egkein-inuwan wey menge singyal su ibpetuu zan pezem te menge tarù dan, ke egkehimu, is menge pinilì te Megbevayà.

Nengeulaula 23:21

Iyan, kenè nu itug̵ut su zuen menge kepatan he etew he ed-eles su ed-ayan kandin. Meheg̵et is uyun dan he kenè dan egkaan wey ed-inum taman te kenè dan pa egkepatey si Pablo. Mid-andam dan en ne iyan dà edteg̵azan dan is sug̵ù nu.”

1 Kurintu 12:2

Netuenan niw he zengan te wazè kew pa meketuu ki Jesus ne zuen ebpengelintau keniyu he mekeazap kew te menge ledawan, ne pinaag̵i kayi te menge wazè dan gehinawa he ledawan ne layun egketazin dengan is menge isip niw.

1 Kurintu 14:20

Kinahanglan, menge suled, he kenà iring te ked-isip te menge vatà is ked-isipa niw kayi. Iyan dà ulaula te vatà he meupiya he ed-iringan, haazà is kenè dan kegketueni te ked-isip te mezaat. Iyan, kinahanglan he iring te ked-isip te meg̵urang is ked-isipa niw kayi.

1 Kurintu 3:19

Su is ketau kayi te kelibutan, ne wazè din pulus diyà te Megbevayà su utew lavew is kandin he ketau. Su zuen insurat he Lalag te Megbevayà he edhenduen te, “Is ketau te metau he etew he igkelupig̵i zin te zuma, egkehimu he iyan ibpekesipè din te selaid te Megbevayà.”

2 Kurintu 2:17

Iyan, sikami, kenè dey ed-iringan is ulaula te mezakel he ebpenurù su ziyà te kandan henduen be te ibpenapì dan is Lalag te Megbevayà. Ne tenged te midsugù key te Megbevayà, ne tenged daan te edsusiyen key layun te Megbevayà, tutuu is tuyù dey wey egkeg̵iyen dey su nekidsevaha key ki Kristu.

2 Kurintu 4:2

Sikan is menge mahawag he ulaula he meeles he ebeelan te zuma, kenè dey mulà ebeelan. Kenè key edtarùtarù ne kenè dey edhelinen is Lalag te Megbevayà, kekenà, hustu is kedsengyawa zey su wey mesavut te minsan hentei he kenà tarù is ebeelan dey. Iyan edsusi kayi is Megbevayà.

Gelasya 3:1

Sikiyu is menge tigGelasya, henduen be te kenè kew metau he ed-isip-isip! Utew a egkeinuinu keniyu! Maan is ebpemineg̵en niw is menge etew he ebpetuman keniyu te kesug̵uan he imbilinbilin ni Moises? Utew keladu is kebpenurua ku keniyu te nehimu ni Jesu Kristu kenitew pinaag̵i te kebpatey zin diyà te krus.

Ipisu 6:11

Gemita niw is langun he menge himan te kebpekidtebek he ibeg̵ey te Megbevayà su wey kew mekesukul ki Setanas emun egemiten din is ketau zin te kegkeiza zin keniyu.

1 Timoteo 3:6

Ne kinahanglan daan he kenà sikandin beg̵u pa he tumutuu, su kela ke mehimu he mepelevawen ne egkesilutan te Megbevayà iring te midsilutan si Setanas.

2 Timoteo 1:15

Netuenan nu en he is langun he menge tumutuu zini he ebpuun te prubinsya he Asya, wazè e zan tevangi. Elin dutun si Pihilu wey si Hirmuhinis.

2 Timoteo 3:13

Iyan, is menge lalung he etew, wey is menge uvag kun tumutuu, ed-iseg mulà ebmezaat is menge ulaula zan. Edtezinen dan is isip te menge etew, iyan, egketazin daan is kandan he isip.

2 Timoteo 4:3

Umba idtelaan ku heini kenikew su egkeuma keuzemà is timpu he kenà edewaten te menge etew is tutuu he tuluuwen, kekenà, iyan dan edsunuzen is menge mezaat he kebayè dan. Ebpemepenurù dan te mezakel he menge menenudlù. Ne iyan ibpenurù kayi is tuluuwen he utew zan egkesuati te ebpemineg.

Hibriyuhanen 13:9

Umba, kenè niw tuuwi is menge selakew he tuluuwen he kenà iyan kes tutuu he impenurù keniyu. Iyan hustu he ibmelig-en te kedtuu tew is kedtevangi kenitew te Megbevayà, ne kenà iyan is kedlikayi te menge egkeenen he indawey te kesug̵uan su wazà heini ikezeyzey te menge etew he ebantey kayi.

Santiago 1:6

Ne emun ebuyù kew te ketau ziyà te kandin kinahanglan he edtuu kew he egkezawat niw te wazà duwazuwa. Su is etew he eduwazuwa, egkehalinhalin layun is isip din. Iring sikandin te vag̵el ziyà te zag̵at he minsan hendei zà duen hiyupa te keramag.

Santiago 3:4

Ne minsan is utew zekelà he barku he egkeuwit te mevendes he keramag, egketandang ta is ibayè din pinaag̵i te utew zeisek he pengawid din.

2 Pedro 2:18

Uvag mezalem is menge lalag dan, iyan, wazà pulus te egkeg̵iyen dan. Duen menge etew he ed-engkezan dan pezem is menge zaan he zuma zan he ed-ulaula te sayep, iyan, ebpenulayen sikandan dutun te menge menunudlù pinaag̵i te meremerik he kebayà te lawa zan.

1 Juan 2:19

Ne heini is menge kuntada ni Kristu, kenè tew sikandan tutuu he menge zuma su umba mid-ewaan kiw zan. Angin ke tutuu zan he zuma tew su wazè kiw zan geina ewai. Tenged te ked-awè dan egketuenan ta he kenè dan tutuu he menge zuma tew.

1 Juan 2:26

Ebpesuratan ku sikiyu wey kew med-andam su zuen menge etew he tarù is ibpetuuwan dan pezem keniyu.

1 Juan 4:1

Menge minahal ku he suled, kenè niw petuluy tuuwi is etew he egkag̵i he mid-ulinan sikandin te Wag̵as he Mulin-ulin. Gezami niw zè pa wey niw metueni ke ebpuun be te Megbevayà is ed-ulin kandin. Umba egkeg̵iyen ku heini su mezakel en is menge ebpenurù te tarù he midlepew zini te kelibutan he mid-ulinan sikandan te teruen he mulin-ulin.

Hudas 1:12

Ebpekezezaat sikandan te zengeg niw ke edtampu zan te keemuran niw su kenè dan mulà egkeeled dutun te kedtumana zan te mezaat he kebayè dan ke ebpekidtug̵en dan keniyu. Iyan dà egkeisip dan is kandan dà he egkesuatan. Wazè dan menge pulus; iring sikandan te menge g̵apun he wazà duen uzan he mibpagwis te keramag. Iring sikandan te menge kayu he kenà ebpemeg̵as minsan pa te iyan en pezem timpu te kebpemeg̵as. Ne umba kenà ebpekepemeg̵as su nepiley en ne neg̵angu.

Impezayag 19:20

Ne midakep haazà is langgam ne midakep daan kes ebpeneuven ni Setanas, sikan is mibpaahà te menge egkein-inuwan diyà te etuvangan te langgam. (Pinaag̵i zutun te menge egkein-inuwan mid-ekalan din wey meketuu te langgam haazà is langun he menge etew he midtiyapan te tiyap duen te langgam wey mid-azap te ledawan te langgam.) Ne sikan is langgam wey kes ebpeneuven ni Setanas, intimbag sikandan he uuyag pa ziyà te ranew he egkeregreg te esupri.